Psalm 128:1-6
Bóhólníihii deidósinii bikʼidahodzisdliʼii
128 Bóhólníihii deidósingo yikʼehgo deíkáahii éí tʼááłáʼí nítínígo bił dahózhǫ́!
2 Nílaʼ bee binishínílnishii bikʼé adííyı̨́įłgo nił hózhǫ́ǫ doo áádóó nił yáʼáhootʼéeh doo.
3 Nikin góneʼ neʼasdzą́ą́ éí chʼil naʼatłʼoʼii bineestʼąʼ bąąh náhoodleełii nahalin doo; áliv ádaałtsʼíísígo adaastsigo kʼidoolyáhígíí nahalingo naʼáłchíní nibikááʼ adání yichʼįʼ dah naháaztą́ą doo.
4 Jó, diné éí Bóhólníihii yidósinii kótʼéego bikʼihojidlíi doo.
5 Záíyan hoolyéédóó Bóhólníihii nikʼijidlíi doo! Niʼííníłdįįd bijı̨́įjįʼ Jerúsalemgi yáʼáhootʼéehgo yíníʼı̨́į leʼ!
6 Naʼáłchíní áádóó banáádaʼáłchíní yidííłtsééł! Ízrel dineʼé bitahgi hashtʼehodítʼée leʼ.
