1. Ke’ng seo batho ba bangwe ba se naganago ka batho bao ba rapelago Modimo?

BATHO ba bantši lehono ba a dumela gore madumedi a magolo, ao e lego a Bokriste le ao e sego a Bokriste, ga a hole batho ka selo. Ba bangwe ba a dumela gore madumedi a bjalo ga a emele Modimo gabotse ka dithuto tša ona le ka boitshwaro bja balatedi ba ona, ka go re’alo Modimo a ka se a amogele. Lega go le bjalo, ba dumela gore madumeding ka moka go na le batho bao ba ratago Modimo e le ka kgonthe le gore Modimo o a ba bona e bile o ba lebelela e le barapedi ba gagwe ba mo lefaseng. Ga ba bone bohlokwa bja gore batho ba bjalo ba tšwe madumeding ao a maaka gomme ba rapele Modimo ba le gotee. Eupša na ye ke tsela yeo Modimo a naganago ka yona? Anke re hwetšeng karabo ka go ahlaahla e nngwe ya histori yeo e lego ka Mangwalong ya barapedi ba Jehofa ba therešo.

2. Ke bomang bao Jehofa a ilego a kgetha gore e be batho ba gagwe ge nako e dutše e eya, gona ke’ng seo se bego se ba hlaola gare ga batho ba bangwe? (Bona seswantšho se se lego ka mo godimo.)

² Nywaga e ka bago e 4 000 e fetilego, Jehofa o ile a kgetha batho  ba itšego gore e be setšhaba sa gagwe mo lefaseng. Aborahama, yo a bitšwago “tatago bohle bao ba nago le tumelo,” e be e le hlogo ya lapa leo le bego le na le ditho tše makgolo. (Baroma 4:11; Gen. 14:14) Babuši ba Kanana ba be ba mo tšea e le “kgošana ya Modimo” gomme ba mo hlompha. (Gen. 21:22; 23:6) Jehofa o ile a dira kgwerano le Aborahama le ditlogolo tša gagwe. (Gen. 17:1, 2, 19) Modimo o ile a botša Aborahama gore: “Kgwerano ya ka yeo le tlago go e boloka yeo ke e dirilego le lena gaešita le peu ya lena ya mehleng e tlago še: Yo mongwe le yo mongwe wa lena yo motona a bolle. . . . Seo e be leswao la kgwerano yeo ke e dirilego le lena.” (Gen. 17:10, 11) E le go latela taelo ye, Aborahama le ba batona ka moka ba lapeng la gagwe ba ile ba bolotšwa. (Gen. 17:24-27) Lebollo e be e le leswao leo le bego le hlaola ditlogolo tša Aborahama e le batho ba nnoši bao Jehofa a dirilego kgwerano le bona.

3. Go tlile bjang gore ditlogolo tša Aborahama e be setšhaba?

³ Setlogolo sa Aborahama e lego Jakobo, goba Isiraele, o be a na le barwa ba 12. (Gen. 35:10, 22b-26) Ge nako e dutše e eya, barwa ba e be e tla ba dihlogo tša malapa a meloko e 12 ya Isiraele. (Dit. 7:8) Ka baka la tlala, Jakobo le lapa la gagwe ba ile ba hudugela Egipita, moo Farao a bego a beile yo mongwe wa barwa ba Jakobo e lego Josefa gore a okamele dijo le go mo hlatlama mmušong. (Gen. 41:39-41; 42:6) Ditlogolo tša Jakobo di ile tša ata kudu, ya ba “meraforafo.”—Gen. 48:4; bala Ditiro 7:17.

4. Mathomong Baegipita ba be ba na le tswalano efe le ditlogolo tša Jakobo?

⁴ Ditlogolo tša Jakobo di ile tša dula Egipita nywaga ya ka godimo ga e makgolo a mabedi, seleteng sa noka ya Nile seo se bitšwago Goshene. (Gen. 45:9, 10) Go bonagala eka mo e nyakilego go ba seripagare sa nako yeo, ba be ba phela ka khutšo le Baegipita, ba dula metseng e menyenyane gomme ba diša mehlape ya bona ya dihuswane le ya dikgomo. Farao o ile a ba amogela gabotse ka ge a be a tseba Josefa e bile a mo rata. (Gen. 47:1-6) Ge e le Baegipita bona, ba be ba šišimišwa ke badiši ba dinku. (Gen. 46:31-34) Lega go le bjalo, ba ile ba swanelwa ke go fo phedišana le Baisiraele.

5, 6. (a) Boemo bja batho ba Modimo bo ile bja fetoga bjang kua Egipita? (b) Moshe o ile a phološwa bjang lehung, gona ke’ng seo Jehofa a ilego a se direla batho ba Gagwe ka moka?

