Psalm 108:1-13
Daʼanaʼí bikʼijįʼ áká adoolwoł biniyé sohodizin (Ps. 57:7-11; 60:5-12)
108 Diyin God nílíinii, shijéí hashtʼeetʼé! Hashtaałgo shiiʼ sizíinii bee naa hashniihgo nichʼįʼ hashtaał doo!
2 Tsin tłʼóół neeznáá bąąh daneelzheeʼgo bee nidaʼaʼnéii áádóó tsin tłʼóół naakitsʼáadah bąąh daneelzheeʼgo bee nidaʼaʼnéii nohłíinii, chʼéénóhdzííd! Tʼóó hoosʼįįdą́ą́ʼ chʼéédeesdził.
3 Bóhólníihii nílíinii, diné bitahgóó naa hashniih doo. Ałʼąą dineʼé bitahgóó naa hashniihgo nichʼįʼ hashtaał doo.
4 Háálá aa aʼááh nínízinii yótʼááh hiníláii bilááh átʼé áádóó nitʼáá aaníinii kʼos bíneelʼą́.
5 Diyin God nílíinii, yótʼááh hiníláii biláahgo ayóó ánítʼée leʼ! Bee ayóó ánítʼéii nahasdzáán tʼáá náhwiizʼą́ą́ nítʼééʼ biláahgo baa haʼniih leʼ!
6 Shichʼįʼ ééhonísįįh! Ayóóʼííníʼníinii yisdádooltéłígíí biniyé nigaan nishʼnáájí bee shíká anilyeed.
7 Diyin God diyinii nilı̨́įgo díí yee haadzííʼ: Baa shił hózhǫ́ǫgo Shííkem ahádeesoh, áádóó Sákath honíteel bídíʼnéeshʼąął.
8 Gíliyad éí shí; Manáseh éí shí; Íífreiyim éí shibéésh chʼah átʼé, Júdah éí bee hazʼáanii ííłʼíní shá nilı̨́.
9 Móʼab éí shibiiʼ táʼádísgisí átʼé. Íídam bikáaʼjįʼ shikeeʼ ahideeshxą́ą́ł. Filístiya dineʼé éí bikʼeh díshdlı̨́įʼgo hadideeshwosh.
10 Bohoníłdzilgo kin haalʼáajįʼ háishąʼ shił dooʼash? Íídam kéyahgóoshąʼ háí shił dooʼash?
11 Diyin God nílíinii, doósh nahjįʼ ninihidííníʼą́ą da? Diyin God nílíinii, nihisiláo dah yinéełii tʼáadoo bił yínínáa da.
12 Nihiʼanaʼí bichʼįʼ nihíká anilyeed, háálá diné tʼéiyá áká iilwoʼgo tʼáadoo nádleehí da!
13 Diyin God biłgo doo nídaniilyées da doo, háálá bí nihiʼanaʼí nihá yikʼi nidoogaał.
