John 19:1-42
19 Áko Páílat bizaad kʼehgo Jesus dah náádeidiidlóozgo nídeineestsxas.
2 Áádóó siláo chʼil hooshahii nídeiniisxodgo, chʼah ádayiilaago hakʼi deideezʼą́, índa éénééz tsídídééh nahalingo łichíʼígíí yiih dahastı̨́,
3 áko hadááhdę́ę́ʼ ninádaalwoʼgo, Yáʼátʼéhéii, Jew dineʼé Aláahgo biNanitʼaʼí nílíinii! daaníigo nídahodiyiikaad.
4 Áádóó Páílat chʼínáánádzáago ánéidooʼniid, Jóʼakon, nihichʼįʼ chʼínááhonisdlóós, bee ádąąh dah hodzistʼáanii doo łaʼ há shił bééhoozin daígíí nihił béédahodoozįįł.
5 Áko Jesus chʼil hooshahii hachʼah áádóó ééʼ tsídídééh nahalingo łichíʼígíí bee joogáałgo áádę́ę́ʼ chʼízhníyá. Áko Páílat éí diné áłah silı̨́ʼígíí áyidííniid, Jó, kǫ́ǫ́ dzizı̨́.
6 Áko aláahgo náádaʼiiłniihii áádóó bisiláo dahoołtsą́ągo, Tsin ałnáoszid bikáaʼjįʼ bił oʼołkaałgo sołhé héii, bił oʼołkaałgo sołhé héii! daaníigo hahodííłdláád. Áádóó Páílat ábidííniid, Nihílááh, tʼáá nihí tsin ałnáoszid bikáaʼjįʼ hoł adaʼołkaałgo dahosołhé, háálá bee ádąąh dah hodzistʼáanii doo łaʼ há shił bééhoozin da.
7 Nítʼééʼ Jew dineʼé ánáádahodooʼniid, Nihibee hazʼáanii hólǫ́, áko éí bikʼehgo tsʼídá dazdootsaał, háálá tʼáá hó Diyin God biYeʼ ízhʼdílʼı̨́.
8 Áko Páílat éí haʼoodzíʼígíí dzidiiztsʼą́ąʼgo, tʼah yówehígo nídzísdzííd,
9 áádóó naatʼááh kin góneʼ yah anínáádzoodzáago Jesus ábizhdííniid, Háádę́ęʼshąʼ naniná? Nidi Jesus tʼáadoo haadzíiʼ da.
10 Áko Páílat áhodííniid, Daʼ doósh shichʼįʼ hadíídzih da? Néédideeshchiłgo doodaléiʼ tsin ałnáoszid bikáaʼjįʼ nił adaʼdoolkałgo bee shóhólníhígíísh doo nił bééhózin da?
11 Jesus ánááhodooʼniid, Bee nóhólníihii doo yáʼąąshdę́ę́ʼ naa deetʼą́ą́góogo doo shíninilʼą́ą da, éí bąą naa shidiníʼánígíí aláahgo bąąhági ádzaa.
12 Díidíígíí binahjįʼ Páílat tsʼídá hwéédideeshchił niizı̨́ı̨́ʼ, nidi Jew dineʼé hadadeeshghaazhgo ádaaní, Díí diné béédííníchid ládą́ą́ʼ doo Síízar bikʼis nílı̨́į da doo; tʼáá háiida łaʼ aláahgo naatʼáanii ízhʼdílʼínígíí éí Síízar bitsʼą́ą́jí jílı̨́.
13 Áko Páílat díí saadígíí yidiiztsʼą́ąʼgo, Jesus yił chʼíníʼáazhgo bikááʼdóó aa náhátʼı̨́ yikʼi dah neezdá, ákwii hazʼą́ągi Tsé Sikaad hoolyé, nidi Hííbrew bizaad kʼehgo Gábatha hoolyé.
14 Áko atisʼadeesdzá bee bééhániihii biniyé hashtʼehodiʼnééh bijı̨́ı̨́ góneʼ, abínígo hastą́ądi oolkiłgo daatsʼí Páílat éí Jew dineʼé ííłní, Jó kóoní, Aláahgo nihiNanitʼaʼí sizı̨́!
15 Nidi hadadeeshghaazhgo ádadííniid, Sołhé héii, sołhé héii, tsin ałnáoszid bikáaʼjįʼ yeeʼ bił oʼołkaał! Nítʼééʼ Páílat áhodííniid, Daʼ Aláahgo nihiNanitʼaʼíísh tsin ałnáoszid bikáaʼjįʼ bił iʼdeeshkał? Áko aláahgo náádaʼiiłniihii ánáádahodooʼniid, Aláahgo nihiNanitʼaʼí ádin, Síízar tʼéiyá.
