Isaiah 23:1-18
23 Táir kin haalʼáádóó dineʼé átʼée dooleełii chʼétʼą́. Társhish hazʼánídóó nidaʼołʼeełígíí hahoołʼá, háálá tʼáá ałtsoní ádaasdįįdgo tʼáadoo biniyéhígóó hazʼą́ hazlı̨́ı̨́ʼ, áko dahooghan éí ádaadin, tʼáadoo yah oʼólʼeełídę́ęʼ da. Sáípras* kéyahdę́ę́ʼ bichʼįʼ baa hóóneʼ.
2 Tábąąhgóó kéyah hazʼánígi kéédahohtʼínígíí, Sáídan kin haalʼáádóó nidaʼiiłniihí nihaa nídaʼałʼołgo tʼáadoo leʼé baa nidahołniih yę́ę, dadínółhéél.
3 Tónteel bibąąhjįʼ Sáíhar tó nílínígi tooh bee naniseʼ nídaneestʼánígíí bitsʼą́ą́dóó aʼiideeł, áádóó ákweʼé ałʼąą dineʼé bá naʼiiniʼ bił hazʼą́.
4 Sáídan nílíinii, yánínízin leʼ, háálá tónteel yee bidziilígíí yáłtiʼgo ání, Doo awééʼ hwéʼnahígi átʼéego shił hodiniih da, doo nidi shaʼáłchíní haleeh da índa tsíłkéí áádóó chʼikéí doo dah hinisée da.
5 Táir kin haalʼá atílyaago éí Ííjip kéyahdi nídayooʼniiʼgo yéego yínííł yiih dínóodah.
6 Társhish hazʼánígóó tó haʼnaa ninohnééh; tábąąhgóó kéédahohtʼínígíí hahoołʼá.
7 Tʼáá náshiinídą́ąʼdi bił hoolzhishígíí bee baa haneʼ dahólónígíí, daʼ díísh baa hózhǫ́ǫgo kin haalʼáhígíí átʼé? Nízaadi kééhojitʼı̨́į dooleełgóó tʼáá niʼ tázhdííyá.
8 Táir kin haalʼáagi háísh yikʼijįʼ nahazʼą́? Éíyeeʼ náádaałahgóó naatʼáanii ninádayiiʼnííł; éíyeeʼ baa nidaʼiiniihí naatʼáanii danilı̨́; éíyeeʼ baa nidaʼiiniihí nihokááʼgóó diné baa yáhásinii danilı̨́.
9 Tʼáá ałtso bee ádaa dahojiʼniihígíí doolchǫǫł biniyé áádóó bee ił dajílíinii nihokááʼ dineʼé deiʼı̨́į dooleeł biniyé tʼáá ałtsoní bee Bóhólníihii yinahazʼą́.
10 Társhish bitsiʼ nílíinii, nikéyah biyiʼgóó tooh nílínígi átʼéego wóʼąninééh, háálá tʼáadoo tʼą́ą́ʼ kónánódleʼí da.
11 Tónteel bikááʼgóó dah didiilniiʼgo ídahólníihgo nahazʼánígóó nayiisnááʼ; Bóhólníihii éí Kéínan kéyahgi kin haalʼáhígíí bee dahółdzilii íidoołdįįłgo yikʼijįʼ haadzííʼ.
12 Áádóó ádííniid, Chʼikę́ę́h bichʼįʼ nahwiisnáaʼii, Sáídan bitsiʼ nílíinii, doo nił ninááhoojǫǫh da doo; nídiidáahgo Sáíprasgóó dínááh; áadi ałdóʼ doo háánílyı̨́įh da doo.
13 Shoo, Kaldííya dineʼé bikéyah; Asíriya dineʼé éí díí dineʼé doo béédahoʼdílzin da nítʼééʼ yę́ę bikin haalʼáii naaldlooshii daʼałchinii bá hazʼą́ągo ádayiilaa; kin yadaaʼáago ádayiilaa áádóó naatʼáanii dabighan yąąh daʼííbı̨́įʼgo ałtso dayííłchǫʼ.
14 Társhishdóó nidaʼołʼeełígíí hahoołʼá, háálá nihibineʼ naʼadziʼ yę́ę tʼáadoo biniyéhí da silı̨́ı̨́ʼ.
15 Áádóó éí beiníłką́ądi tʼááłáʼí aláahgo naatʼáanii hinánígíí bikʼehgo tsostsʼidiin nááhaijįʼ Táir baa hoyoosnah doo; tsostsʼidiin nááhai bíighah azlı̨́įʼjįʼ ałjiłnii bíʼdílʼaʼígi átʼéego Táir hóʼdílʼaʼ doo.
16 Ałjiłnii nílíinii, naa hoyoosnahii tsin tłʼóół bąąh daneelzheeʼgo bee nidaʼaʼnéii nídiitįįhgo kin haalʼáhígi tádínáahgo bee nééhániih doo biniyé nizhónígi íitsʼaʼgo sin tʼóó ahayóigo bee hótaał.
17 Áádóó tsostsʼidiin nááhaígíí bíighah azlı̨́ı̨́ʼdóó bikʼijįʼ Bóhólníihii éí Táir yaa nááhodoodleeł, áko éí baʼiideeł yę́ę yichʼįʼ tʼą́ą́ʼ kónádzaago nahasdzáán bikááʼgóó ídahólníihgo bił nahazʼánígi yił naʼageh yaa naagháa doo.
18 Áádóó binaalyeʼé éí Bóhólníihii baa náhiditʼaah doo; baa hadeełígíí doo hashtʼeʼniyiiníił da doo, nidi éí Bóhólníihii yá nidaalʼaʼígíí chodayoołʼı̨́įgo yikʼé daʼayą́ą doo, índa yee hadadítʼée doo.
Footnotes
^ Íídą́ą́ʼ Kítim hoolyéé nítʼééʼ.