⁵ Eupša maemo a batho ba Modimo a be a tlo fetoga kudu. “Ge nako e dutše e eya nageng ya Egipita gwa tsoga kgoši e mpsha yeo e bego e sa tsebe Josefa. Ya bolela le setšhaba sa yona ya re: ‘Bonang! Setšhaba sa bana ba Isiraele ke se sentšintši e bile se re feta ka matla.’ Ka gona Baegipita ba šomiša bana ba Isiraele bjalo ka makgoba ba ba gateletše. Ba ba šulafaletša bophelo ka mošomo o thata wa bokgoba wa go duba leraga le go dira ditena le go ba šomiša mošomo o mongwe le o mongwe wa bokgoba nageng, ee, ba ba šomiša mošomo o mongwe le o mongwe wa bona wa bokgoba ba ba gateletše.”—Ek. 1:8, 9, 13, 14.

⁶ Farao yo o ile a ba a laela gore bana ka moka ba bašemane ba Baheberu ba bolawe ka morago ga gore ba belegwe. (Ek. 1:15, 16) Moshe o belegwe ka yona nako yeo. Ge a be a na le dikgwedi tše tharo, mmagwe o ile a mo uta gare ga mahlakanoka a noka ya Nile, moo morwedi wa Farao a ilego a mo hwetša gona. Ka morago o ile a mo tšea ya ba ngwana wa gagwe. Se se kgahlišago ke gore ge Moshe e be e sa le yo monyenyane o ile a godišwa ke mmagwe yo a botegago e lego Jogobede, ke moka a ba mohlanka yo a botegago wa Jehofa. (Ek. 2:1-10; Baheb. 11:23-25) Jehofa o ile a bona tsela yeo batho ba gagwe ba bego ba tlaišega ka yona kua Egipita gomme a phetha ka gore a diriše Moshe go ba lokolla bathong bao ba bego ba ba gateletše. (Ek. 2:24, 25; 3:9, 10) Ka go re’alo e be e tla ba  batho bao ba ‘lokolotšwego’ ke Jehofa.—Ek. 15:13; bala Doiteronomio 15:15.

7, 8. Go tlile bjang gore batho ba Jehofa e be setšhaba se sekgethwa?

⁷ Gaešita le ge Jehofa a be a se a tšwa a rulaganya Baisiraele gore e be setšhaba, o be a ba tšea e le batho ba gagwe. Ka go re’alo, Moshe le Arone ba ile ba laelwa gore ba botše Farao gore: “Se ke seo Jehofa Modimo wa Isiraele a se boletšego: ‘Lesa batho ba ka gore ba ye ba ntirele monyanya kua lešokeng.’”—Ek. 5:1.

⁸ Baisiraele ba ile ba lokollwa bokgobeng kua Egipita ka morago ga gore Modimo a tliše dikotlo tše lesome le ka morago ga gore Farao le madira a gagwe ba fedišetšwe ka Lewatleng le Lehwibidu. (Ek. 15:1-4) Pele ga ge dikgwedi tše tharo di ka fela, Jehofa o ile a dira kgwerano le Baisiraele kua Thabeng ya Sinai gomme a ba nea kholofetšo ye ya moswananoši: “Ge e ba le ka kwa lentšu la ka e le ruri gomme la boloka kgwerano ya ka, gona le tla ba thoto ya ka e kgethegilego gare ga merafo e mengwe ka moka, . . . [la ba] setšhaba se sekgethwa.”—Ek. 19:5, 6.

9, 10. (a) Go ya ka Doiteronomio 4:5-8, Molao o be o hlaola Baisiraele bjang go ditšhaba tše dingwe? (b) Baisiraele ba be ba tla itlhatsela bjang e le ‘setšhaba se sekgethwa go Jehofa’?

⁹ Ge Baheberu ba be ba sa le Egipita, pele e ka ba makgoba, ba be ba rulagantšwe ka meloko yeo e bego e etelelwa pele ke dihlogo tša malapa goba bapatriareka. Go etša bahlanka ba Jehofa bao ba phetšego pele ga tšona, dihlogo tše tša malapa e be e le babuši, baahlodi le baperisita ba malapa a tšona. (Gen. 8:20; 18:19; Jobo 1:4, 5) Lega go le bjalo, Jehofa o ile a diriša Moshe go nea Baisiraele molao woo o bego o tla ba hlaola ditšhabeng tše dingwe ka moka. (Bala Doiteronomio 4:5-8; Ps. 147:19, 20.) Ka tlase ga Molao wa Moshe go be go na le baperisita gomme melato e ahlolwa ke “banna ba bagolo” bao ba bego ba hlompšha ka baka la ge ba be ba na le tsebo le bohlale. (Doit. 25:7, 8) Molao wo o ile wa nea setšhaba se seo se bego se sa tšwa go tswalwa ditaelo tša mabapi le go rapela Modimo le boitshwaro.

