Isaiah 25:1-12
25 Bóhólníihii nílíinii, ni lá shiDiyin God nílı̨́ ni; ayóó ánítʼéego ándeeshłíiłgo nííníshíigo naa hashniih doo, háálá ayóó ádaatʼéii baa nisíníyáhígíí éí ałkʼidą́ą́ʼ ninahatʼaʼ éí baʼahódlíii índa tʼáá aaníinii ádaatʼé.
2 Jó, kin haalʼáá nítʼééʼ yę́ę éí tʼóó dah yiskʼidgo íinilaa, áádóó éí bináʼástłʼin yę́ę tʼáá bił yíchǫʼ, áko déʼéyóní naatʼáanii danilı̨́įgo dabighan yę́ę doo kin haalʼáa da silı̨́ı̨́ʼ; tsʼídá doo ninádadooʼnił da.
3 Éí bąą dineʼé dabiziilii naa dahaniih doo; kin haalʼáádóó éí ałʼąą dineʼé tʼóó báádahadzidii bikin hadaasʼáii dandósin doo.
4 Doo bíká adaʼalyeedígíí ni nineʼ nidaadziʼ, bahojoobáʼígíí bichʼįʼ nahwiiʼnánígíí biyiʼ ni nineʼ naadziʼ, áádóó tʼóó báhádzidgo diyołgo bá bineʼ aʼniichéehii nílı̨́ı̨́ nítʼééʼ índa tʼáá íiyisí honiigahgo bá chahaʼoh nílı̨́ı̨́ nítʼééʼ, háálá kin bá ahénátłʼinii bichʼįʼ deeyol nahalingo diné báádahadzidii éí yaatįįh yijah.
5 Hóółtseiigi honeezgaigo, tʼáá éí kʼos bee chahaʼohgo doo deesdoi da hazlı̨́ʼígi átʼéego déʼéyóní hahóółʼáhígíí niʼ ádíílííł; diné tʼóó báádahadzidii biyiin aʼohgo ádoolnííł.
6 Áádóó chʼiyáán daalkanii, wáin tʼah doo bąąh yaadzíidii índa neeskʼahii biwol dahólóonii, wáin bąąh yaadziidii díí dziłgi bee ádaʼazįįdgo tʼáá ałtsoní bee Bóhólníihii éí dadineʼé tʼáá ałtso yá ádaʼdoosįįł.
7 Áádóó ałʼąą dineʼé tʼáá ałtso bikʼéstiʼii, dadineʼé tʼáá ałtso dabiniiʼ bikʼéstiʼii éí díí dził siʼą́ągi nahjįʼ kwíidoolííł.
8 Hoolʼáágóó anoonééł iidoołnah, áádóó Bóhólníihii Diyin God éí daʼaniiʼ tʼáá ałtso nákʼeetoʼ yąąh yidoołdah, índa bidineʼé bee bá nahatʼiʼígíí ałtso nahasdzáán bikááʼdóó nahjįʼ kwíidoolííł, háálá díí Bóhólníihii yee haadzííʼ.
9 Áko éí yoołkáałdi áháʼníi doo, Shoo, díí nihiDiyin God nilı̨́; yisdánihidoonił biniyé bibaʼ kééhwiitʼı̨́ı̨́ nítʼééʼ; díí Bóhólníihii nilı̨́; bibaʼ ádaniitʼéé nítʼééʼ; hániʼdii bibee yisdáʼiildéehii baa nihił dahózhǫ́ áádóó baa nihił nidahoozhǫǫh.
10 Háálá díí dził siʼą́ągi Bóhólníihii déesniiʼ doo; naaldlooshii bichaan nideeztąądgi tłʼoh naadą́ą́ʼ bitsǫz yikʼi naaskaígi átʼéego Móʼab dineʼé yikʼi nidoogaał.
11 Áádóó naʼałkǫʼii dah adidoołkǫ́ǫ́ł biniyé tʼáá ałchʼijí yee kʼídílchiʼígi átʼéego bitahjįʼ tʼáá ałchʼijí yee kʼídidoolchił, áádóó bee ádaa dahojiʼniihii índa bee injiloʼgo ájoolíłígíí éí tʼáá áłah Bóhólníihii hatsʼą́ą́ʼ naaʼiidoołkał.
12 Áko nikin haalʼá binaa wódahgo ahéédaʼastłʼinii éí bighą́ąʼdi bineʼ nanidziʼígíí niʼgóó łeeshtahjįʼ hadeidoołkałgo wóyahdi nidadeeztąąd doo.
