Deuteronomy 11:1-32
11 Éí bąą Bóhólníihii nihiDiyin God ayóóʼádeínóhʼní; éí yichʼįʼ nihííłʼaadii áádóó yee nihwiizʼáanii áádóó yee nihodiiʼaahii índa bibikʼeh óʼooʼníiłii tʼáá áłahjįʼ bikʼeh dahonołʼı̨́.
2 Díí jı̨́ díí nihił béédahoozįįh; jó, nihaʼáłchíní doo bił béédahózinígíí doo bichʼįʼ yáshtiʼ da; jó, Bóhólníihii nihiDiyin God tʼáá hashkée naʼnitinígíí áádóó yee ayóó átʼéii áádóó bílaʼ ayóó ábóodziilii índa bigaan bitsʼáhoníyéeʼii doo dayiiłtsą́ą da.
3 Áádóó álílee ádaatʼéii áádóó áhooníiłii Ííjip dineʼé bitahgi aláahgo naatʼáanii Féro wolyéii áádóó bikéyah tʼáá átʼéé nítʼééʼ áyííłʼįįdígíí,
4 áádóó Ííjip dineʼé bisiláo áádóó dabilı̨́ı̨́ʼ yee nidaabaahii índa bitsindaabąąs bijáád naakiígíí yee nidaabaahii yee nihikééʼ yinéełgo Tónteel Łichííʼ haʼnaa ninoonáago nihikéédę́ę́ʼ íínáago bikʼijįʼ Bóhólníihii nilíinii tó ahínéideeskʼołgo áhásdįįdgo díí jı̨́įdi doo łaʼ nijigháa da.
5 Áádóó honoojíidi wohnéełgo kweʼé noohkaijįʼ ánihííłʼįįdii,
6 índa Iiláíyab éí Rúben dineʼé náás ahoolchíiłii nilı̨́įgo biyeʼké nidiltʼé Déíthan áádóó Abáíram wolyéii bichʼįʼ nahasdzáán ąą áhoodzaago, baʼáłchíní áádóó biníbaal índa tʼáadoo leʼé bee hólóonii tʼáá bił, Ízrel dineʼé tʼáá ałtso binááł nahasdzáán abííłnaʼgo éí nihaʼáłchíní doo dayiiłtsą́ą́góó doo bił béédahózin da.
7 Nidi nihí ayóó ádaatʼéii Bóhólníihii áyoolíłígíí tʼáá ałtso danóołʼı̨́ı̨́ʼ.
Kéyah aa deetʼánígíí biiʼ bee akʼihojidlíii
8 Éí bąą bikʼeh óʼooʼníiłii tʼáá átʼé díí jı̨́ nihichʼįʼ bee haasdzíʼígíí bikʼeh dahonołʼı̨́, áko éí bee danihidziil doo, índa kéyah ííʼ dooleełii bichʼįʼ disoonánígíí biih wohnéehgo ádííʼ ádaahłééh,
9 áádóó éí kéyah biyiʼ asʼahgóó anihídayiiłkaah doo; éí danihizhéʼé yę́ę índa badaʼáłchíní náás daʼahílchíihii yeididooʼáałgo Bóhólníihii yee ádee hadoodzííʼ; éí kéyahgi abeʼ áádóó tsésʼná bitłʼizh bee ádaʼazįįd.
10 Jó, kéyah danihííʼ dooleeł biniyé bichʼįʼ disoonánígíí; éí Ííjip kéyahgi hazʼánídę́ę́ʼ chʼínoonánígíí doo bił ahehoołtʼée da; áadi kʼéédaʼdohdlééh yę́ędą́ą́ʼ nihikeeʼ bee tó háádahohłohgo ninádaʼnołhęshgo chʼil bił daʼadáanii ayóogo nídahadleehgi átʼéego ádahwíínóhsin nítʼééʼ,
11 nidi kéyah danihííʼ dooleeł biniyé bichʼįʼ disoonánígíí éí deílkʼidgóó áádóó deíldzisgóó nahałtinígíí tʼéí bee nínáháltłoh.
12 Bóhólníihii nihiDiyin God éí kéyah yaa áhályą́. Yihahígíí ałtso náhahjįʼ Bóhólníihii nihiDiyin God áłahjįʼ kéyah yikʼi déezʼı̨́ı̨́ʼ.
13 Áádóó kótʼée dooleeł: bikʼeh óʼooʼníiłii díí jı̨́ nihichʼįʼ bee haasdzíʼígíí haleebee deísínółtsʼą́ąʼgo, áko Bóhólníihii nihiDiyin God ayóóʼádeínóhníigo nihijéí tʼáá átʼé bee áádóó nihiiʼ sizíinii tʼáá átʼé bee bá nidaałʼaʼgo,
14 baa náhwiilzhíishgo nihikéyahgi nihidahałtı̨́įhgo áádóó akéeʼdi ninádaháłtı̨́hígíí nihá ánéishʼįįh doo, áko nihitłʼoh naadą́ą́ʼ áádóó nihiwáin ániidíii índa áliv tsin naazkaadii bineestʼąʼ bikʼah hééł áńdaołʼįįh doo.
15 Nihikéyah bikááʼgóó nihinaaldlooshii bá chʼil nidaniseʼgo ánéishʼįįh doo, áko daʼohsą́ągo hwiih danohłı̨́į doo.
16 Tʼáá nihí ádaa dahonohsą́ągo nihijéí doo bidaʼdoodloh da; éí doodago łahjigo nídasooyizgo diyin dabidiʼníinii bá nihídadidoołʼaałgo bichʼįʼ nidahohłáa doo.
