Genesis 27:1-46
27 Ákódzaago Áízak hadzistihgo doo ajooʼı̨́į da dzizlı̨́ı̨́ʼ, áko hayeʼ alą́ąjįʼ nilínígíí Íísa hágo bizhdííniidgo ábijiní, Shiyeʼ! Áko áhodííniid, Jó, kǫ́ǫ́ naashá.
2 Áko ájíní, Shoo, kʼad hasistih. Hahgoshı̨́ı̨́ dadeestsaał éí doo shił bééhózin da.
3 Éí bąą tʼáá shǫǫdí, kʼad nibee naʼazheehí éí nikʼaayééł índa neʼełtı̨́ı̨́ʼ bił dah diijáahgo halgaigóó dínááh; áádę́ę́ʼ bįįh bitsįʼ shá niníyeeh,
4 áádóó atsįʼ shił yáʼátʼéhígi átʼéego shá hashtʼedíílíiłgo shaa dííkááł, áko adeeshghał, índa tʼah doo daastsaahdą́ą́ʼ nikʼijiideeshdliił.
5 Áko Áízak hayeʼ Íísa bichʼįʼ yájíłtiʼgo Rebékah hodiiztsʼą́ą́ʼ. Áádóó Íísa halgaidę́ę́ʼ bįįh nizhdooyééł biniyé ákǫ́ǫ́ ajoolzheeʼ.
6 Rebékah hayáázh Jéíkab bichʼįʼ hadzoodzíiʼgo ábijiní, Shoo, nizhéʼé éí nínaaí yichʼįʼ yáłtiʼgo disétsʼą́ąʼgo ání,
7 Bįįh bitsįʼ shá nidííyéełgo yáʼátʼéehgo shá hashtʼedíílííł, áko adeeshghał, áádóó tʼah doo daastsaahdą́ą́ʼ Bóhólníihii binááł nikʼijiideeshdliił.
8 Éí bąą shiyáázh kʼad bee nichʼįʼ haasdzíʼígíí bikʼeh honíłʼįįh.
9 Dibé naakaigóó dínáahgo áádę́ę́ʼ tłʼízí yázhí yáʼátʼéhígíí naakigo náníjááh, áko nizhéʼé éí atsįʼ tʼáá bił łikanígi átʼéego bá hashtʼedeeshłííł.
10 Índa nizhéʼé baa dííkáałgo adoolghał, áádóó tʼah doo daatsaahdą́ą́ʼ nikʼijiidoodliił.
11 Áko Jéíkab éí bimá Rebékah áyidííniid, Shoo, Íísa shínaaí éí diné ditłʼoii nilı̨́; shí éí diné dilkǫǫhii nishłı̨́.
12 Shizhéʼé shídidoolnih, áko shizhdileeh lá nízingo hóyéeʼgo shá hadoodzih; éí tʼáá shí áshtʼı̨́įgo doo shikʼihozhdoodliił da.
13 Áko hamá áháłní, Shiyáázh, hóyéeʼgo haʼdoodzihígíí shígo shikʼijįʼ dooleeł; ándííniidígíí bikʼeh honíłʼįįhgo níláhdę́ę́ʼ shá náníjááh.
14 Áádóó dashdiiyáago áádę́ę́ʼ hamá bá názhníjaaʼ, áko hamá éí hazhéʼé atsįʼ bił łikanígi átʼéego hashtʼeyiilaa.
15 Áádóó Rebékah hayáázh alą́ąjįʼ nilínígíí Íísa biʼééʼ yáʼátʼéhígíí wóneʼdę́ę́ʼ nízhdiinilgo hayáázh akéédę́ę́ʼ nilínígíí Jéíkab bee hazhdiilaa.
16 Tłʼízí yázhí bikágí Jéíkab bílaʼ áádóó bizénágháán gónaa ałdóʼ bikʼídzístiʼ.
17 Áádóó atsįʼ ayóó áhálniihgo hashtʼejiilaii índa łeesʼáán biłgo hayáázh Jéíkab bílákʼejííką́.
18 Áko hazhéʼé baazhníyáago ázhdííniid, Shizhéʼé! Áko áhodííniid, Kǫ́ǫ́ sétı̨́; háishąʼ ánítʼı̨́, shiyeʼ?
