Genesis 32:1-32
32 Áádóó Jéíkab dah náázhdiiʼnáago joonééł nítʼééʼ; Diyin God bidiyingo nidaalʼaʼí hadááh yíkai,
2 áko Jéíkab yiyiiłtsą́ągo ádííniid, Dííyeeʼ Diyin God bitsʼą́ą́dóó dah oonéełii átʼéé lá! Áko ákweʼé Meihanéíyim* hoolyée doo, jidííniid.
3 Áko Jéíkab éí Síyer nahósʼaʼjįʼ tʼáá éí kéyah Íídam hoolyéejįʼ hánaaí Íísa bichʼįʼ haneʼ nideiʼáhí alą́ąjįʼ adziisʼaʼ.
4 Haneʼ nideiʼáhí ábizhdííniid, Shinanitʼaʼí Íísa kódabididoohniił, Ná naalʼaʼí Jéíkab kóní, Léíban bił tádíshnééh nítʼééʼ, índa ákweʼé sédáago kojįʼ ahoolzhiizh,
5 áko béégashii áádóó télii áádóó dibé áádóó diné nidaalʼaʼí índa asdzání nidaalʼaʼí shee hólǫ́, áko ajoobaʼ bee shichʼohaʼnéego shąąh tsídookos biniyé shinanitʼaʼí bił hodoonihgo iʼííłʼaʼ.
6 Áko haneʼ nideiʼáhí nátʼą́ą́ʼ Jéíkab yaa nákaigo ádaaní, Nínaaí Íísa baa niikai, áko bí ałdóʼ áádę́ę́ʼ diné dı̨́įdi neeznádiingo yił nidáahjįʼ deeskai.
7 Ákohgo Jéíkab ayóó átʼéego nídzísdzíidgo ádił nisidzídzá, áko diné bił joonéłígíí áádóó dibé áádóó béégashii índa ghą́ą́ʼaskʼidii naakijįʼ ałtsʼádadziznilgo
8 ázhdííniid, Íísa tʼááłáʼí dah oonééł neistseedgo łaʼígíí éí dadoodzih.
9 Áko Jéíkab ádííniid, Shizhéʼé Éíbraham biDiyin God nílíinii, shizhéʼé Áízak biDiyin God nílíinii Bóhólníihii, shą́ą́ʼ áshidiní, Nikéyahgóó nikʼéí bichʼįʼ nídídááh, áko yáʼátʼéehgo naa nitsískees doo,
10 bee aʼááh nínízinii áádóó nitʼáá aaníinii tʼáá átʼé kóníshéhí nidi ná naalʼaʼí nishłíinii bił bééhosínísįįdígíí nádı̨́ʼídi doo bą́ą́h anishłı̨́į da, háálá shigish tʼéiyá hólǫ́ǫgo díí Jórdan tooh tséʼnaa niníyá, áko kʼad yishtʼínígíí naakigo dah oonééł silı̨́ı̨́ʼ.
11 Nánooshkąąh, shínaaí Íísa bitsʼą́ąjįʼ yisdáshíłteeh, háálá binásdzid; shaa doogáałgo shidiyoołhééł, índa amá danilíinii baʼáłchíní tʼáá yił ałdóʼ neidoołtsił.
12 Áádóó ádííníniid niʼ, Tʼáá aaníí nikʼijishdlíi doo, índa naʼáłchíní náás daʼahílchíihii tónteel bibąąhgi séiigi átʼéego doo wóoltaʼ ánéelą́ąʼ da dooleeł.
13 Áko éí bitłʼééʼ tʼáá ákǫ́ǫ́ hwiiską́, áádóó tʼáá ákǫ́ǫ́ bił dah joonéłígíí hánaaí Íísa baazhdooniłígíí bá atsʼázhnínil;
14 tłʼízí dabiʼádígíí naakidi neeznádiingo áádóó tłʼízíkąʼ naadiingo áádóó dibé dabiʼádígíí naakidi neeznádiingo índa deenástsʼaaʼ naadiingo,
15 ghą́ą́ʼaskʼidiitsaʼii tádiingo dabiyázhí tʼáá bił, béégashii dabiʼádígíí dízdiingo, dóola neeznáá áádóó téliitsaʼii naadiingo índa dabiyázhí ałdóʼ neeznáá bóóltąʼgo bá atsʼázhnínil.
16 Áko tʼáá daʼałʼąą dah naazhjaaʼgo há nidaalʼaʼí bá atsʼáʼdziiznil, áádóó há nidaalʼaʼí ábizhdííniid, Shilą́ąjįʼ tséʼnaa nihohnééh; nihitaʼ honíʼą́ągo danóołkaad.
