Isaiah 14:1-32
14 Jó, Bóhólníihii éí Jéíkab yaa aʼáhí dínóozįįł, áádóó Ízrel dineʼé nínéidiyoodlah, áádóó tʼáá bí bikéyahgi kééhatʼı̨́įgo ánéidoodlííł, áko déʼéyóní danilíinii baa hakáahgo Jéíkab dineʼé yił łáʼí danilı̨́į dooleeł.
2 Áádóó ałʼąą dineʼé háká anídoojahgo tʼáá hó hakéyahgóó anídahwiiʼéesh doo, áko Bóhólníihii bikéyahgi Ízrel dineʼé éí diné naalteʼ áádóó asdzání naalteʼ danilíinii bee dahodooleeł; yisnááh ádahoolaa yę́ę yisnááh áńdazhdoodlííł, áádóó hade áhootʼé ádahósin nítʼééʼ yę́ę bininádazhntʼáa doo.
3 Áko Bóhólníihii éí yínííł nílíinii áádóó nichʼįʼ nahwiiʼnáanii índa tʼáá íiyisí naalteʼ nílı̨́įgo nanilʼaʼ yę́ę bitsʼą́ą́dóó hááʼáyı̨́ı̨́h neidiníʼą́ bijı̨́įdi
4 Bábilan dineʼé aláahgo binanitʼaʼí áłtʼąą laʼ díí bee haa haneʼ dohníigo ádadoohníi doo, Dooládóʼ ade íinízinii yę́ę tʼáadoo násdlı̨́ʼí da, hashké nídzin yę́ę tʼáadoo násdlı̨́ʼí da!
5 Bóhólníihii éí doo yáʼádaashóonii bigish áádóó aláahgo naatʼáanii binaatʼá gish yitsʼą́ą́ʼ niyiiztiʼ.
6 Éí dineʼé danilíinii yichʼįʼ tʼóó báhádzidgo bádahóóchįįdgo yikʼídaʼoołhaałgo atídayiilaa áádóó hashké dandzingo yikʼídaʼoołhaałgo atídayííłʼįįd.
7 Nihokááʼ dineʼé tʼáá ałtso háádaalyı̨́ı̨́h áádóó bił hashtʼehodíítʼeʼgo sin yee adahoʼniitáál.
8 Chʼó yílʼáii naa bił nidahoozhǫǫh doo índa Lébanangi gadtsoh deílʼáhígíí ádaaní, Wóyahgo ániʼdiilyaago biniinaa kʼad diné doo łaʼda danihizhdootsił da.
9 Chʼı̨́įdiitah kéédahatʼínígíí nidááh dookahgo hideesnááʼ; daneeznáanii tʼáá éí nihokááʼgóó aghádahideezíinii nayiisnááʼ, áko ałʼąą dineʼé aláahgo binanitʼaʼí danilíinii tʼáá ałtso yikááʼdóó nidahaʼáii yikááʼdóó nídahidiikai.
10 Tʼáá łaʼ bizhiʼee tʼáá ałtso ádandidooniił, Daʼ nihí ádaniitʼéhígi átʼéegoósh ni ałdóʼ doo nidziil da sínílı̨́ı̨́ʼ? Daʼ nihí ádaniitʼéhígiísh ánítʼé sínílı̨́ı̨́ʼ?
11 Bee ayóó ánítʼéii yę́ę áádóó tsin tłʼóół naakitsʼáadah bąąh daneelzheeʼgo bee naʼaʼnéego diitsʼaʼ yę́ę jishcháaʼjįʼ silı̨́ı̨́ʼ; chʼosh niyaa yáádaniiʼáa doo índa nikʼi yáádaniiʼáa doo.
12 Sǫʼtsoh, hayoołkááł biyeʼ nílíinii, Lúsifer, dooládóʼ yáʼąąshdę́ę́ʼ hadadzííníłhaal da! Ałʼąą dineʼé doo dabidziilgóó ádanileʼii nílíinii, dooládóʼ nihokáaʼjįʼ andiʼyoolghan da!
13 Háálá tʼáá ádíyiʼídi ádííníniid, Kʼos bilááh góde hadeeshááł, shibikááʼdóó nahatʼáii éí Diyin God bisǫʼ dah naaznilígíí biláahdi dah deeshʼááł; náhookǫsjí wódahgo áłah nilíinii bił dah naháshtą́ą doo;
14 kʼos nidaalzhoodígíí biláahdi hadeeshááł; Aláahgo Ayóóʼátʼéii nahonishłingo ádiʼdeeshnííł, nínízin.
15 Ákondi chʼı̨́įdiitah góyaa áádóó aʼáán doo nihoodzą́ąjįʼ niʼdoolnih.
16 Daniiłtsánígíí éí hazhóʼó dandínóołʼįįł áádóó naa nitsídaakeesgo ádadidooniił, Daʼ díí diné éí nahasdzáán nayiisnáʼígíí áádóó óhólníihgo bił dah nidahazʼáanii yitah dahodiisnáaʼgo áyiilaii
17 áádóó honoojí nahalingo nahasdzáán áyiilaii áádóó kin hadaasʼáii íísdįįdígíí índa awáalyaaí doo tʼáá kʼad yééʼníłniiʼígíí díísh éí átʼı̨́?
