Micah 4:1-13
4 Nidi díí ádoonííł nihoogháahjįʼ yoołkáałgo Bóhólníihii bikin biiʼ sohodizin bił hazʼánígi dziłígíí éí dził naaznil bighą́ąʼdi bohoníłdzilgo ádoolnííł; deílkʼid biláahgo wódahgo óolzin doo, áko áajįʼ ałʼąą dineʼé yah íílı̨́į doo.
2 Áádóó ałʼąą dineʼé ląʼí nidahidookahgo ádadidooniił, Hágo, Bóhólníihii bidziłghą́ą́ʼgóó hadiikah áádóó Jéíkab biDiyin God bikinjįʼ diikah, áko yee átʼéii yínanihidínóołtįįł áádóó bikʼehgo honítʼiʼii deíníikáah doo, háálá Záíyandóó* bibee hazʼáanii chʼíhwiileeh doo áádóó Jerúsalemdóó Bóhólníihii bizaad chʼíhwiileeh doo.
3 Índa ałʼąą dineʼé ląʼí bitahgóó ánihwiiʼaahii nilı̨́į doo áádóó danízaadę́ę́ʼ ałʼąą dineʼé yá nihodidooʼááł, áko dabidiltłish bee nihwiildlaadí bitsiitsʼiin ádadoolnííł índa bitsiiʼdadétáán éí tsin bitsʼáozʼaʼ bee higéshí ádadoolnííł biniyé nídadootsił; dineʼé éí náánáłaʼ dineʼé yichʼįʼ doo dabidiltłish de ánáádeidoodlíił da, doo nidi anaaʼ yínáádahwiidoołʼáał da.
4 Áko diné tʼááłáʼí jinítínígo tʼáá hó hachʼil naʼatłʼoʼii índa hatsin fig sikaadii biyaagi nidadzíiztą́ą doo, áádóó doo łaʼda hoł yééʼ áhodoolíił da, háálá tʼáá ałtsoní bee Bóhólníihii yee haadzííʼ.
5 Azhą́ dadineʼé tʼáá ałtso tʼáá bí bidiyin dabidiʼníinii yikʼehgo deíkáah nidi, nihí éí Bóhólníihii nihiDiyin God bízhiʼ dadíníilzinii bee deíníikáahgo ahoolʼáágóó ahóyéelʼáa doo.
Ízrel dineʼé bidisnáádę́ę́ʼ yisdáhidookah
6 Éí bijı̨́ nidaʼniłhodii áłah ádeeshłííł áádóó yóóʼadabidiʼneeskaadii índa atídeishłaii áłah ádeeshłííł, ní Bóhólníihii;
7 nidaʼniłhodii éí yidziihígíí danilı̨́įgo áhodeeshłííł, áádóó nízaadgóó adahodiʼneeskaadii dineʼé bidziilgo dah yikahii áhodeeshłííł; náás hoolzhishgóó Dził Záíyandóóígíí Bóhólníihii hoolʼáágóó honantʼáa doo.
8 Áádóó ni, dibé baa áháyą́ biniyé kin yaaʼáhí nílíinii, Záíyan bichʼéʼé yineʼ naadziʼii nílíinii, díí áłtséédą́ą́ʼ óhólníihii bił naa hodoolzhish; Jerúsalem bichʼéʼé bee bóhólníih dooleełii baa hodoolzhish.
9 Kʼad haʼátʼíísh biniyé yéego nicha? Daʼ ninanitʼaʼíísh ádin? Daʼ kótʼé niłníiniísh ádingo biniinaa asdzání awééʼ bídiiʼnaʼígi átʼéego nił honiigai?
10 Záíyan bichʼéʼé nílíinii, asdzání awééʼ bíʼnahígi átʼéego bíniʼdii nił honeezgai, háálá kʼad kin haalʼáádóó hadíínáałgo halgaidi kééhótʼı̨́į doo, áádóó Bábilan kéyahgóó díínááł; áadi yisdándiʼdooltééł índa áadi niʼanaʼí bílákʼeedóó Bóhólníihii háándoołtééł.
11 Kʼad ałʼąą dineʼé nikʼijįʼ danilı̨́įgo áłah silı̨́įʼgo ádaaní, Bíniʼdii hoʼdilchǫǫh, áádóó nihí haatsʼííd daniidzingo Záíyan dahoníilʼı̨́į doo.
12 Nidi Bóhólníihii bintsékees doo hoł béédahózin da, doo nidi binahatʼaʼ bikʼidazhdiitįįh da; tłʼoh naadą́ą́ʼ habéʼélʼéesjįʼ ahaniheeshjool nahalingo áłah áhodoolííł.
13 Záíyan bichʼéʼé nílíinii, nídiidááh áádóó haʼíʼíłʼéés; jó, béésh nitłʼizii nideeʼgo índa béésh łitsoii nikeeʼgo ándeeshłííł, áko ląʼí diné nihidííłhał áádóó há ídaʼiidélígíí índa hanaalyeʼé danilíinii éí nahasdzáán tʼáá átʼé biBóhólníihii bá atsʼádideeshʼááł.
Footnotes
^ Záíyan éí Jerúsalem kin haalʼáii jiníigo óolyé. Jer. 26:18.