17 Alą́ąjįʼígíí ábizhdííniid, Shínaaí Íísa nidááh níyáago áádóó nanídééłkidgo, Háishąʼ bííʼ nílı̨́? Háágóoshąʼ díníyá? índa, Díí nííłkałígíishąʼ háí bí? nidííniidgo
18 kódidííniił, Ná naalʼaʼí Jéíkab bí; shinanitʼaʼí Íísa yeínííł, áádóó ałdóʼ tʼáá bí nihikéédę́ę́ʼ yinééł.
19 Naaki góneʼígíí áádóó nááʼákéédę́ʼígíí áádóó tʼáá ałtso ałkééʼ daʼnéełkaadígíí ałdóʼ ákódabizhdidooniił, Íísa bidááh noohkaigo kótʼéego bił nidahodoołnih,
20 áádóó ánáádadidoohʼniił, Ná naalʼaʼí Jéíkab ałdóʼ nihikéédę́ę́ʼ yinééł. Háálá ání, Haa deeshniłígíí shilą́ąjįʼ yikahgo binahjįʼ shichʼįʼ kʼénízdínóodzįįł, áádóó bikʼijįʼ índa náhwiideestsééł, áko daatsʼí kʼénáshididooʼniił.
21 Ákohgo aazhdooléłígíí halą́ąjįʼ danéelkaad; hó éí oonéłígíí tʼáá ákweʼé bił dahwiiską́.
Jéíkab éí Piináíyeldi diné léiʼ yił naʼahíneestą́ą́ʼ
22 Tʼáá éí bitłʼééʼ nízhdiiʼnaʼgo hweʼasdzą́ą́ tʼáá áłah dashdiiʼeezh, índa asdzání á naalʼaʼí tʼáá áłah índa hayeʼké łaʼtsʼáadahígíí ałdóʼ, áádóó tooh Jábak haʼnaa nideetiin gónaa haʼnaa nijíkai.
23 Dah yidiiʼeezhgo tó nílínígíí tséʼnaa ajiisʼaʼ áádóó jitʼínígíí tʼáá ałtso tséʼnaa ájiilaa.
24 Áko Jéíkab tʼáá sáhí jiidaʼ, áko ákweʼé hayííłką́ąjįʼ diné léiʼ hoł naʼahíneeztą́ą́ʼ.
25 Áko diné doo hakʼeh dódleʼ átʼéégóó bił bééhoozingo hakʼaiʼ hooldzisígi yideelchid, áko bił naʼahízhnítaahgo Jéíkab hakʼaiʼ hááwod.
26 Áko áháłní, Shidíchííd, háálá hayííłką́. Nidi ábijiní, Shikʼijiisínídliʼgo índa nidideeshchił.
27 Áko ánááhodiʼní, Haashąʼ yinílyé? Jéíkab yinishyé, bijiní.
28 Áko áháłní, Jéíkab doo náánéinílyée da doo, nidi Ízrel* yinílyée doo, háálá naatʼáanii tʼáá akéʼégoígíí nahalingo Diyin God bichʼįʼ nidziil; diné ałdóʼ bichʼįʼ nidziil, áko bíniʼ bá áhwiinilaa.
29 Áko Jéíkab nahódééłkidgo ání, Nízhiʼ bee shił hólneʼ, tʼáá shǫǫdí. Áko áháłní, Haʼátʼíishąʼ biniyé shízhiʼ bínaʼídíłkid? Áádóó ákweʼé hakʼijisdliʼ.
30 Áko Jéíkab ákweʼé Piináíyel* hoolyée doo jidííniidgo ájíní, Diyin God bił ahiistsą́, nidi tʼah hinishná.
31 Áko Piinúwel bitis jííyáago hwee haʼííʼą́, áko hakʼaiʼ hááwodgo adíznéesxod.
32 Áko Ízrel dineʼé díí jı̨́ı̨́góó akʼaiʼ hooldzisígi atsʼidígíí doo deiyą́ą da, háálá Jéíkab bikʼaiʼ hooldzisígi atsʼid bizhdeelchidgo ahaneheetah.
Footnotes
^ Méíhanéíyim jiníigo éí Hííbrew kʼehjígo naakigo dah oonééł jiníigo óolyé.
^ Ízrel jiníigo éí Hííbrew kʼehjígo Diyin God yił naʼahínítaah jinínígi átʼéego nahalin.
^ Piináíyel jiníigo éí Hííbrew kʼehjígo Diyin God biniiʼ jinínígi átʼéego nahalin.
