Jesu ke Hlogo ya phuthego ya Bokriste. (Baefeso 5:​23) Gona bjale o hlahla phuthego a le legodimong, a diriša “mohlanka yo a botegago le wa temogo.” (Bala Mateo 24:​45.) Jesu Kriste ke yena a kgethilego mohlanka yoo, e bile o mo file maikarabelo a go dira diphetho tše itšego. Eupša mohlanka yoo, o swanetše go dula a ekwa Kriste le go hlankela bana babo Kriste, e lego Bakriste bao ba tloditšwego. Bjale mohlanka yo ke mang? Le gona o re hlokomela bjang?

1. “Mohlanka yo a botegago le wa temogo” ke mang?

Ga e sa le go tloga kgale, Jehofa o be diriša monna goba sehlopha se senyenyane sa banna go hlahla batho ba gagwe. (Maleaki 2:7; Baheberu 1:1) Ka morago ga lehu la Jesu, baapostola le bagolo bao ba bego ba le Jerusalema ba ile ba etelela pele batho ba Jehofa. (Ditiro 15:2) Ka mo go swanago, batho ba Jehofa lehono ba etelelwa pele ke sehlopha se senyenyane sa bagolo, e lego Sehlopha se Bušago sa Dihlatse tša Jehofa. Sehlopha se, se re fa dilo tšeo di re thušago gore re be le segwera se sebotse le Jehofa, e bile se hlahla mošomo wa go bolela ditaba tše dibotse. Sehlopha se, ke sona ‘mohlanka yo a botegago le wa temogo yo a kgethilwego ke Jesu.’ (Mateo 24:​45a) Banna ba ka moka bao ba lego go Sehlopha se Bušago, ke Bakriste bao ba tloditšwego ka moya o mokgethwa. Ba fela pelo ya go yo buša le Kriste ge ba tla be ba tsošeditšwe legodimong.

2. Mohlanka yo a botegago le wa temogo o re hlokomela bjang?

Jesu o ile a re mohlanka yo a botegago o tlo ‘nea Bakriste dijo tša bona ka nako e swanetšego.’ (Mateo 24:​45b) Go no swana le ge dijo di re thuša gore re dule re phetše gabotse mmeleng, le dijo tša moya, e lego ditaelo tšeo re di hwetšago ka Lentšung la Modimo, di re thuša gore re dule re na le segwera se sebotse le Jehofa, le go dira mošomo wo Jesu Kriste a re neilego wona. (1 Timotheo 4:6) Re hwetša dijo tšeo tša moya dibokeng, dikopanong, dikgatišong tša rena, le go dibidio tšeo di re thušago go tseba gore Jehofa o nyaka re dira eng gore re be le segwera se sebotse le yena.

 ITHUTE KA MO GO TSENELETŠEGO

3. Batho ba Jehofa ba swanetše go dira dilo ka thulaganyo

Sehlopha se Bušago ke sona se rulaganyago mošomo wa Dihlatse tša Jehofa se hlahlwa ke Jesu. Jesu o be a hlahla sehlopha se bušago sa nakong ya Bakriste ba pele, go no swana le ge a hlahla Sehlopha se Bušago lehono. Bapalang BIDIO ye.

Balang 1 Bakorinthe 14:​33, 40, gomme le boledišaneng ka potšišo e latelago:

• Ditemana tše di bontšha bjang gore Jehofa o nyaka batho ba gagwe ba dira dilo ka thulaganyo?

4. Mohlanka yo a botegago ke yena a rulaganyago mošomo wa rena

Mošomo wa go bolela ditaba tše dibotse o be o le bohlokwa kudu go Bakriste ba pele, e bile ba be ba o dira. Balang Ditiro 8:​14, 25, gomme le boledišaneng ka dipotšišo tše di latelago:

• Ke mang yo a bego a efa Bakriste ba pele ditaelo tša go bolela ditaba tše dibotse?

• Petro le Johane ba ile ba dira’ng ge baapostola ba bangwe ba be ba ba nea ditaelo tša mabapi le go bolela ditaba tše dibotse?

Mošomo wa go bolela ditaba tše dibotse o bohlokwa kudu e bile o rulaganywa ke Sehlopha se Bušago. Bapalang BIDIO ye.

 Jesu o ile a bolela kamoo mošomo wa go bolela ditaba tše dibotse o lego bohlokwa kudu ka gona. Balang Mareka 13:​10, gomme le boledišaneng ka dipotšišo tše di latelago:

• Ke ka baka la’ng mošomo wa go bolela ditaba tše dibotse o le bohlokwa kudu go Sehlopha se Bušago?

• Ke ka baka la’ng re hloka “mohlanka yo a botegago le wa temogo” gore e be yena a rulaganyago mošomo wo wa lefaseng ka moka?

5. Mohlanka yo a botegago ke yena a re hlahlago

Sehlopha se Bušago se hlahla Dihlatse tša Jehofa lefaseng ka moka. Sehlopha se se kgetha bjang ditaelo tšeo se re fago tšona? E le gore re tsebe karabo, a re thomeng ka go kwa gore sehlopha se bušago sa mehleng ya Bakriste ba pele sona se be se thušwa ke eng go kgetha ditaelo. Balang Ditiro 15:​1, 2, gomme le boledišaneng ka dipotšišo tše di latelago:

• Ke taba efe yeo Bakriste ba pele ba ilego ba ngangišana ka yona?

• Paulo, Baranaba, le ba bangwe, ba ile ba kgopela thušo go bomang?

Balang Ditiro 15:​12-18, 23-29, gomme le boledišaneng ka potšišo e latelago:

• Pele sehlopha se bušago se dira phetho, se ile sa dira’ng gore se tsebe gore Modimo o nyaka se dira phetho efe?​—Bona ditemana 12, 15, le 28.

Balang Ditiro 15:​30, 31 le 16:​4, 5, gomme le boledišaneng ka dipotšišo tše di latelago:

• Bakriste ba pele ba ile ba ikwa bjang ge ba se no kwa ditaelo tšeo di tšwago go sehlopha se bušago?

• Jehofa o ile a ba šegofatša bjang ka ge ba ile ba kwa sehlopha seo?

Balang 2 Timotheo 3:​16 le Jakobo 1:​5, gomme le boledišaneng ka potšišo e latelago:

• Lehono Sehlopha se Bušago se nyaka tlhahlo kae ge se dira diphetho?

 O ITHUTILE ENG?

Sehlopha se Bušago ke “mohlanka yo a botegago le wa temogo” yo a kgethilwego ke Kriste. Se hlahla Dihlatse tša Jehofa lefaseng ka moka, e bile se re nea dijo tša moya.

Dipotšišo

• Ke mang yo a kgethilego “mohlanka yo a botegago le wa temogo”?

• Sehlopha se Bušago se re hlokomela bjang?

• Na o a dumela gore Sehlopha se Bušago ke “mohlanka yo a botegago le wa temogo”?