Isaiah 47:1-15
47 Bábilan bichʼéʼé bízháán naagháii nílíinii, wóshdę́ę́ʼ hadanináahgo niʼdóó łeezh dibahí biiʼ nídaah; Kaldíya dineʼé bichʼéʼé nílíinii, bikááʼdóó nahatʼáii ná ádin, áko yilzhólí áádóó ayóó ánóolninígíí doo nándiʼníi da doo.
2 Tsé bee ikʼahí nitsaaígíí* nídiiʼníiłgo bee íkʼá; ákʼiʼdíltsóós; niʼééʼ niníiʼjįʼ neelʼą́ągo tooh biyiʼgóó chʼínínááh.
3 Tʼáá łiníchíʼígo tʼáá aaníí tʼóó naa yáhásin doo; kʼéndideeshdlíiłgo diné doo łaʼ doodzih da.
4 Nihikʼé nináʼídláii nilíinii, éí tʼáá ałtsoní bee Bóhólníihii áádóó Ízrel biDiyin nilíinii bee wójí.
5 Kaldíya dineʼé bichʼéʼé nílíinii, chahałheeł biiʼjįʼ dah diináahgo díníłhéelgo sínídáa doo, áko bee ídahólníihgo bił nidahazʼą́ą́dóó asdzą́ą́ naatʼááh doo nándiʼníi da doo.
6 Shidineʼé tʼáá íiyisí bichʼįʼ sháhóóchįįdgo shííʼ dooleełii yíłchǫʼgo nílákʼedííʼą́; doo aa aʼááh nínízingóó tʼáá shiidą́ąʼdii hadaatihii danilínígíí yéego bichʼįʼ nahoyíłnáá nítʼééʼ.
7 Áádóó ádíní, Hoolʼáágóó ahoolʼáágóó asdzą́ą́ naatʼááh nishłı̨́į doo. Áko díí doo nijéí biyiʼdi baa nitsísíníkéez da, doo nidi bee nidootʼihígíí béénílniih da nítʼééʼ.
8 Éí bąą ni nił honeełnigo baa ádíínítʼánígíí, tʼáá naʼníleʼdii hinínáago nijéí biyiʼdi ádíní, Shí honishłǫ́ áádóó doo łaʼ nááhódlǫ́ǫ da; asdzání bąąh áhásdįįdii doo nishłı̨́į da doo, áádóó shaʼáłchíní doo łaʼ shitsʼą́ą́ʼ ádoodįįł da.
9 Nidi tʼáadoo hooyání łaʼa jı̨́ díí naakigo hazʼą́ bił naa hodoolzhish; éí naʼáłchíní nitsʼą́ą́ʼ ádoodįįł índa bąąh áhásdįįdii dííleeł; azhą́ álílee kʼehgo ląʼígóó nił ééhózin nidi, índa ninahaghaʼ tʼóó ahayóí nidi, éí bee atíndiʼdoolníiłii tʼáá átʼé nikʼi hwiidooleeł.
10 Háálá doo yáʼáshǫ́ǫ́góó ááníiłii baa jíínílíigo ádííníniid, Doo łaʼ shooʼíní da. Nibee hódzáanii áádóó nił ééhózinii éí nił náhásxizgo nijéí biyiʼdi ádííníniid, Shí honishłǫ́ áádóó doo łaʼ nááhódlǫ́ǫ da.
11 Éí bąą doo yáʼádaashóonii nikʼi hwiidooleeł, áko bee bił yóóʼahodííłáałii doo nił bééhózin da doo, áádóó báhádzidii nikʼijįʼ dooleełgo nahjįʼ kodíílíłígíí doo bíninilʼą́ą da doo índa atíndoolíiłii doo nił bééhózinii tʼáadoo hooyání nikʼi hwiidooleeł.
12 Ániid nanináádą́ą́ʼ ninahaghaʼ nilíinii índa álílee kʼehgo nił ééhózinii bee nishínílnishii kʼad bee yiizįįh; tʼáá aaníígóó átʼéego bee ná ínaʼiidoodił, índa tʼáá aaníígóó átʼéego bee ił yééʼ áhodíílííł.
13 Ląʼígóó kótʼé nidiʼníigo bąą chʼééh díníyá. Bíniʼdii dééstʼı̨́ı̨́ʼ ádeiłʼíinii áádóó sǫʼ deiníłʼíinii áádóó dah néitı̨́ı̨́h bikʼehgo áhodooníiłii yaa dahalneʼii deizįįh, áádóó díí tʼáadoo leʼé baa dahodiyoolzhishígíí bitsʼą́ąjįʼ yisdádaniłteeh.
14 Jó, ehégod nidahalin doo; kǫʼ adabididoołkʼą́ą́ł; kǫʼ dah nídínoʼii bidziilii bitsʼą́ąjįʼ doo yisdáʼádadidooʼnił da, áádóó tsííd yee nídaʼiidoodziłii ádin doo, doo nidi kǫʼ diltłiʼgo yichʼįʼ naháaztą́ą da doo.
15 Tʼáá ákótʼéego ániid nanináádą́ą́ʼ bił nidashínílnishii tʼáá éí ná nidaʼiiłniih nítʼééʼ yę́ę tʼáá bá nahazʼą́ą́góó nídadoodleełgo doo łaʼ yisdándoołtéeł da.
Footnotes
^ Íídą́ą́ʼ naalteʼ tʼéiyá díí yee daʼakʼáá nítʼééʼ.
