GE KE sa le lesogana, ke ile ka gakantšhwa ke lehloyo leo le bego le dutše le le gona bodumeding. Le gona ke be ke sa kwešiše lebaka leo ka lona Modimo a sa fedišego bodiidi le go hloka toka goba lebaka leo madumedi a mantši a sa phelego ka seo Beibele e se bolelago. Ka gona ke ile ka ba moilamodimo, ke ipotša gore borabele bja bopolotiki ke bjona feela bo ka lokišago lefase.

Ka 1962, ke ile ka thoma go bala makasine wa Phafoga! Ke moka ka 1963, ka dumela go ithuta Beibele le Dihlatse tša Jehofa. Seo ke ithutilego sona se nkgomile kudu. Ke ile ka lemoga gore ga se ra swanela go bea Modimo molato ka baka la ditiro tše sehlogo tša dihlopha tše dintši tša bodumedi ka ge a rerile go direla batho dilo tše dibotse. Dikgwedi tše pedi ka morago ga thuto ya ka ya mathomo, ke ile ka thoma  go botša ba bangwe gore Mmušo wa Modimo o tla fediša tshepedišo ye e kgopo. Ke kolobeditšwe ka 1964 gomme ka kgethwa go ba mmulamadibogo yo a kgethegilego ka 1966. Ke dumela gore therešo e phološitše bophelo bja ka ka gobane bontši bja bao e bego e le badirišanigotee le nna ba bafsa ba ile ba hwa ga sehlogo, ba golegwa goba ba swanelwa ke go tšhaba nageng ye. Ke leboga gore Jehofa o ile a fetoša nna yo ke bego ke le moilamodimo yo a se nago kholofelo gore ke be mohlanka wa Modimo yo a re holofetšago lefase le lefsa la toka.