Hebrews 12:1-29
12 Jó, daʼooʼíinii tʼáadoo bee néelą́ʼígóó nihinásʼáhígíí biniinaa, haaʼíshąʼ nihí nidanihiníłtłʼaii áádóó tʼáá haʼátʼíhída haneetehee bee bąąhági ádeiitʼı̨́įgo ánánihoodlíłígíí nahjįʼ kódadiilnííł. Áko haaʼíshąʼ jáákʼeh nihá hashtʼehoolyaaígi tsʼídá tʼááłáhígi ádeiitʼı̨́įgo haʼahóní bee deidiiltih.
2 Jesus niheʼoodląʼ yinaayáii áádóó hashtʼeyoolíiłii bichʼįʼ dadíníitʼı̨́įʼgo deidiiltih. Jesus éí bił hózhǫ́ǫ dooleełígíí biniyé yáhásin nilíinii doo yaa náʼáhodíltʼı̨́ı̨́góó tsin ałnáoszid bąąhjįʼ haʼólníigo tiʼhooʼnííh yikʼóoyá, índa Diyin God bibikááʼdóó nahatʼáii binishʼnáájígo dah neezdá.
3 Doo dadínóołnah da, índa doo nihąąh nidahodiyookałígíí biniyé Jesus baa nitsídaahkees. Éí bąąhági ádaaníiłii bináádiijahgo tʼóó yichʼįʼ haʼólníí nítʼééʼ!
4 Bąąhági átʼéii lá bichʼįʼ nidaałdzil ni, nidi tʼah doo biniinaa nihidił dadinéeh da.
5 Azhéʼé baʼáłchíní neinitinígi átʼéego Diyin God nanihineeztą́ąʼii daatsʼí baa deisoonah. Shą́ą́ʼ, Diyin God kóní:
Shiyeʼ nílíinii, Bóhólníihii tʼáá hashkée yínaʼniłtinii tʼáadoo doo níníziní.Índa nándiiteehgo tʼáadoo nąąh nááhákaʼí.
6 Háálá Bóhólníihii éí ayóóʼáyóʼníinii tʼáá hashkée neinitin,áádóó tʼááłáʼí nítínígo biyeʼ nidahaleehii néiniłtsxis.
7 Azhéʼé nilíinii tʼáá hashkée baʼáłchíní neinitinígi átʼéego Diyin God éí yínanihiniłtin, áko éí bichʼįʼ hadaʼíínółní. Háí aʼáłchíní shı̨́įshąʼ bizhéʼé doo tʼáá hashkée nabinitin da?
8 Azhéʼé danilíinii biyeʼké tʼáá ałtso tʼáá hashkée nideinitin, áko nihí Diyin God doo tʼáá hashkée yínanihinitingóogo doo tʼáá aaníí baʼáłchíní danohłı̨́į da, nidi tʼóó wótashkiʼgi ádanohtʼé.
9 Nihizhéʼé danilíinii tʼáá hashkée nidanihineeztą́ą́ʼ, áko nihił danilı̨́ı̨́ nítʼééʼ. Ákótʼé bąą níłchʼi kʼehgo aTaaʼ nilíinii tsʼídá agháago bikʼeh dahoniilʼı̨́įgo iiná tʼáá aaníinii nihee hólǫ́ǫ doo.
10 Nihizhéʼé dajílíinii tʼóó kónígháníjįʼ tʼáá hó daznízinígi átʼéego tʼáá hashkéego nidanihizneeztą́ą́ʼ, nidi Diyin God diyingo yee átʼéii bił ałtsʼą́ą́ʼ daʼniilkʼiiz doo biniyé tʼáá bí tʼéiyá nihá yáʼátʼéehii biniyé tʼáá hashkée nanihinitin.
11 Tʼáá háiida tʼáá hashkéego nahodiʼnitinígíí bikʼee jishchʼíiʼgo doo baa hoł hózhǫ́ǫ da łeh, nidi binahjįʼ óhojiiłʼą́ą́ʼ ládą́ą́ʼ, wónáasdi tʼáá ákogi ájítʼéego hoł hózhǫ́ǫgo jiináa doo.
Diyin God yee nihaa joozbaʼii bitsʼą́ąjįʼ kódaahneʼ lágo
12 Éí bąą nihigaan tʼóó nihąąh nidahaaznilii áádóó nihigodtaʼ doo daniłdzil da daazlı̨́įʼii bidziilgo ánídaahdleʼ!
13 Áádóó kʼéhézdongo deínóhkáahgo ádaʼdołneʼ, áko naʼnilwodii doo tʼóó tséʼédin ádooníił da, nidi yáʼátʼééh nídadoodleeł.
14 Diné tʼáá ałtso bił kʼé daʼahidohʼníi dooleełígíí, áádóó diyingo dahinohnáa dooleełígíí bidadoołkaal. Tʼáá háiida doo ákójítʼı̨́ı̨́góó éí Bóhólníihii doo yizdoołtséeł da.
