Genesis 50:1-26
50 Áko Jóseph hazhéʼé biniiʼ bikʼijįʼ jineeshjoolgo jíícha, áádóó dziztsʼǫs.
2 Áko Jóseph há nidaalʼaʼí azeeʼ ádeiłʼínígíí, Shizhéʼé bikʼídadiʼdoohdis, bizhdííniid. Áko azeeʼ ádeiłʼínígíí Ízrel yikʼídadeezdizgo deisgan;
3 éí dízdiin yiską́ąjįʼ há bihoolyaa, diné daneeznánígíí ákónéelą́ą́ʼ neiłkaʼjįʼ dajiłgan. Áko Ííjip dineʼé haa daachago tsostsʼidiin yiską́.
4 Áádóó haa dajichago yoołkááł yę́ędą́ą́ʼ bighá hooshzhiizhgo Jóseph kóníigo Féro bighandóó nidaakaígíí yichʼįʼ haadzíiʼgo áyidííniid, Kʼad ajoobaʼ bee shichʼohaʼnéego shaa nitsídaahkeesdą́ą́ʼ, tʼáá shǫǫdí, kódadohníigo Féro bichʼįʼ hadadoohdzih,
5 Shizhéʼé kóníigo Diyin God binááł hashiyííłdzííʼ, Shoo, dadeestsaał; Kéínan kéyahdi tʼáá shí ádá tséníʼíígeedgi yóóʼáshidíílííł. Éí bąą kʼad, tʼáá shǫǫdí, shaʼdiʼníʼaahgo ákǫ́ǫ́ deesháałgo áadi shizhéʼé yóóʼádeeshłííł, áádóó índa áádę́ę́ʼ nínáádeeshdááł.
6 Áko Féro ádííniid, Nílááh, ákǫ́ǫ́ dínáahgo nizhéʼé yóóʼánílééh; Diyin God binááł haniyííłdzíʼígíí bikʼehgo ánílééh.
7 Áko Jóseph bizhéʼé yóóʼíidoolííłgóó dah adiiʼeezh; Féro bá nidaalʼaʼí tʼáá ałtso, índa bighandóó hastóí danilíinii, índa Ííjip kéyahdóó hastóí danilíinii tʼáá ałtso bił ákǫ́ǫ́ jíkai.
8 Áádóó Jóseph bighandóó nidaakaígíí tʼáá ałtso, índa bikʼisóó índa bizhéʼé yę́ę bighandóó danilíinii bił jiníná; tʼáá hazhóʼó baʼáłchíní ádaałtsʼísígíí áádóó dabidibé índa dabibéégashii éí tʼáá Góshendi baa ádahayą́.
9 Tsindaabąąs bijáád naakiígíí índa łı̨́ı̨́ʼ bee nidaʼabaahii bił jiníná, áko tʼáá íiyisí tʼóó ahojíyóí.
10 Áádóó Jórdan tooh nílínígíí biláahdi Átad hoolyéego haʼéʼélʼésígi jinínáago ákweʼé tʼáá íiyisí yínííł dajílı̨́įgo yínííł bił tʼáá íiyisí dajíícha; Jóseph bizaad kʼehgo tsostsʼid yiską́ąjįʼ dajicha nítʼééʼ.
11 Áko éí kéyahgi kéédahatʼíinii, Kéínan dineʼé éí Átadgi haʼéʼélʼésígi dajichago dahoołtsą́ągo ádadííniid, Díí Ííjip dineʼé tʼáá íiyisí yínííł danilı̨́ı̨́ lá; éí bąą Jórdan tooh biláahdi Éíbel-mízreiyim hoosyeʼ.
12 Áko hayeʼké tʼáá ádabizhdííniidígi ádahoolaa,
13 háálá hayeʼké Kéínan kéyahgóó dahoníłtı̨́įgo Makpíílah kéyahdi tséníhoodzánígi yóóʼádahoolaa; éí Mámre bichʼįʼgo daahóóʼgo ákwii yóóʼadahoʼdilneʼ doo biniyé Éíbraham éí Het dineʼé Íífran tséníhoodzánígíí kéyah tʼáá yił yaa nayiisniiʼ.
