Proverbs 21:1-31
21 Bóhólníihii tooh nílı̨́ áyósinígíigi átʼéego Bóhólníihii íinízinígíí bikʼehgo aláahgo naatʼáanii bijéí nayiiłnáago hooʼáałgo áyósin.
2 Tʼáá ałtso tʼáá ákogi áshtʼı̨́ danízingo diné deíkááh, nidi Bóhólníihii éí ajéí neiłkaah.
3 Nááʼjiiłniihígíí biláahgo tʼáá ákogi átʼéii áádóó doo haada yitʼéégóó ájooníiłgo bee Bóhólníihii bił hojíshǫ́.
4 Ádeijódlí joolnáaʼii áádóó ádaa dzódlíigo nitsíkeesii éí diné doo yáʼáshóonii bee adinídíinii átʼéego ádił niʼiidzíihii átʼé.
5 Haleebee naalnishii naalyeʼé bee ádaʼazįįdjįʼ bá dahodiitʼiʼ, nidi doo hodinaʼ naalnishii tsxı̨́įłgo téʼéʼı̨́ yileeh.
6 Woochʼííd bee yódí shóoztʼeʼii éí siil áádįįłii nahalin, áko éí ákótʼéego hádajitʼíinii aniné hádajitʼı̨́.
7 Diné doo yáʼádaashóonii yee atídaʼałʼíinii tʼáá éí atínídabidoodlííł, háálá tʼáá ákogi átʼéego ádadooníłígíí tsʼídá doo deinízin da.
8 Diné ádihodiiltʼiʼii éí nahagiz bił honítʼiʼgóó yigááł, nidi diné yáʼátʼéehii ááníiłii tʼáá daʼáko.
9 Asdzání saad biiłhéii hótsaa góneʼ bił haghanjí doo yáʼátʼéeh da; kin bighą́ąʼdi bee nástłʼahdi tʼáá sáhí haghanjí agháago yáʼátʼééh.
10 Diné doo yáʼáshóonii bąąhági átʼéii tʼéí yinízin, áko doo joobaʼgóó yił kééhatʼíinii baa ákonízin.
11 Ánahałtʼiʼii atíbiʼdiilyaago diné doo hóyáanii éí hodooyąął, áádóó diné hóyáanii naneestą́ąʼgo ił ééhózin bee hodooleeł.
12 Diné tʼáá ákogi átʼéii éí doo yáʼádajíshóonii hoł nahazʼánígíí yaa nitsíkeesgo ádił nidaʼdziilzíhígíí biniinaa Diyin God áhoołdįįł, yóʼní.
13 Badahojoobáʼíii daachago bichʼįʼ jéʼáhozhdilkałii tʼáá hó ałdóʼ jicha doo, nidi tʼáadoo hodidootsʼı̨́łí da.
14 Tʼáá nahontʼinee haʼalyéehgo bee doo háháchįįh da, áádóó aa neelʼı̨́ʼígíí átʼajooʼnilgo tʼáá íiyisí áháchįʼ néidooshǫǫł.
15 Doo haada yitʼéii áálʼįįhgo tʼáá ákogi ádaatʼéii bił dahózhǫ́, nidi doo yáʼádaashǫ́ǫ́góó ádaaníiłii nidabiiłchxǫǫh.
16 Diné bee akʼiʼdiitįįhii yitsʼáníyáii éí diné daneeznáanii bitahgi hojílǫ́.
17 Diné neeni bił ayóó áhootʼéii bahojoobáʼí doo; diné éí wáin áádóó akʼah bił chʼiyáán ádaalʼíinii bił ayóó áhootʼéii doo ajitʼı̨́į da doo.
18 Diné doo yáʼádaashóonii éí diné tʼáá ákogi ádaatʼéii yá nályééh danilı̨́, áádóó diné ninádaʼdiiʼaahii éí diné tʼáá ákogi ádaatʼéii yá náályééh danilı̨́.
19 Asdzání saad halʼı̨́įgo báháchįʼii bitsʼą́ądi honoojíidi kééhojitʼı̨́ı̨́jígo agháago yáʼátʼééh.
20 Diné hóyáanii kééhatʼı̨́įgi yódí áádóó akʼah daʼílíinii hólǫ́, nidi diné doo hóyáanii éí tʼáá ałtso tʼóó yee nidooneełgo íidoołdįįł.
21 Tʼáá ákogi éʼétʼéii índa aa aʼááh hwiindzin yikʼehgo yigáałii éí iiná áádóó tʼáá ákogi éʼétʼé índa ił ídlı̨́ yikʼéghááh.
22 Diné hóyáanii éí diné dahayóii bikin haalʼáhígíí yikʼeh didleeh, áádóó bineʼ adziihii yaa dadzólíhígíí yitsʼą́ą́ʼ naaʼayiiłkaʼ.
23 Tʼáá háiida tʼáadoo haʼóotahí naagháii áádóó hazaad baa áhojilyáanii éí achʼįʼ nahwiiʼná bitsʼąą hwiiʼ sizíinii baa áhojilyą́.
24 Diné ayóogo bee ádaa dzódliʼii éí diné ádaa haʼniihii áádóó ádaa dzódlíigo ánahałtʼiʼii bee biʼdójí.
25 Bił hóyéeʼii yinízinii biiłhééh, háálá bílaʼ yee doo tʼáá kʼad deeshnish da.
26 Éí shá bíighah bee áchą́hwíídéeniʼgo adánoolní, nidi diné tʼáá ákogi átʼéii doo aa nichįʼgóó bił hadleeʼ.
27 Diné doo yáʼáshóonii nááyiiłniihígíí doo yildin da; doo yáʼáshǫ́ǫ́góó nitsíkeesgo nááʼiiłniihgo tʼah nááyówehgo doo yildin da.
28 Diné biyoochʼíidgo halneʼii dadootsaał, nidi diné íistsʼą́ąʼii akʼeh hółʼı̨́įgo asʼahgóó yáłtiʼ doo.
29 Diné doo yáʼáshóonii doo yistiʼ da noolningo íʼdiilʼįįh, nidi diné tʼáá ákogi átʼéii yigááł dooleełgóó nayikʼítsíłkees.
30 Hódzą́ áádóó bee akʼiʼdiitįįhii índa naʼnitin doo łaʼ Bóhólníihii yikʼijįʼ nilı̨́į da.
31 Ałkʼi iidoojah biniyé łı̨́ı̨́ʼ hashtʼeelʼįįh, nidi akʼeh hodeesdlı̨́ı̨́ʼ éí Bóhólníihii bí.
