Acts 3:1-26
3 Łah yaa adeezʼą́ągo* sohodizin baa hoolzhiizhgo Peter áádóó John éí kin biiʼ sohodizin bił hazʼą́ą́ góde jooʼash.
2 Nítʼééʼ diné léiʼ, tʼáá biʼdizhchı̨́ı̨́dę́ę́ʼ naaljı̨́ı̨́d nilı̨́įgo tʼáá ákwíí jı̨́ kin biiʼ sohodizin bił hazʼą́ągi diné yah ahikáhígíí béeso bíjókeed biniyé dáádílkał Ayóóʼánóolnin* hoolyéegi ninábiʼdiltééh.
3 Áko Peter áádóó John kʼadę́ę kin biiʼ sohodizin bił hazʼą́ą́ góneʼ yah iiʼaashgo jiiłtsą́ągo, bíʼjííkeed.
4 Áko Peter áádóó John yéego honíłʼı̨́įgo áháłní, Nihiníníłʼı̨́.
5 Áko jiníłʼı̨́įgo tʼáadoo leʼé sheidoolééł jiniizı̨́ı̨́ʼ.
6 Nítʼééʼ Peter áhodííniid, Béésh łigaii índa óola shee ádin, nidi tʼáá shee hólónígíí naa nishłé; Názarethdóó Jesus Christ bízhiʼ bee, [nídiiʼnéehgo] dah diinááh.
7 Áko bílaʼ nishʼnáájí jiiłtsoodgo nízdiidzı̨́ı̨́z, nítʼééʼ tʼahaaʼgo bikeeʼ áádóó bikétsíín niłdzil silı̨́ı̨́ʼ.
8 Ákohgo náhidiitahgo yiizįʼgo dah diiyá, dah náníljı̨́įhgo yigááł, índa Diyin God yaa haniihgo kin biiʼ sohodizin bił hazʼą́ą́ góneʼ bił yah ajookai.
9 Áko joogáałgo Diyin God baa hojiniihgo diné tʼáá ałtso dahoołtsą́,
10 áádóó kin biiʼ sohodizin bił hazʼą́ągi dáádílkał Ayóóʼánóolnin hoolyéegi azhdókeedgo dzizdáá nítʼéʼígíí ájítʼı̨́įgo bił béédahoozin, índa ákóhoʼdiilyaaígíí bąą tʼóó bił daahaada áádóó tʼóó bił adahayóí.
Sálaman bichahaʼoh hoolyéegi Peter yáłtiʼ
11 Áádóó diné naaljı̨́ı̨́d nilı̨́įgo náábiʼdiilzáhígíí Peter índa John yąąh dah sitı̨́įgo, diné tʼáá ałtso tʼáá íiyisí tʼóó bił daahaadago, kin biiʼ sohodizin bił hazʼą́ągi Sálaman bichahaʼoh* hoolyéejįʼ ahaneheezhjéeʼgo haa áłah silı̨́ı̨́ʼ.
12 Áko Peter éí yiyiiłtsą́ągo diné yichʼįʼ haadzíiʼgo ání, Ízrel dineʼé danohłíinii, haʼátʼíishąʼ biniyé díí bikʼee tʼóó nihił adahayóí? Haʼátʼíishąʼ biniyé tʼáá hó habee adziilii bee, éí doodaléiʼ hozdísinígíí bee, diné naagháago ájiilaa danihíínóhʼníigo ayóogo danihinółʼı̨́?
13 Éíbraham biDiyin God, tʼáá éí Áízak índa Jéíkab biDiyin God, danihizhéʼé yę́ę biDiyin God, éí bá Naalʼaʼí* Jesus ayóó átʼéii nilı̨́įgo áyiilaa, éí nidahosoolóóz, áádóó Páílat hwéédideeshchił niizı̨́įʼgo, tʼáá binááł doo nihízhdéétʼiʼgóó há hadasoohdzííʼ.
14 Nidi Tsʼídá Tʼáá Ákogi Ájítʼéii Diyin Jílíinii doo nihízhdéétʼiʼgóó há hadasoohdzíiʼgo diné yiyiisxíiniida nihaa nídooltéełgo dayínóokeed,
15 áádóó iiná Hayííłtʼiʼii dasoołhı̨́įgo daaztsą́ą́dę́ę́ʼ Diyin God náábidiisá. Díí nihí éí dabíínáałii daniidlı̨́.