19 Áko Jéíkab bizhéʼé áyidííniid, Íísa áshtʼı̨́, alą́ąjįʼ ná yizhchínígíí; áshidííníniidígíí biʼiishłaa; tʼáá shǫǫdí nídiiʼnéehgo nídaah; shibįįh bitsįʼ nilghał, áko shikʼijídliih.
20 Áko Áízak hayeʼ ábizhdííniid, Haaléitʼéego tʼáadoo hodinaʼí bikʼííníyá, shiyeʼ? Áko ájíní, Bóhólníihii niDiyin God shíká aalwodgo bikʼíníyá.
21 Áko Áízak éí Jéíkab áyidííniid, Wóshdę́ę́ʼ, shíighahgi ninínááh, áko nídideeshnih; tʼáá daatsʼí aaníí shiyeʼ Íísa ánítʼı̨́, dooda daatsʼí.
22 Áko Jéíkab hazhéʼé Áízak bíighah nizhníyáago hódeesniiʼgo ání, Bizhí laʼ éí Jéíkab bizhí; bílaʼ éí Íísa bílaʼ.
23 Áko hánaaí Íísa bílaʼ nahalingo hálaʼ ditłʼogo biniinaa tʼáadoo hwéédiʼnítą́ą da, áko tʼóó hakʼidzisdliʼ.
24 Áádóó ázhdííniid, Daʼ tʼáásh aaníí shiyeʼ Íísa ánítʼı̨́? Áko ání, Shí lá éí áshtʼı̨́ ni.
25 Áádóó ájíní, Shíighah niníkaahgo shiyeʼ bibįįh bitsįʼ deeshghał, áko nikʼiijiideeshdliił. Áko hwíighah niiníką́ągo ajoolghal, índa wáin ałdóʼ hainíką́ągo joodlą́ą́ʼ.
26 Áádóó hazhéʼé Áízak áhodííniid, Hágo shiyeʼ, shíighah ninínáahgo shiitsʼǫs.
27 Áko bíighah nizhníyáago jiztsʼǫs, áádóó haʼééʼ halchinígíí yishchą́ą́ʼ, áko hakʼijisdliʼgo áháłní,
Shoo, shiyeʼ halchinígíí éí Bóhólníihii kéyah yikʼijidlíhígi átʼéego halchin!
28 Éí bąą Diyin God éí yádiłhił biyiʼdę́ę́ʼdahtooʼ índa kéyah bikááʼtʼáá íiyisí nidaʼntʼą́ʼígíí áádóótłʼoh naadą́ą́ʼ índa wáin ląʼígoneididooʼááł.
29 Áko bíniʼ diné ná nidaalʼaʼ; ałʼąą dineʼé nichʼįʼ yaa áńdaatʼįįh leʼ.Nikʼisóó nídahółníih doo; nimá baʼáłchíní nichʼįʼ yaa áńdaatʼįįh doo.Hóyéeʼgo ná hadahadziihígíí éí ałdóʼ hóyéeʼgo bá hadaʼiidziih doo;nikʼidajidlíhígíí éí bikʼidahojidlíi dooleeł!
30 Áádóó ákódzaago Áízak éí ałtso Jéíkab bikʼijiijisdliʼ, áádóó Jéíkab hazhéʼé Áízak bitsʼą́ą́ʼ tʼóó chʼéédzídzáhígo hánaaí Íísa naashzheeʼdę́ę́ʼ nádzá.
31 Áko hó ałdóʼ hazhéʼé bá atsįʼ ayóó áhálniihígíí bá hashtʼejiilaago baazhníką́ągo hazhéʼé ábizhdííniid, Nídiiʼnééh shizhéʼé, niyeʼ bibįįh bitsįʼ nilghał, áko shikʼiizhdíídliił.
32 Áko hazhéʼé Áízak áháłní, Háí lá ánítʼı̨́įgo ádíní? Áko Íísa ání, Niyeʼ alą́ąjįʼ ná yizhchínígíí Íísa áshtʼı̨́.
33 Áko Áízak tʼáá íiyisí hatah hoditłidgo ájíní, Háí lá tʼah doo nánídááh yę́ędą́ą́ʼ bįįh bitsįʼ sheiníką́ągo eeshghalgo bikʼijiisisdliʼ lá? Áko éí tʼáá aaníí bikʼihojidlíi doo.
