Genesis 43:1-34
43 Áko éí kéyahgi tʼáá íiyisí hodichin.
2 Áko Ííjipdę́ę́ʼ tłʼoh naadą́ą́ʼ nidadziizyı̨́ yę́ę ałtso dajííyą́ąʼgo hazhéʼé ánááhodooʼniid, Náádóhkáahgo chʼiyáán łaʼ nináádahołniih.
3 Áko Júdah áhodííniid, Tʼáadoo naaki nilíní diné nihichʼįʼ haadzíiʼgo ání, Nihitsilí tʼáadoo bił noohkaigóó tʼéiyá doo náádashiidoołtséeł da.
4 Nihitsilí nihitah díníłʼaʼgo tʼéiyá ákóyaa diikahgo chʼiyáán łaʼ nináádahidiilnih.
5 Áko éí doo nihił díníłʼaʼgóó doo ákóyaa náádiikah da, háálá diné ánihiłní, Nihitsilí tʼáadoo bił noohkaigóó tʼéiyá doo náádashiidoołtséeł da.
6 Áádóó Ízrel ádííniid, Haʼátʼíishąʼ biniyé doo shaa dajiinohbaʼgóó, Nihitsilí łaʼ tʼah hólǫ́, dadohníigo diné bił dahołneʼ?
7 Áko ádahodííniid, Nihí índa nihikʼéí yínanihídíłkidgo ání, Nihizhéʼéésh tʼah hiná? Nihitsilíísh łaʼ nááhódlǫ́? Áko tʼáá nanihídíłkidgóó bee bił nídahwiilneʼ nítʼééʼ. Nihitsilí bił nínáánóhkááh nihididooniiłígíishąʼ, haash yitʼéego nihił béédahózin doo?
8 Áko Júdah éí bizhéʼé Ízrel áyidííniid, Nihí áádóó ni lá índa nihaʼáłchíní yázhí tʼáá ałtso doo dadíníiʼnéeł da, nidi dahiniiʼnáa doo biniyé ashkii shił biʼníłnííh, áko dah didiikah.
9 Shí bá naashtłizh doo, áko biniyé nishiníłteeh. Doo bił naa nááníshtʼáázhgóó hoolʼáágóó bíniʼdii shikʼíhátʼáah doo;
10 doo nidaʼáhodiilziidgóó kʼad naakidi nániikai doo nítʼééʼ.
11 Áko hazhéʼé Ízrel áhodííniid, Tʼáá aaníí tʼáá ákótʼéego kódaohnééh; kéyahgi aneestʼąʼ tsʼídá yáʼádaatʼéehii nihiyéél dabiyiʼgo tʼáá nííkʼeh diné bichʼįʼ dadohjááh; éí chʼóh bijeeh áłchʼı̨́ı̨́dígo áádóó tsésʼná bitłʼizh áłchʼı̨́ı̨́dígo áádóó jeeh łikání halchinígíí áádóó tłah ílíinii mir wolyéii áádóó neeshchʼííʼ tʼáá ałʼąą ádaatʼéii índa álman wolyéhígíí bił dadohjááh.
12 Béeso naakidi ákónánéeltʼeʼgo dayínóhjáah doo. Índa béeso éí niheʼazis biih nídahaasʼnil yę́ę éí ałdóʼ nídayínóhjáah doo; doo tʼáá ákónéehgo ádaatʼı̨́į da shaʼshin.
13 Hashtʼeʼádadołnéehgo nihílááh; nihikʼis ałdóʼ bił diné baa nínáánóhkááh.
14 Áko Diyin God Aláahgo Ayóóʼábóodziilii éí diné nihaa aʼááh nízingo íidoolíiłgo nihitsilí łaʼígíí áádóó Bénjamin yił nihichʼįʼ yééʼdoołnih. Áko shaʼáłchíní shighaaʼnilgo éí shı̨́ı̨́ shighaaʼnil doo.
15 Áko ayeʼ ké éí aneestʼąʼ atisgo yáʼádaatʼéhígíí índa béeso naakidi ákónánéeltʼeʼígíí dah dazhdiijaaʼ; Bénjamin ałdóʼ bił dashdiikaigo Ííjip kéyah góyaa anáájookaigo Jóseph bidááhdóó nijíkai.
16 Áko Jóseph éí Bénjamin atah jiiłtsą́ągo hakin yaa áhályáanii ábizhdííniid, Díí diné shighan góneʼ yah aniʼéésh. Áádóó aałkʼee áhóléehgo ałníníʼą́ągo díí diné shił daʼdooyı̨́ı̨́ł.
