1 Peter 1:1-25
1 Shí Peter, Jesus Christ yá yilʼaadii nishłíinii. Pántas, Galéíshiya, Kapadóshiya, Éízha, índa Bithíniyagóoda tabidiʼnooskaadgo áadi déʼéyóní danilı̨́įgo kéédahatʼíinii bichʼįʼ naaltsoos áshłééh.
2 Tʼáá átséedi Diyin God aTaaʼ nilíinii nihá yinahazʼą́ągo, Níłchʼi Diyinii bee diyingo ádanihiʼdiilyaago Jesus Christ bikʼeh dahonołʼı̨́į doo, áádóó bidił nihikʼídadooltahgo nihibąąhági átʼéii nihąąh ádingo íidoolííł biniyé atah nihiizlááʼ.
Bibee ajoobaʼ índa bibee achʼįʼ hózhǫ́ náhásdlı̨́įʼii kʼeeʼąą yileełgo yee nihikʼijidlíi doo.
Ił chohooʼı̨́ doo ninítʼiʼii
3 NihiBóhólníihii Jesus Christ biDiyin God, tʼáá éí biTaaʼ nilíinii baa dahwiiʼniih leʼ! Éí ayóó átʼéego nihaa aʼááh niizı̨́įʼgo ił chohooʼı̨́ doo ninítʼiʼii nihee hodooleeł biniyé Jesus Christ daaztsą́ą́dę́ę́ʼ néidiisáhígíí bee náádanihiʼdizhchı̨́.
4 Áko nihííʼ dadooleełii doo diłdzidii, doo yichxǫǫhii, índa doo łahgo ánáoʼneʼ átʼéii yáʼąąshdi nihá hashtʼeʼniilyáhígíí nihaa doolyéełgo bíká nihił chodahooʼı̨́,
5 nihí niheʼoodląʼ binahjįʼ Diyin God bibee adziilii bee nihaa ádahayą́ągo yisdánihidooʼnilgo niiníłką́ądi yitʼíní ánihidiʼdoolníiłgo hashtʼenihiʼdólzin.
6 Azhą́ kʼad tʼóó kónígháníjįʼ ałʼąą átʼéego bee nanihídahonitaahígíí bikʼee yínííł ádanohtʼée nidi, éí nihił chodahooʼínígíí tʼáá íiyisí baa nihił dahózhǫ́ǫ leʼ.
7 Niheʼoodląʼ daatsʼí bee nihidahoníłdzilgo bééhodoozįįł biniyé nanihídahonitaah. Óola éí doo hoolʼáágóó hólǫ́ǫ da, nidi niheʼoodląʼ hoolʼáágóó hólǫ́. Jó, kǫʼ bee óola bąąh hadoolyı̨́ʼígíí biláhídi átʼéego niheʼoodląʼ nabóhonitaahgo ílı̨́įgo bééhodoozįįł. Áko Jesus Christ yáʼąąshdę́ę́ʼ yitʼíní íʼdiilyaago niheʼoodląʼ baa hodooʼnih áádóó ił nilı̨́į doo, índa ayóó átʼéii bidiʼníi doo.
8 Tʼah doo dahoołtséeh da nidi ayóóʼádahwíínóhʼní; azhą́ kʼad doo dahoohʼı̨́į da nidi dahwiinohdlą́ągo haa dadzíínóhłíigo nihił dahózhǫ́. Tʼáá íiyisí ił hózhóonii doo baa yájóołtiʼ átʼéii bee nihił nidahoozhǫǫh!
9 Háálá niheʼoodląʼ łaʼyiyiilaaígíí binahjįʼ nihiiʼ sizíinii yisdáʼiildééh shódayoostʼeʼ.
10 Diyin God bá dahojilneʼii díí yisdáʼiildéhígíí hazhóʼó bíndaʼízhdééłkidgo nidadziskááʼ, áádóó Diyin God bibee ajoobaʼ yee nihikʼizhdoodliiłígíí neeʼniʼjįʼ baa dahojoolneʼ.
11 Christ tiʼhwiidoonihígíí áádóó bikʼijįʼ ayóó átʼéii dooleełígíí tʼáá átséedi Christ biNíłchʼi Diyinii hwiiʼ dahólónígíí éí hoł éédahoosįįd, áko, Hahgo lá índa haaʼí lá hoolzhishgo áhodoonííł lá, dajiníigo nidadziskááʼ.