34 Ákohgo Íísa éí hazhéʼé bizaad jidiiztsʼą́ąʼgo tʼáá íiyisí yéego bąą hániʼgo hajííchah, áko hazhéʼé ábijiní, Shizhéʼé nílíinii, tʼáá shǫǫdí shí ałdóʼ shikʼijiinídliih.
35 Áádóó ání, Nitsilí shiʼdeezloʼgo bee nikʼihojidlíi dooleeł yę́ę nighaideetʼą́.
36 Áko ánáázhdooʼniid, Daʼ doósh tʼáá hweełtʼéego Jéíkab* joolyée da? Jóʼakon, kʼad naakidi shitsáskʼeh shighahozhdeetʼą́; átséédą́ą́ʼ alą́ąjįʼ yizhchíinii bee bóhólníihii shighazhdeetʼą́, áádóó jóʼakon kʼad nááná bee akʼihojidlíii shighanáázhdeetʼą́. Áádóó ázhdííniid, Daʼ bee akʼihojidlíiísh tʼáadoo łaʼ shá áásínísįįd da?
37 Áko Áízak éí Íísa ánéidooʼniid, Jóʼakon, bóhoníłníihii áshłaa, áádóó bikʼisóó tʼáá ałtso bá nidaalteʼ dooleełgo baa diníʼą́, áádóó tłʼoh naadą́ą́ʼ índa wáin bił baa diníʼą́; kʼadshąʼ haʼátʼíí íiyisí ná baa nideeshaał, shiyeʼ?
38 Áko Íísa hazhéʼé ánáábizhdooʼniid, Daʼ tʼááshłáʼí nibee akʼihojidlíhí nítʼééʼ, shizhéʼé? Tʼáá shǫǫdí shizhéʼé, shí ałdóʼ shikʼijiinídliih. Áko Íísa yéego hajííchah.
39 Hazhéʼé Áízak hachʼįʼ hanáánáádzíiʼgo áháłní,
Jóʼakon, kéyah bikááʼ nidaʼntʼąʼígíí bitsʼáhoníʼą́ądiáádóó yádiłhiłdę́ę́ʼ dahtooʼ bitsʼáhoníʼą́ądi kééhótʼı̨́į doo.
40 Nidiltłish bee hinínáa doo, áádóó nitsilí bóhwííníłníih doo;ííshją́ą́ biyaa háíníyáago doo bóhwííníłníih da dííleeł.
Áízak éí Héírangóó Jéíkab ayííłʼaʼ
41 Éí bąą Íísa tʼáá íiyisí Jéíkab bikʼeezdeeznih, háálá hazhéʼé bee akʼihojidlíii yee yikʼidzisdliʼ, áko Íísa tʼáá biyiʼídi ání, Shizhéʼé baa dazhdoochahjįʼ áhání hadziih; áadi índa Jéíkab shitsilí hodiyeeshxééł.
42 Áko Rebékah hayáázh alą́ąjįʼ nilínígíí bizaad bee hoł hóoneʼgo hayáázh akéédę́ę́ʼ nilínígíí bíká iʼjííłʼaʼgo hágo bizhdííniidgo ábijiní, Shoo, nínaaí Íísa kótʼéego naa nitsékees lá; hodiyeeshxééł nízingo yee haʼólníí lá.
43 Éí bąą shiyáázh, kʼad ándishnínígíí bikʼeh honíłʼįįh; ashtʼeʼádílnéehgo Héírangóó shínaaí Léíban bichʼįʼ tsı̨́įłgo ákǫ́ǫ́ dínááh;
44 áadi díkwíida niidoołkááł; nínaaí bá náhoojǫǫdgo índa;
45 nínaaí nichʼįʼ bá náhoojǫǫdgo áádóó íínítʼįįdii yaa yooznahgo índa níká adeeshʼaał, áko áádę́ę́ʼ nídíídááł. Haʼátʼéegoshąʼ tʼáá ánółah tʼáá łaʼóo jı̨́ shąąh dínóohnééł?
46 Áko Rebékah éí Áízak áyidííniid, Het dineʼé bitsiʼké biniinaa hinishnánígíí séʼįįd, áko Het dineʼé bitsiʼké łaʼ díí kéyahgi kéédahatʼínígíí Jéíkab beʼasdzą́ą́ silı̨́įʼgo tʼáadoo biniyéhígóó hinishnáa doo.
Footnotes
^ Jéíkab jiníigo éí Hííbrew kʼehjígo anaʼadloʼ jinínígi átʼéego nahalin.