17 Éí biniinaa Bóhólníihii hashké nídzingo bikʼeʼíyéeʼgo nihikʼijįʼ nilı̨́į dooleeł, áádóó yótʼááhdę́ę́ʼ nahałtinígíí áidoosįįł, áádóó nihikédaayah doo bikááʼ nidaʼnitʼąʼgóó íidoolííł, índa Bóhólníihii nilíinii kéyah yáʼátʼéehii nihaidiníʼáanii bikáaʼgi tʼahaaʼgo ałtso ádoohdįįł.
18 Éí bąą díí shizaadígíí nihijéí biiʼ índa nihiiʼ sizíinii biiʼ hazhóʼó hashtʼeʼnidahidohnííł, áádóó díí saad bee ééhózinii átʼéego nihílaʼ índa nihinátaʼgi bídahaastłʼǫ́.
19 Áádóó éí saadígíí bee nihaʼáłchíní nidanohtin, áádóó nihighan góneʼ bił nidahisóotą́ągo éí baa yádaałtiʼ, áádóó bił tádadohkááhgóó áádóó danohjeehgo índa nídahidoohjeehgo bee bichʼįʼ yádaałtiʼ.
20 Áádóó nihikin bichʼéʼétiin bá siláii índa yah adaʼiiztiingi dáńʼdítı̨́hí bikáaʼgi bee akʼedaʼashchı̨́įgo ádaahłeʼ doo.
21 Áko nihí áádóó nihadaʼáłchíní ałdóʼ asʼahgóó nihídeidéeską́; Bóhólníihii nilíinii danihizhéʼé yę́ę kéyah yeididooʼáałgo yichʼįʼ yee ádee hadoodzííʼ; nahasdzáán bikʼigi yádiłhił asʼahgóó abíyííłkánígi átʼéego nihídayéełkaah doo.
22 Jó, díí bikʼeh óʼooʼníiłii bee nihichʼįʼ haasdzíʼígíí haleebee bikʼeh dahonołʼı̨́įgo, éí Bóhólníihii nihiDiyin God ayóóʼádeínóhʼníigo, áádóó bikʼehgo deínóhkáahgo, índa bąąh dashoojéeʼgo.
23 Áko Bóhólníihii díí ałʼąą dineʼé tʼáá ałtso nihilą́ąjįʼ chʼíiniiłkaad doo áádóó ałʼąą dineʼé nihiláahgo ayóó ádaatʼéii áádóó nihiláahgo ayóó ádabóodziilii daabíhígíí danihííʼ doo.
24 Tʼáá ałtsogóó kéyah bikááʼ deínóhkáhígíí nihííʼ dooleeł; éí honoojíídóó Lébanan hoolyéejįʼ índa tooh Yufréítiiz hoolyéédóó tónteel siyíníjįʼ nihá hoodzo doo.
25 Diné doo łaʼ nihichʼįʼ woozįįh átʼée da doo, háálá Bóhólníihii nihiDiyin God éí kéyah bikááʼ tʼáá ałtsogóó deínóhkáahgi nihikʼee hóyéeʼgo índa nihikʼeʼíyéeʼgo ánihidoolííł; jó, ákótʼéego Bóhólníihii nihichʼįʼ yee haadzíiʼ niʼ.
26 Shoo, díí jı̨́ nihidáahgi akʼihojidlíii índa hóyéeʼgo á haʼdoodzihii hólǫ́ǫgo áshłaa.
27 Jó, nihikʼidahojidlí, Bóhólníihii nihiDiyin God bibikʼeh óʼooʼníiłii bikʼeh dahonołʼı̨́įgo tʼéiyá; éí díí jı̨́ nihichʼįʼ bee haasdziih.
28 Áádóó hóyéeʼgo nihá haʼoodzííʼ; Bóhólníihii nihiDiyin God bibikʼeh óʼooʼníiłii doo bikʼeh dahonołʼı̨́ı̨́góogo tʼéiyá, nidi díí jı̨́ nihichʼįʼ bee haasdziihii tʼóó bitsʼáhisoohkaigo, diyin dabidiʼníinii doo béédahonohsinígíí bikééʼ yóóʼahisoohkaigo hóyéeʼgo nihá haʼdoodzih.
29 Áko kótʼée doo: Bóhólníihii nihiDiyin God éí kéyah nihííʼ dooleełjįʼ anihííʼeezhgo Dził Gérazim hoolyéii bighą́ą́ʼdóó akʼihojidlíii baa dahołneʼ doo índa Dził Ííbal hoolyéii bighą́ą́ʼdóó hóyéeʼgo á haʼiidziih baa dahołneʼ doo.
30 Éí Jórdan tooh wónaanídi sinil; bitaʼgi yíldzisgo ináʼátʼáhíjigo, Kéínan dineʼé kéédahatʼínígóó Gílgal kin shijaaʼígíí binaashiijí Móreh hoolyéegi chéchʼil sikaadígíí tʼáá áyídígi sinil.
31 Áko Bóhólníihii nihiDiyin God éí kéyah danihííʼ dooleełgo nihaidiníʼánígíí bichʼįʼ Jórdan tooh haʼnaa nidoohnééł, áádóó ádííʼ ádadoohłííł, índa ákwii kéédahohtʼı̨́į doo.
32 Áko yee nihwiizʼáanii índa yee nihodiiʼaahii tʼáá átʼé bikʼeh dahonołʼı̨́įgo ádaa daahsįįh; éí díí jı̨́ nihidááhgóó ninílá.