12 Yáʼąąshdę́ę́ʼ Níłchʼi Diyinii hadaalʼaʼígíí bibee adziilii bee haneʼ yáʼátʼéehii yaa dahalneʼii díí yee nihił dahoolneʼ. Éidí diyingo nidaalʼaʼí nidi hoł béédahoozı̨́ı̨́ʼ laanaa chʼééh danízin. Diyin God yá dahalneʼii díí tʼáá bítséedi yaa dahalneʼgo doo tʼáá bí ádá ádáátʼįįd da, nidi nihí nihá nidaalʼaʼgo Diyin God bił ííshją́ą́ áyiilaa.
Diyingo iinánígíí bee dahinohná, haʼní
13 Áko hashtʼeʼnitsídanohkees, ádaa ádahołyą́, áádóó Jesus Christ yitʼíní íʼdiilyaadi Diyin God bibee ajoobaʼ yee nihikʼizhdoodliiłígíí nideínóhłíigo bíká nihił chodahooʼı̨́į leʼ.
14 Áłchíní akʼeh hółʼínígi átʼéego Diyin God bikʼeh dahonołʼı̨́. Jesus tʼah doo béédahonohsįįh yę́ędą́ą́ʼ nihił adáádahaníí nítʼéeʼii tʼáadoo bikʼehgo dahinohnání.
15 Nidi Diyin God nihíká ádííniidígíí diyin nilínígi átʼéego nihí ałdóʼ tʼáá ałtsojįʼ diyingo dahinohnáa doo.
16 Háálá Diyin God bizaad bee akʼeʼashchíinii kóní, Dadinohyin, háálá shí dinishyin.
17 Diyin God éí, aTaaʼ nílíinii, dabidohníigo, nahasdzáán bikáaʼgi tʼah dahinohnáago dahodíínóhsingo bá dahinohná. Diyin God doo ałʼohgo aa nitsíkeesii éí tʼááłáʼí jinítínígo ádajíítʼįįdii bikʼehgo haa nídóotʼįįł.
18 Háálá nihił béédahózingo danihizhéʼé yę́ę biʼéʼélʼįʼ tʼáadoo nánídlínígóó yee nidanihineestą́ʼígíí bitsʼą́ąjįʼ náádanihiʼdiizniiʼ. Tʼáadoo leʼé áádįįłii, béésh łigaii, doodaiiʼ óolada éí doo bee náádanihiʼdiizniiʼ da,
19 nidi dibé yázhí hadaałtʼéii, doo bąąh dahazʼáaniigi átʼéii, Christ bidił ílíinii bee náádanihiʼdiizniiʼ.
20 Éí nahasdzáán tʼah doo álnééhdą́ą́ʼ Diyin God hakʼi diilniiʼ, áádóó nihoolzhíísh tʼah doo baa yíłkaahgóó nihá yitʼíní áhoʼdiilyaa.
21 Honiitʼaa Diyin God baa dadzíínóhłí, éí dadziztsą́ą́dę́ę́ʼ nááhodiisá áádóó ayóó átʼéii áhoolaa. Áko Diyin God deisoohdląądgo biniiłtʼaa nihił chodahoozʼįįd.
22 Saad tʼáá aaníinii bikʼeh dahonołʼínígíí bee nihiiʼ sizíinii bąąhági átʼéii bąąh ádingo ádanihiʼdiilyaa, áádóó Níłchʼi Diyinii bee nihikʼisóó danilíinii tʼáá aaníí ayóóʼádeínóhʼní dasoolı̨́ı̨́ʼ. Áyąądą́ą́ʼ tsʼídá haleebee ayóóʼádaʼahíínóhʼníi leʼ.
23 Háálá náádanihiʼdizhchı̨́, álástsiiʼ diłdzidii bee éí dooda, nidi doo diłdzidii, éí Diyin God bizaad hináanii, doo bá nihonítʼiʼii bee náádanihiʼdizhchı̨́.
24 Háálá nihokááʼ dineʼé tʼáá ádzíłtso chʼilgi ádajítʼé,áádóó bee ayóó ádajítʼéii chʼilátah hózhóonii nidahalin.Chʼil dahiniiłnééh, áádóó chʼilátah hózhóonii nidahindéeh łeh.
25 Nidi Bóhólníihii bizaad éí hoolʼáágóó hólǫ́.
Éí saadígíí haneʼ yáʼátʼéehii átʼéego bee nidanihidiʼneestą́ą́ʼ.
