Babadi ba Rena ba a Botšiša

Na Dihlatse tša Jehofa Di Dumela Gore ke Tšona Feela di Tlago go Phološwa?

Dihlatse tša Jehofa di dumela gore di hweditše bodumedi bja therešo. Ge e ba di be di sa nagane bjalo, di be di tla fetoša ditumelo tša tšona. Go etša ditho tša madumedi a mantši, Dihlatse tša Jehofa di holofela gore di tla phološwa. Lega go le bjalo, di dumela gape gore ga se boikarabelo bja tšona go ahlola gore ke mang yo a tlago go phološwa. Mafelelong, Modimo ke yena Moahlodi. Ke yena a dirago phetho.—Jesaya 33:22.

Lentšu la Modimo le utolla gore bao ba tlago go phološwa ga se ba swanela go nyaka go phološwa feela, eupša gape ba swanetše go šomišana gotee le Mophološi. Ka mohlala: A re re motho yo a namelago dithaba o a timela lešokeng. A le tlalelong, o tsoma tsela ya go tšwa. Na o tla hwela moo goba o tla phologa? Mafelelo a ithekgile ka tsela yeo a arabelago ka yona thušong yeo a e newago. A ka gana thušo ya mophološi wa gagwe ka boikgantšho. Ka lehlakoreng le lengwe, a ka amogela thušo ka boikokobetšo gomme a phologa.

Ka mo go swanago, bao ba šomišanago gotee le Mophološi wa batho, Jehofa Modimo, ke bona ba tlago go phologa. Phološo ke mpho e tšwago go Modimo, lega go le bjalo, ga se batho ka moka bao ba tlago go e hwetša. Morwa wa Modimo e lego Jesu o itše: “Ga se yo mongwe le yo mongwe yo a rego go nna, ‘Morena, Morena,’ a tlago go tsena mmušong wa magodimo, eupša go tla tsena yo a dirago thato ya Tate yo a lego magodimong.”—Mateo 7:21.

Dihlatse tša Jehofa di dumela gore Modimo o phološa feela bao ba bontšhago tumelo sehlabelong sa Jesu sa topollo gomme ba latela dithuto tša Jesu kgaufsi-ufsi. (Ditiro 4:10-12) Ela hloko dinyakwa tše tharo tša bohlokwa tša phološo tšeo di utollotšwego ka Lentšung la Modimo.

(1) Jesu o boditše bagwera ba gagwe gore: “Bohle ba tla tseba ka se gore le barutiwa ba-ka, ge e ba le ratana.” (Johane 13:35) Mohlala wa Jesu ka boyena wa go gafa bophelo bja gagwe legatong la ba bangwe o gateletše bohlokwa bja lerato. Bao ba ratago ba bangwe ba bontšha seka seo se nyakegago bakeng sa phološo.

(2) Ge a rapela Tatagwe, Jesu o itše: “Ke ba tsebišitše leina la gago.” (Johane 17:26) Jesu o be a tseba kamoo leina la Modimo, Jehofa, le lego bohlokwa ka gona go Tatagwe. Jesu o ile a rapelela gore leina la Tatagwe “le kgethagatšwe.” (Mateo 6:9) Go kgethagatša leina la Modimo go akaretša go le tseba le go le swara e le la bohlokwa le le lekgethwa. Go etša Jesu, bao ba tsomago go phološwa ba swanetše go diriša leina la Modimo. Le gona, ba swanetše go ruta ba bangwe ka leina la Modimo le dika tša gagwe. (Mateo 28:19, 20) Ge e le gabotse, ke feela bao ba bitšago leina la Modimo bao ba tlago go phološwa.—Baroma 10:13.

(3) Jesu o boditše Pontio Pilato gore: “Mmušo wa-ka ga se karolo ya lefase le.” (Johane 18:36) Ke batho ba sego kae lehono bao ba bontšhago tumelo Mmušong wa Modimo, goba pušo, woo Kgoši ya wona e lego Jesu. Go e na le moo, ba bantši ba bota mekgatlo ya batho. Ka mo go fapanego, bao ba tlago go phološwa ba thekga Mmušo wa Modimo ka potego gomme ba ruta ba bangwe kamoo o tlago go lokolla batho ba botegago.—Mateo 4:17.

Ka morago ga go ithuta tše dingwe tša dinyakwa tša phološo, barutiwa ba Jesu ba itše: “Ke mang yo go ka kgonegago gore a phološwe?” Jesu o arabile ka gore: “Dilo tše di sa kgonegego go batho, di a kgonega go Modimo.” (Luka 18:18-30) Dihlatse tša Jehofa di leka ka matla go fihlelela dinyakwa tše tša phološo. Le gona, di šoma ka thata go thuša ba bangwe gore ba phološwe.