18 Ałʼąą dineʼé aláahgo binanitʼaʼí danilíinii tsʼídá tʼáá ałtso aláahdi áhootʼéegi tʼááłáʼí nítínígo tʼáá bí dabitséníʼootséél góneʼ naazhjééʼ.
19 Nidi ni atsʼáozʼaʼ doo nidziniigi átʼéego nitséníʼootséél dooleeł nítʼééʼ yę́ę bitsʼą́ąjįʼ daneeznáanii diltłish bee nidabiʼdiztseedii dabitsʼíís bee nikʼéʼéstiʼgo atsʼíís daaztsáanii tʼóó bikʼi naʼaldeeh nahalingo aʼáán góyaa tsé nikʼiistłʼin doo.
20 Nidineʼé bikéyah atíinilaaígíí biniinaa bitahgi doo yóóʼándiʼdoolníił da, áádóó doo yáʼáshóonii ádaaníiłii nisíníłtseed; baʼáłchíní náás ahoolchíiłii hoolʼáágóó doo chʼínáádabiditʼáah da doo.
21 Doo náádidoojah da áádóó nahasdzáán doo bííʼ nídadoodleeł da áádóó nihokááʼgóó doo kin hadaasʼáago áńdeidoodlíił da biniyé dabiyeʼké dabizhéʼé yę́ę badaʼátʼeʼ biniinaa nidabidiʼdootsił.
22 Jó, bikʼijįʼ nídideeshdááł, ní tʼáá ałtsoní bee Bóhólníihii, áádóó Bábilan kin haalʼáhígíí áádóó diné daadzíʼígíí áádóó ayeʼké índa atséłké ałtso áhodeeshdįįł, ní Bóhólníihii.
23 Kintahgo nahazʼánígíí dahsání bííʼ dooleeł áádóó tó naazką́ągo ałdóʼ ádeeshłííł; íʼooldįįł bee chʼíhodiyeesho, ní tʼáá ałtsoní bee Bóhólníihii.
Diyin God éí Asíriya dineʼé íidoołdįįł
24 Tʼáá ałtsoní bee Bóhólníihii ádee hadoodzíiʼgo ání, Tʼáá baa nitsísíkézígi átʼéii hodooleeł; tʼáá binahosíʼánígi átʼéii bidziilgo ádeeshłííł:
25 éí shikéyahgi Asíriya dineʼé atíhodeeshłííł áádóó shidziłghą́ąʼdi hakʼi nideeshaał áádóó hoʼazéédéetı̨́hí* ájiilaa yę́ę éí shidineʼé bitsʼádideeshʼááł índa biwos yee hondaalteʼ yę́ę nahjįʼ kódeeshłííł.
26 Díí yinahaʼáhígíí nahasdzáán tʼáá átʼéé nítʼééʼ yee yinahazʼáanii átʼé; díí ałʼąą dineʼé tʼáá ałtso yikʼijįʼ dah doolnihii átʼé.
27 Jó, tʼáá ałtsoní bee Bóhólníihii yinahazʼáanii, háishąʼ nahgóó kónéidoodlííł? Bílaʼ yee akʼi dah doolnihii, háishąʼ tʼą́ą́ʼ kónéidoodlííł?
Filístiya átʼée dooleełii
28 Aláahgo naatʼáanii Éíhaz daaztsą́ yę́ędą́ą́ʼ éí yihahígíí biyiʼ díí átʼée dooleełii chʼétʼą́.
29 Filístiya dineʼé nílíinii, gish bee nániʼdoolghaalii kʼéʼéltǫʼ biniinaa tʼáadoo baa nił nihoozhǫǫhí, háálá tłʼiish behétłʼóól bitsʼą́ą́dóó tłʼiish báhádzidii háádínóosééł áádóó bineestʼąʼ tłʼiish naatʼaʼii adiłhashii átʼée doo.
30 Téʼéʼı̨́ danilíinii daʼayą́ą doo, áádóó hojoobaʼ nahasʼáanii bił hashtʼedahodítʼéego náníjah doo; nehétłʼóól dichin bee diyeeshxééł, índa daohdzíʼígíí nanihideestsił.
31 Dáńʼdítı̨́hí nílíinii, hadílgháásh; kin haalʼáii nílíinii, yéego nichxa; Filístiya dineʼé nohłíinii, tʼáá ánółtso nihitah nidahaztseed, háálá łid nahalingo náhookǫsdę́ęʼgo siláo nídahidiibaaʼ, áko doo łaʼ nidaʼáhodilziidgo deíbáah da doo.
32 Áko éí dineʼé bindaalʼaʼí díigi átʼéego bił náhozhdoolnih, Bóhólníihii éí Záíyangi náhodiiʼą́, áádóó ákwii bidineʼé hojoobaʼ ádaatʼéii bineʼ nidahadziih doo.
Footnotes
^ Azéédéetı̨́hí, nínígíí éí Asíriya dineʼé yee ade ádahósinii ááhyiłní.