16 Áko díí diné danółʼínígíí áádóó béédahonohsinígíí Jesus bízhiʼ bee adziilii bee bidziilgo ánábiʼdiilyaa, áko tʼáá ánółtso nihinááł Jesus woodlą́ągo baa dzódlíhígíí bee díí diné doo bąąh tééhgóó ánábiʼdiilyaa.
17 Áko kʼad shikʼisóó, nihinanitʼaʼí doo bił béédahózingóó ádáátʼįįdígi átʼéego, nihí ałdóʼ doo nihił béédahózingóó ádaotʼįįdgo shił bééhózin.
18 Nidi Christ tiʼhwiidoonihgo, Diyin God yá dahalneʼii tʼáá ałtso tʼáá átséedi yaa dahoolneʼígíí, tʼáá ákótʼéego yiʼiilaa.
19 Éí bąą nihibąąhági ádaatʼéii nihá kʼéédaʼdoolchǫǫł biniyé łahgo átʼéego tsíńdahidohkeesgo Diyin God bichʼįʼ dah nídahidoohkááh, áko Bóhólníihii bitsʼą́ą́dóó bee ákʼééhwiitáadii nihee náhoodleeł doo.
20 Áádóó Christ bee nihił hóóneʼii* nihaidoołʼaał, éí Jesus nilı̨́,
21 éí ałkʼidą́ą́ʼ Diyin God yá dahalneʼii dadiyinii yaa dahoolneʼígi átʼéego, tʼáá ałtsoní hashtʼéédooʼnííł baa hoolzhiizhjįʼ yáʼąąshdi hólǫ́ǫ doo.
22 Mózes tʼáá aaníígóó [danihizhéʼé yę́ę] áyidííniid,
Bóhólníihii Diyin God shiisįʼígi átʼéego nihikʼisóó bitahdę́ę́ʼ bá halneʼí łaʼ yiidoosįįł.Éí nihichʼįʼ yee hahidoodzihii tʼáá átʼé dadidoohtsʼı̨́įłgo bikʼehgo ádanohtʼée doo.
23 Áko Diyin God yá halneʼii doo dajíistsʼą́ʼígíí tʼáá ádzíłtso Ízrel dineʼé bitsʼáhizhdookahgo ádahodiʼdooldįįł.
24 Tʼáá aaníí Sámuel hiná yę́ędą́ą́ʼ áádóó wóshdę́ę́ʼ, Diyin God yá dahalneʼii danilı̨́įgo hadahaasdzíiʼii tʼáá ałtso, díí jı̨́ı̨́góó ááníłígíí tʼáá bítséedi yaa dahoolneʼ.
25 Nihí Diyin God yá dahalneʼii baʼáłchíní danohłı̨́, áko Diyin God éí Éíbraham áyidííniid, Nahasdzáán bikáaʼgi nitsʼą́ą́dóó yichíiłii bee ałʼąą dineʼé tʼáá ałtso bikʼihozhdoodliił, yiłníigo danihizhéʼé yę́ę bee ahaʼdeetʼáanii yee yił hashtʼeyiilaii, ałdóʼ baʼáłchíní danohłı̨́.
26 Diyin God éí bá naalʼaʼí [Jesus] néidiisáago, áko tʼááłáʼí nootínígo nihibąąhági átʼéii átsʼádahidotʼaahgo ánihidoolíiłgo yee nihikʼijidlíi dooleeł.
Footnotes
^ Tááʼgóó oolkiłgo sohodizin néitʼaah nítʼééʼ, háálá ákóneʼ sodizin bá hooghan góneʼ nááʼiiniih bá náhootʼaah nítʼééʼ.
^ Dáńʼdítı̨́hí Ayóóʼánóolnin wolyéhígíí éí sodizin bá hooghan haaʼaʼaahdę́ęʼgo yah aʼatiin nítʼééʼ.
^ Sálaman bichahaʼoh éí kin biiʼ sohodizin bidáahjigo chahaʼoh béédiníʼánígíí óolyé. Ákweʼé diné tʼóó ahayóí áłah danilı̨́į łeh nítʼééʼ.
^ Éí doodago kótʼé, biYeʼ.
^ Éí doodago kótʼé, nihá nibiʼdeeltíinii.