¹⁰ Pejana ga ge Baisiraele ba ka tsena Nageng ya Kholofetšo, Jehofa o ile a bušeletša melao ya gagwe gape, gomme Moshe a re go bona: “Jehofa yena lehono o go tutueditše gore o bolele gore o tla ba setšhaba sa gagwe, e lego thoto ya gagwe e kgethegilego, feela bjalo ka ge a go holofeditše, le go bolela gore wena o tla latela ditaelo tša gagwe ka moka, le gore yena o tla go bea ka godimo ga ditšhaba tše dingwe ka moka tšeo a di dirilego, ke moka seo sa tlišetša Jehofa Modimo wa gago tumišo, botumo le botse, ge wena o itlhatsela o le setšhaba se sekgethwa go yena.”—Doit. 26:18, 19.

11-13. (a) Ke bomang bao ba ilego ba hlankela Modimo le batho bao a ba kgethilego? (b) Motho yo e sego Moisiraele o be a swanetše go dira’ng ge e ba a be a nyaka go hlankela Jehofa?

¹¹ Gaešita le ge ka nako yeo Jehofa a be a na le setšhaba seo a se kgethilego mo lefaseng, ga se a ka a thibela batho bao e sego Baisiraele go ba gare ga batho ba gagwe. O ile a dumelela “lešaba le legolo la mahlakanasele” la batho bao e bego e se Baisiraele, go akaretša le Baegipita, gore le sepele le batho ba gagwe ge a be a ba lokolla Egipita. (Ek. 12:38) Ka nako ya kotlo ya bošupa, ba bangwe ba “bahlanka ba Farao” ba ile ba boifa lentšu la Jehofa gomme ga go pelaelo gore ba ile ba ba gare ga lešaba la mahlakanasela leo le ilego la tloga le Baisiraele kua Egipita.—Ek. 9:20.

¹² Pejana ga ge Baisiraele ba ka tshela Noka ya Jorodane gore ba thope naga ya Kanana, Moshe o ile a ba botša gore ba “rate badiiledi” bao ba tla bego ba dula le bona. (Doit. 10:17-19) Batho ba Modimo bao a ba kgethilego ba be ba swanetše go amogela badiiledi le ge e le bafe bao ba bego ba tla kwa  melao yeo Moshe a ba neilego yona. (Lef. 24:22) Badiiledi ba bangwe e ile ya ba barapedi ba Jehofa, ba ekiša Ruthe wa Momoaba yoo a ilego a botša Naomi wa Moisiraele gore: “Batho ba geno e tla ba ba gešo, gomme Modimo wa gago ya ba Modimo wa ka.” (Ruthe 1:16) Badiiledi ba ba ile ba phela ka go dumelelana le Molao wa Moshe gomme ba batona ba bona ba bolotšwa. (Ek. 12:48, 49) Jehofa o ile a ba amogela e le ditho tša setšhaba seo a se kgethilego.—Num. 15:14, 15.

¹³ Thapelo yeo Solomone a ilego a e rapela ge tempele e be e neelwa go Jehofa e bontšha gore Modimo o be a amogela barapedi bao e bego e se Baisiraele. Solomone o rapetše ka gore: “Le motho o šele yo e sego wa setšhaba sa gago sa Isiraele yoo a tšwago nageng ya kgole ka baka la ge a kwele ka leina la gago le legolo, seatla sa gago se matla le letsogo la gago leo le otlolotšwego, ge a ka tla a rapela a lebeletše ntlong ye, gona anke wena o theetše o le magodimong, lona lefelo la gago le le tsepamego la bodulo gomme o dire sohle seo motho o šele a se kgopelago go wena; e le gore merafo ka moka ya lefaseng e tsebe leina la gago ke moka e go boife go etša ge setšhaba sa gago sa Isiraele se go boifa, gomme e tle e tsebe gore leina la gago le bitšwa mo ntlong ye ke e agilego.” (2 Dikor. 6:32, 33) Go etša ge go be go sa le bjalo mehleng ya Jesu, motho le ge e le ofe yo e sego Moisiraele yo a bego a nyaka go hlankela Jehofa o be a ka dira bjalo le batho bao A dirilego kgwerano le bona.—Joh. 12:20; Dit. 8:27.