14 Nítʼééʼ hazhéʼé yóóʼádajiilaadóó bikʼijįʼ Jóseph áádóó hakʼisóó índa tʼáá ałtso hazhéʼé yóóʼádajilééhgóó hoł yíkaígíí Ííjip kéyahgóó bił níjíkai.
Jóseph bínaaíké yaa joobaʼgo yichʼįʼ yáłtiʼ
15 Áko Jóseph bikʼisóó dabizhéʼé daaztsą́ągo dayiiłtsą́ągo ádadííniid, Jóseph bichʼįʼ bąąhági ádeiidzaa yę́ę tʼáá ałtso biniinaa daatsʼí nihikʼee didoonihgo kʼéénihididoodlííł.
16 Áko kódajiníigo Jóseph bichʼįʼ haneʼ bił adaʼjisʼaʼ, Nizhéʼé tʼah doo daatsaah yę́ędą́ą́ʼ kóníigo haadzííʼ, dajiníigo
17 Jóseph kódabididoohniił, Tʼáá shǫǫdí, nikʼisóó doo ákǫ́ǫ́ ádáátʼįįdígíí índa bąąhági ádaadzaaígíí bá yóóʼadíʼaah, háálá nichʼįʼ bąąhági ádaadzaa, áko nihí kʼad nídaniikąąh, nizhéʼé biDiyin God bá nidaalʼaʼí bąąhági ádáátʼįįdígíí bá yóóʼadíʼaah. Áko Jóseph bichʼįʼ yádajiłtiʼgo Jóseph yícha.
18 Áko hakʼisóó haa yíkaigo hachʼįʼ daneeshjoolgo ádadííniid, Jóʼakon, ná nidaalteʼ daniidlı̨́.
19 Nidi Jóseph áhodííniid, Tʼáadoo bikʼee nihił daayéʼí. Daʼ shíísh Diyin God hólónígi sézı̨́?
20 Áko nihí tʼéiyá bąąhági átʼéego shichʼįʼ tsídasidookééz nítʼééʼ, nidi Diyin God éí yáʼátʼéehii biniyé yinahazʼą́; diné ląʼí doodzihgo biniyé díí jı̨́ áhootʼéhígi átʼéego áyiilaa.
21 Éí bąą kʼad tʼáadoo bikʼee nihił daayéʼí. Nihí áádóó nihaʼáłchíní bił nihaʼastsoʼ doo. Áko bikʼíhojiłtaʼgo áádóó baa jijoobaʼgo bichʼįʼ yájíłtiʼ.
Jóseph daaztsą́
22 Áádóó Jóseph índa hazhéʼé baʼáłchíní bił Ííjip kéyahgi kéédahojitʼı̨́ı̨́ nítʼééʼ, ákohgo Jóseph tʼááłáhídi neeznádiindóó baʼaan neeznáá honááhai.
23 Áko Jóseph éí Íífreiyim baʼáłchíní áádóó naakidi nánálígíí jiiłtsą́; Manáseh biyeʼ Méíkir wolyéii baʼáłchíní éí Jóseph náhodiyiiłjééʼ.
24 Áko Jóseph bikʼisóó áyidííniid, Dadeestsaał, nidi Diyin God tʼáá aaníí nihaa hodooleełgo díí kéyah biiʼdóó Diyin God tʼáá bí ádee hadoodzíiʼgo Éíbraham áádóó Áízak índa Jéíkab kéyah yeidiníʼánígíí yiih nánihidooʼish.
25 Áko Jóseph éí Ízrel dineʼé hachʼįʼ hadadidoodzihgo hadadidooʼááł biniyé ájíní, Diyin God tʼáá aaníí nihaa hodooleeł, áádóó kodóó shitsʼin nídeínóhjáah doo.
26 Áko Jóseph neeznádiindóó baʼaan neeznáá binááhaigo daaztsą́. Áádóó yikʼídaʼdeezdizgo deisgango Ííjip kéyahgi tsitsʼaaʼ yiih deistı̨́.