16 Áko índa tsin ałnáoszid bikáaʼjįʼ hoł adaʼdoołkał biniyé baa hozhníłtı̨́. [Áko Jesus dayiiłtsoodgo dah deidiilóóz.]
Tsin ałnáoszid bikáaʼjįʼ Jesus hoł oʼoolkaal (Mt. 27:32-44; Mk. 15:21-32; Lk. 23:26-43)
17 Áko Jesus tʼáá hó hatsin ałnáoszid jootı̨́įłgo kintahdóó Tsiitsʼin Siʼání hoolyéégóó hoł dah adiildeeʼ, éí Hííbrew kʼehjí Gálgatha hoolyé.
18 Ákwii tsin ałnáoszid bikáaʼjįʼ hoł adaʼaskaal, áádóó náánáłaʼ nidiltʼéego ałdóʼ, Jesus anííʼdę́ę́ʼ nijiyííłtı̨́įgo ałtsʼą́ą́hjí hoł bił adaʼaskaal.
19 Áko Páílat kótʼéego yee akʼeʼashchı̨́įgo tsin ałnáoszid yąąh dah yiztą́; Jesus Názarethdóó, Jew dineʼé Aláahgo biNanitʼaʼí, níigo bikááʼ.
20 Áko éí bee akʼeʼashchínígíí Jew dineʼé ląʼí dayííłtaʼ, háálá Jesus tsin ałnáoszid bikáaʼjįʼ hoł oʼoolkaalídóó kin haalʼáajįʼ tʼáá áyídí, áko éí Hííbrew áádóó Látin índa Gríik dineʼé bizaad yee akʼedaʼashchı̨́.
21 Áko nítʼééʼ Jew dineʼé aláahgo náádaʼiiłniihii Páílat ádeidííniid, Jew dineʼé Aláahgo biNanitʼaʼí tʼáadoo bee akʼenáʼílchíhí, nidi, Díí diné tʼáá bí ání, Jew dineʼé Aláahgo biNanitʼaʼí nishłı̨́, níigo bee akʼeʼíłchí.
22 Nidi Páílat ánáádooʼniid, Bee akʼeʼshéłchínígíí bíniʼ tʼáá éí bee akʼeʼashchı̨́.
23 Áko siláo danilínígíí tsin ałnáoszid yikáaʼjįʼ Jesus yił adaʼaskaalgo bee hazhdítʼéé nítʼéʼígíí siláo dı̨́ltʼéego ałtaadeisniiʼ; ayaadi haʼééʼ ałdóʼ. Nidi ayaadi haʼééʼ éí doo ahídadiilkad da, éí tʼáá bílátahdę́ę́ʼ yaago tʼáá łaʼ bizhiʼee yistłʼǫ́,*
24 áko ádaʼahidooʼniid, Haaʼíshąʼ, díí doo nidahidiidǫ́ǫs da, nidi háí bííʼ dooleeł biniyé yááʼiiltʼeʼ baa nidiikah. Diyin God bizaad bee akʼeʼashchı̨́įgo kónínígíí bohodoolnííł biniyé ákódzaa:
Shiʼééʼ ałtaadeisʼniiʼ,índa shiʼéʼígíí yiniyé yááʼiiltʼeʼ yaa naaskai.Áko siláo ákódáátʼįįd.
25 Ákwii tsin ałnáoszid yiyaagi Jesus bimá sizı̨́, áádóó tʼáá éí bideezhí ałdóʼ, Mary éí Klíyofas wolyéii beʼasdzą́ą́, índa Mary Mágdaliin ałdóʼ.
26 Áko Jesus hamá jiiłtsą́ągo, áádóó hóhoołʼaahii ayóóʼájóʼnínígíí hamá yíighahgi sizı̨́įgo, hamá ábizhdííniid, Asdzání, jó, eii niyáázh!
27 Áádóó hóhoołʼaahii ánáábizhdooʼniid, Jó, eii nimá! Éí áádóó íhoołʼaahii jílíinii tʼáá hó haghangóó bił níjítʼáázh.
Jesus dadziztsą́ (Mt. 27:45-56; Mk. 15:33-41; Lk. 23:44-49)
28 Kódzaadóó bikʼijįʼ há nihootʼáanii ałtso bíighah azlı̨́ʼígíí hoł bééhózingo, Diyin God bizaad bee akʼeʼashchínígíí bohodoolnííł biniyé ázhdííniid, Dibááʼ sélı̨́ı̨́ʼ.
29 Nítʼééʼ ákweʼé chʼil naʼatłʼoʼii bitooʼ dókʼǫ́zhígíí łaʼ siką́ą́ lá, áko tó náyiitsʼǫsígíí éí yéédeizʼą́ągo chʼil hísap wolyéhígíí bee hazéeʼjįʼ dah yídaʼdiiłtsih.