17 Díí diné éí tʼáá Jóseph áhodííniidígi ádziidzaa; Jóseph bighan góneʼ diné yah ajííʼeezh.
18 Áko Jóseph bighan góneʼ yah ahoʼdootʼeezhígíí biniinaa nídadzisdzíidgo ádazhdííniid, Áłtséédą́ą́ʼ niheʼazis biyiʼ béeso naaznil yę́ę biniinaa lą́ą; nihikʼi hodidooʼááł índa danihiidoołtsołgo binaaʼnil ádanihidoolííł, áádóó nihitélii nihighaidooʼnił biniyé yah anihiʼdootʼeezh ni.
19 Áko Jóseph bikin yaa áhályánígíí yichʼįʼ niikaigo chʼéʼétiingi yichʼįʼ yádaałtiʼ.
20 Áko ádazhdííniid, Shoo, nihinanitʼaʼí, nihí áłtséédą́ą́ʼ chʼiyáán nidahidiilnih biniyé niikai.
21 Áádóó nídaʼnjahgi niikaigo niheʼazis ąą ádeiilyaa nítʼééʼ; tʼááłáʼí niitínígo nihibéeso tʼáá átʼé azis biiʼ naazʼnil lá, áko éí béeso naa nídaniijaaʼ.
22 Chʼiyáán nidahidiilnih biniyé béeso łaʼ náádashiijaaʼ. Háí shı̨́ı̨́ nihibéeso niheʼazis yiih ná yooʼnil lá doo nihił béédahózin da.
23 Áko ádííniid, Nihił dahózhǫ́; tʼáadoo nídaałdzidí; nihiDiyin God índa nihizhéʼé biDiyin God éí béeso niheʼazis yiih yiyíínil; shí nihibéeso nídiinil nítʼééʼ. Áko Símiyan haa néiníłtı̨́.
24 Áko diné éí Jóseph bikin góneʼ yah ayííʼeezhgo tó yeiníką́ągo hakeeʼ táádadzizgiz, áádóó dahatélii yá nidaʼazhjaaʼ.
25 Áko ałníníʼą́ągo Jóseph nádzáago tʼáá jííkʼeh baa dahizhdooníłígíí hashtʼedajiilaa, háálá ákwii dazhʼdooyı̨́įłgo dazdiiztsʼą́ą́ʼ.
26 Áádóó Jóseph nádzáago tʼáá jííkʼeh baa dahizhdooníłígíí bił yah adajiizhjaaʼgo niʼjįʼ bichʼįʼ tséʼyaa dazhneeshjool.
27 Ákohgo ádajítʼéhígíí yínahódééłkidgo áhodííniid, Daʼ hastiin baa dahołneʼígíí nihizhéʼé, éísh yáʼátʼééh? Tʼahásh hiná?
28 Áko ánáádabizhdooʼniid, Nihizhéʼé ná naalʼaʼí doo átʼéhí da, tʼah hiná. Áko bichʼįʼ yaa ánáádadziidzaa.
29 Áádóó bitaadzizghalgo hatsilí Bénjamin hamá biyáázh jiiłtsą́ągo ázhdííniid, Daʼ díísh nihitsilí bee shił dahoołneʼígíí átʼı̨́? Áádóó ábizhdííniid, Shiyeʼ nílíinii, Diyin God naa joobaʼ leʼ.
30 Áko Jóseph hatsilí baa aʼáhí jiniizı̨́įʼgo tsı̨́ı̨́ł dzizlı̨́ı̨́ʼ, áko haaʼída deeshchah jinízingo jintéhí góneʼ yah ajííyáago tʼáá íiyisí atínízhdindleehgo jíícha.
31 Áko haniiʼ táádzízgizgo áádę́ę́ʼ chʼéédzídzá, áko hashtʼéézhdíítʼeʼgo ájíní, Nidaʼayohkaah.
32 Ííjip dineʼé éí Hííbrew dineʼé yił daʼayą́ągo doo deíłdingóó bąą Ííjip dineʼé éí Hííbrew dineʼé doo yił daʼayą́ą da, áko éí biniinaa tʼáá sahdii há niʼíką́, áádóó bikʼis ałdóʼ tʼáá sahdii yá nídaʼiizką́, áádóó ałdóʼ Ííjip dineʼé hoł nídaʼadı̨́ı̨́hígíí tʼáá sahdii yá nídaʼiizką́.
33 Áko hadáahgi tʼáá nidahoʼdiizhchínígi átʼéego dah deidineesbin, áko diné ałchʼįʼ yikʼee tʼóó bił adahayóí.
34 Áko chʼiyáán hadááhdóó hachʼįʼgo dadeeską́, nidi Bénjamin éí hó ádanéeltʼeʼígíí ashdladi ákónánéeltʼeʼgo baʼíką́. Áádóó doodlı̨́įłii dajoodlą́ąʼgo bił hoł dahózhǫ́.