15 Áyąądą́ą́ʼ diné tʼáá háiida tʼááká Diyin God bibee ajoobaʼ tʼáadoo shóyoołtʼeeh da lágo, baa dahonohsą́ą leʼ, índa ayiʼ nahodikʼǫǫsh bihétłʼóól nihichʼįʼ hodiyółnáałgo nohłą́ʼí nihółchǫǫh lágo.
16 Łaʼda naʼageh doo yee tsiʼnaagháa da dooleeł, doodaiiʼ Íísa doo hodísin da yę́ęgi átʼéego tʼááká doo ádá dahodíínółzin da yíilaʼ. Jó, éí átsé yizhchíinii jílı̨́įgo bee hóhólníih dooleeł yę́ę tʼááłáhídi oodą́ʼígíí bee haa nahaazniiʼ.
17 Áádóó bikʼijįʼ bee akʼihojidlíii shííʼ nídoodleeł jiniizı̨́įʼgo jichago bíká ájíítʼįįd nidi, tʼáadoo hwííʼ silı̨́įʼ dago nihił béédahózin. Háálá łahgo ánízhdoodlíiłii doo bohónéedzą́ą da.
18 Haʼátʼíhída tsʼíseego baa ákohwiinidzinii doo baa dahisoohkai da. Ízrel dineʼé Dził Sáínai wolyéii yiyaajįʼ eekai yę́ędą́ą́ʼ dził kǫʼ bił shizhóodgo áádóó łid bee chahałheeł, índa tʼóó báhádzidgo níyol,
19 áádóó dilní ayóó íitsʼaʼgo diitsʼaʼ, índa iinééʼ diistsʼą́ąʼgo éí bizaad doo yee hanáádoodzihgóó Ízrel dineʼé nídaʼookąąh,
20 háálá, Azhą́ naaldlooshii nidi dził yitʼáahjįʼ iigháahgo bił nizdoolniił, níigo yee haadzíiʼii doo bídazhneelʼą́ą da.
21 Éí nílʼı̨́įgo tʼóó báhádzidígi átʼéego bikʼee hóyéeʼgo Mózes ání, Tʼáá íiyisí bikʼee shił yéeʼgo shitah hoditłid.
22 Nidi nihí, Dził Záíyan wolyéii, áádóó Diyin God hináanii bikin haalʼáii, éí yáʼąąshdi Jerúsalem hoolyéhígíí baa dahisoohkai. Áadi diyingo nidaalʼaʼí doo jóołtaʼ ánéelą́ąʼ da.
23 Áádóó átsé nidahaazhchíinii yáʼąąshdi bízhiʼ ádaalyaago bił dahózhǫ́ǫgo áłah nilínígíí, áádóó Diyin God éí diné tʼáá ałtso yaa nídóotʼįįłii, índa diné tsʼídá tʼáá ákogi ádaatʼéii biníłchʼi hadaałtʼéii baa dahisoohkai.
24 Áádóó Jesus, bee ahaʼdeetʼáanii ániidíii yee ataʼ sizíinii, índa bidił akʼéstahii éí Éíbel bidił biláahdi átʼéego ílı̨́įgo baa haneʼii baa dahisoohkai.
25 Nihichʼįʼ yáłtiʼii tsʼídá hazhóʼó deísínółtsʼą́ą́ʼ. Háálá nahasdzáán bikáaʼgi Ízrel dineʼé yichʼįʼ yáłtiʼ nítʼéeʼii doo deiniizı̨́ı̨́ʼgóó bąą doo daadzííʼgóogo, jó áko, nihí ałdóʼ yáʼąąshdę́ę́ʼ nihichʼįʼ yáłtiʼii doo daniidzingóó éí tʼah yówehígo doo dadiidzih da!
26 Íídą́ą́ʼ Diyin God haadzíiʼgo nahasdzáán nahaasnááʼ, nidi kʼad kóníigo nihoníʼą́, Nááʼáłdóʼ tsʼídá tʼááłáhídi doo nahasdzáán tʼéiyá da, nidi yádiłhił ałdóʼ nahideeshʼnáałgo dadeeshhał.
27 Díí saad, Tsʼídá tʼáá náánáłáhídi, hodooʼniidígíí, jó, éí nahaasnáʼígíí éí ádaalyaii tʼéiyá nahjįʼ kódoolníiłgo ááhyiłní, doo hidólnááł ádaatʼéhígíí tʼéiyá tʼáá dahólǫ́ǫ doo.
28 Éí bąą haaʼíshąʼ aláahgo bee óhólníihgo bił hazʼáanii niłdzilgo doo hizhdółʼnááł átʼéii nihee dahazlı̨́ʼígíí baa ahééh daniidzin doo, áko haaʼíshąʼ baa hastiʼgo dílzingo baa bił hózhǫ́ǫgo Diyin God bichʼįʼ nidahwiidláa doo,
29 háálá nihiDiyin God éí kǫʼ óʼoołdįįłígi átʼéii nilı̨́.