30 Áko Jesus chʼil naʼatłʼoʼii bitooʼ dókʼǫ́zhígíí dzizlįhgo ázhdííniid, Kʼad lá ałtso bíighah azlı̨́įʼ ni, áádóó yaa ádziidzaago hwiiʼ sizíinii ninázhdiníʼą́.
Jesus booshkʼiizh baa oʼoolzhiizh
31 Hashtʼehodiʼnééh bijı̨́įgo bąą, hááʼáyı̨́ı̨́h jı̨́ı̨́ góneʼ atsʼíís doo łaʼ tʼáá tsin ałnáoszid yąąh dah hidíłtı̨́į da doo biniyé Jew dineʼé éí tsin ałnáoszid yąąh dah hidíjéʼígíí yijáád deidiyootihgo* nahgóó ádeidoolííł biniyé Páílat nídayooskan (háálá éí hááʼáyı̨́ı̨́h jı̨́ aleehígíí ayóogo dílzinii átʼé).
32 Áko siláo yíkaigo tʼáá hoł bił oʼoolkaalii átséhígíí bijáád dayiiztiʼ, łaʼígíí ałdóʼ,
33 nidi Jesus baa jíkai, nítʼééʼ tʼáá íídą́ą́ʼ daaztsą́ą́ lágo hoł béédahoozin, áko tʼáadoo bijáád dadziiztiʼ da.
34 Nidi siláo łaʼ tsiidétáán hooshkʼiizh góneʼ yaa ayííłgeed, tʼáá áko áádę́ę́ʼ dił tó bił háánaʼ.
35 Áko éí binááł baa oʼoolzhiizhii yiyiiłtsánígíí yaa hoolneʼ, áko yaa hoolneʼígíí éí tʼáá aaníí, índa tʼáá aaníígóó halneʼgo bił bééhózin. Nihí ałdóʼ deidoohdląął biniyé yaa halneʼ.
36 Bitsʼin doo łaʼ kʼíʼdooltǫǫł da, níigo Diyin God bizaad bee akʼeʼashchínígíí bohodoolnííł biniyé díí tʼáá ałtso ákódzaa.
37 Índa náánáłahgo ałdóʼ Diyin God bizaad bee akʼeʼashchíinii ánáádíʼní, Baa adaʼjishiizhígíí dazhníłʼı̨́į doo.
Jesus yóóʼáhoʼdiilyaa (Mt. 27:57-61; Mk. 15:42-47; Lk. 23:50-56)
38 Kódzaadóó bikʼijįʼ Arimathíya hoolyéédę́ę́ʼ Jóseph éí Jew dineʼé béédzíldzidgo tʼáá nantʼinee Jesus yídahoołʼaahii jílı̨́. Éí, Jesus bitsʼíís nahgóó adeeshtééł, jiníigo Páílat bíjííkeed, áko Páílat haʼdiʼníʼą́. Ákwii jiníyáago Jesus bitsʼíís dashdiiłtı̨́.
39 Nítʼééʼ Nikodíímas ałdóʼ ákwii níyá, éí átséédą́ą́ʼ tłʼéeʼgo Jesus baazhníyáhígíí éí spáis wolyéii łikání halchinii mir áádóó álooz wolyéhígíí ałtaanásdziidgo neeznádiindi daatsʼí dah adiidlohgo jiníyı̨́.
40 Éí nizhdiltʼéego Jesus bitsʼíís dashdiiłtı̨́įgo, Jew dineʼé yóóʼádaʼałʼínígi átʼéego łikání halchinii spáis wolyéii bąąh ájiilaa áádóó naʼatʼą́hí łigaii ditsʼidígíí bił dzizdis.
41 Áko tsin ałnáoszid bikáaʼjįʼ hoł oʼoolkaalígi tʼáá éí nahósʼaʼgi tsin bił dah náháltso, áko ákweʼé ániidígo tséníʼootséelgo tsʼídá tʼah doo áajįʼ diné łaʼ yóóʼálnéeh da.
42 Áko Jew dineʼé bihashtʼehodiʼnééh bijínígíí áádóó tséníʼootséél tʼáá áyídígo ałdóʼ biniinaa ákóneʼ Jesus yóóʼájiilaa.
Footnotes
^ Ayaadi haʼééʼ doo ahídiilkadí da áádóó bigąąziz áłtsʼíísí áádóó tʼáá agodígo nineelʼą́ą́ nítʼééʼ.
^ Tsin ałnáoszid bąąhjįʼ diné díkwíida biiłkááh tiʼhooníihgo ákohgo índa daatsaah. Éí bąą dabijáád hetíih łeh nítʼééʼ.
