Psalm 118:1-29
118 Bóhólníihii bichʼįʼ ahééh danohsin, háálá yáʼátʼéehii nilı̨́, aa aʼááh nízingo ahóyéelʼá!
2 Hániʼdii Ízrel dineʼé ádaaní, Aa aʼááh nízingo ahóyéelʼá.
3 Hániʼdii Éran dineʼé ádaaní, Aa aʼááh nízingo ahóyéelʼá.
4 Hániʼdii Bóhólníihii deidísinii ádaaní, Aa aʼááh nízingo ahóyéelʼá.
5 Tsístłʼasíyáago Bóhólníihii náoshkąąhgo bichʼįʼ sodeeszin; Bóhólníihii shichʼįʼ ééhoosįįdgo doo shihodiitʼiʼgóó hótsaa hazʼą́ągi nishiníłtı̨́.
6 Bóhólníihii shichʼijí nilı̨́; doo násdzid da doo. Dinéshąʼ, haa dashizhdoolííł?
7 Shíká anájahígíí yił Bóhólníihii shichʼijí nilı̨́. Éí bąą shikʼee dadiniihii bikʼeh hodeesdlı̨́įʼgo bá laanaa nisinii yideestsééł.
8 Diné beijólíhígíí biláahgo Bóhólníihii beijólííjígo yáʼátʼééh.
9 Naatʼáanii danilíinii beijólíhígíí biláahgo Bóhólníihii beijólííjígo yáʼátʼééh.
10 Ałʼąą dineʼé tʼáá ałtso shináshzhiizh, nidi Bóhólníihii bízhiʼ baa jííníshłíigo áhodeeshdįįł!
11 Shináshzhiizh, tʼáá ałtsodę́ę́ʼ shináshzhiizh, nidi Bóhólníihii bízhiʼ baa jííníshłíigo áhodeeshdįįł!
12 Tsésʼná haanánísą́ nahalingo shináshzhiizh; chʼil dadeeníinii kǫʼ bił hadíínóodgo tsı̨́įłgo adíídeezígíí nahalingo, Bóhólníihii bízhiʼ baa jííníshłíigo áhodeeshdįįł!
13 Naaʼadeeshgoh biniyé tʼáá naʼníleʼdii náás adashiyoołhan, nidi Bóhólníihii shíká aalwod.
14 Bóhólníihii éí bee shidziilii áádóó shiyiin nilı̨́; kʼad bee yisdááyáii silı̨́ı̨́ʼ.
15 Diné tʼáá ákogi ádaaníiłii biníbaal naaznil biyiʼdóó baa hózhǫ́ǫgo yisdáʼiildééhjí sin diitsʼaʼ; Bóhólníihii bigaan nishʼnáájí yee doo nánílyéésgóó áánííł!
16 Bóhólníihii bigaan nishʼnáájí yee ayóó átʼéii íʼdólzin; Bóhólníihii bigaan nishʼnáájí yee doo nánílyéésgóó áánííł!
17 Doo dadeestsaał da, nidi hinishnáago Bóhólníihii binaanish baa hashneʼ doo.
18 Bóhólníihii tʼáá íiyisí shichʼahashkéego nashineeztą́ą́ʼ, nidi anoonééł tʼáadoo yaa shidiníʼą́ą da.
19 Tʼáá ákogi átʼéii bidáádadilkał shá ąą ádanileʼgo Bóhólníihii baa hashniihgo yah adeeshááł.
20 Díí Bóhólníihii bidáádílkał átʼé; éí diné tʼáá ákogi ádaaníiłii ákóneʼ yah ahidookah.
21 Shichʼįʼ ééhosínísįįdgo bee yisdéíyáii sínílı̨́ʼígíí bąą naa hashniih doo.
22 Kin ádeiłʼíní tsé doo deiniizı̨́įʼ da yę́ę tʼáá éí tsé bee naanáʼástłʼinii silı̨́ı̨́ʼ.
23 Díidí Bóhólníihii áátʼįįdígíí átʼé, áko daníilʼı̨́įgo bikʼee tʼóó nihił adahayóí.
24 Díí yoołkáłígíí Bóhólníihii áyiilaa, éí baa nihił nidahoozhǫǫhgo nihił dahózhǫ́ǫ doo.
25 Bóhólníihii nílíinii, nánooshkąąh, kʼad yisdánihínííł! Bóhólníihii, nánooshkąąh, nihee ídaʼazįįdgo ánihílééh!
26 Bóhólníihii bízhiʼ bee biʼdójíigo yigáłígíí bikʼihojidlíi doo! Bóhólníihii bikin siʼą́ą́dóó naa dahwiiʼniih.
27 Bóhólníihii éí Diyin God nilı̨́, áádóó adinídíín nihaidiníʼą́. Bikááʼ nááʼiiniihí naa nídaazʼáhígi náádahidoolnihígíí bikʼi nidaʼohtłʼoʼ.
28 ShiDiyin God nílı̨́, áádóó naa hashniih doo. ShiDiyin God nílı̨́; tʼáá íiyisí naa hashniih doo.
29 Bóhólníihii bichʼįʼ ahééh danohsin, háálá yáʼátʼéehii nilı̨́; aa aʼááh nízingo ahóyéelʼá.
