Mmadi yo a Rategago:

Na o ikwa o le kgaufsi le Modimo? Go ba bantši, seo se bonala se tloga se sa kgonege. Ba bangwe ba boifa gore o kgole kudu; ba bangwe ba ikwa ba sa swanelege wa go hloka kholofelo gore ba ka batamela kgaufsi le Modimo. Lega go le bjalo, Beibele ka lerato e re kgothaletša gore: “Batamêlang Modimo, le Yêna a Le batamêlê.” (Jakobo 4:8) O bile o kgonthišetša barapedi ba gagwe gore: “Nna, Jehofa, Modimo wa gago; yo ke go swerego ka letsogo la gago le letona, ke re go wena: O se boife ke Nna thušo ya gago!”—Jesaya 41:13, PK.

Re ka katanela bjang go ba le tswalano e bjalo ya kgaufsi le Modimo? Segwera se sengwe le se sengwe seo re se dirago, tlemo ya sona e thewa go tsebeng motho, go kgahlweng le go tšeeleng godimo dika tša gagwe tša moswana-noši. Ka gona, dika le ditsela tša Modimo bjalo ka ge di utollwa ka Beibeleng, ke taba ya bohlokwa yeo e ka ithutwago. Go naganišiša ka tsela yeo ka yona Jehofa a bonagatšago dika tša gagwe, go bona kamoo Jesu Kriste a di bonagaditšego gabotse ka gona gotee le go kwešiša kamoo le rena re ka di hlagolelago, go tla re batametša kgaufsi le Modimo. Re tla bona gore Jehofa ke Mmuši yo a swanetšego le yo a phethagetšego wa legohle. Go feta moo, ke Tate yoo ka moka ga rena re mo nyakago. Ka ge e le yo matla, yo a nago le toka, yo bohlale le yo lerato, le ka mohla ga a lahle bana ba gagwe ba botegago.

Eka puku ye e ka go thuša go batamela kgaufsi kudu le Jehofa Modimo, go aga tlemo le yena yeo le ka mohla e ka se kego ya kgaoga, e le gore o ka phelela go mo tumiša ka mo go sa felego.