14-16. (a) Ke ka tsela efe Baisiraele e bego e tla ba setšhaba sa dihlatse tša Jehofa? (b) Batho ba Jehofa ba mehleng yeno ba swanetše go itshwara bjang?

¹⁴ Baisiraele ba be ba rapela Modimo wa bona e lego Jehofa mola ditšhaba tše dingwe di be di rapela medingwana ya tšona. Mehleng ya moporofeta Jesaya, Jehofa o ile a bapetša boemo bja lefase le bja kgorong ya tsheko. O ile a botša medimo ya ditšhaba tšeo gore e tšweletše dihlatse tša gore ke medimo ya kgonthe, a re: ‘Anke e tšweletše dihlatse tša yona e le gore e tle e bolelwe e lokile, goba e kwe gomme e re: “Seo ke therešo!”’—Jes. 43:9.

¹⁵ Medimo ya ditšhaba tšeo e ile ya se kgone go tšweletša bohlatse le ge e le bofe bja gore ke medingwana ya kgonthe. E be e le  medimo ya go se re selo yeo e bego e sa kgone go bolela le go šutha. (Jes. 46:5-7) Ka lehlakoreng le lengwe, Jehofa o ile a botša batho ba gagwe ba Isiraele gore: “Lena le dihlatse tša ka, . . . yena mohlanka wa ka yo ke mo kgethilego, e le gore le ntsebe gomme le ntumele, le gore le kwešiše gore ke dula e le Nna wa ka mehla. Pele ga ka ga se gwa ka gwa ba le modimo yo mongwe yo a kilego a dirwa gomme le ka morago ga ka ga se gwa ka gwa ba le yo mongwe. Nna, ke nna Jehofa gomme ga go mophološi ka ntle le nna. . . . Ka gona le dihlatse tša ka, . . . nna ke Modimo.”—Jes. 43:10-12.

¹⁶ Go swana le kgorong ya tsheko, batho bao Jehofa a ba kgethilego ba be ba tla hlatsela gore ke yena Modimo a nnoši wa therešo. O ile a ba bitša “batho bao ke ipopetšego bona e le gore ba ntumiše.” (Jes. 43:21) E be e le batho bao ba bitšwago ka leina la gagwe. Ka ge Jehofa a be a ba lokolotše Egipita, ba be ba swanetše go godiša bogoši bja gagwe ditšhabeng tše dingwe tša mo lefaseng. Ge e le gabotse, ba be ba swanetše go phela ka go dumelelana le mantšu ao moporofeta Mika a a ngwaletšego batho ba Modimo ba mehleng yeno ao a rego: “Ge e le morafo o mongwe le o mongwe o tla sepela ka leina la modimo wa wona; eupša ge e le rena, re tla sepela ka leina la Jehofa Modimo wa rena go iša mehleng ya neng le neng.”—Mika 4:5.

17. Go tlile bjang gore Baisiraele ba fetoge ‘morara o šele o senyegilego’ mahlong a Jehofa?

¹⁷ Ka manyami, Baisiraele ga se ba ka ba botegela Modimo wa bona e lego Jehofa. Ba ile ba dumelela ditšhaba tše dingwe di ba tutuetša gore ba rapele medimo ya kota le leswika. Mo e ka bago nywaga e 2 800 e fetilego, moporofeta Hosea o ile a ngwala gore: “Isiraele ke morara o senyegago. . . . E atišitše dialetare tša yona. . . . Dipelo tša Baisiraele ke tša boikaketši; bjale ba tla bonwa molato.” (Hos. 10:1, 2) Nywaga e ka bago e 150 ka morago, Jeremia o ile a ngwala mantšu a ao Jehofa a ilego a a botša batho ba Gagwe bao ba sa botegego: “Ge e le nna ke be ke go bjetše o le morara o mobotse o mohwibidu, woo ka moka ga wona e bego e le peu ya kgonthe. Bjale go tlile bjang gore o mphetogele o be makala a senyegilego a morara o šele? . . . Medimo yeo o itiretšego yona e kae? Anke e eme ge e ba e ka go phološa nakong ya bošula bja gago. . . . Batho ba ka bona ba ntebetše.”—Jer. 2:21, 28, 32.

18, 19. (a) Jehofa o ile a bolela bjang e sa le pele gore o tla tšweletša setšhaba se sefsa seo se bitšwago ka leina la gagwe? (b) Re tlo ahlaahla’ng sehlogong se se latelago?

¹⁸ Go e na le gore Baisiraele ba tšweletše dienywa tše dibotse ka go rapela Jehofa ka tsela e sekilego le ka go itshwara bjalo ka dihlatse tša gagwe tše di botegago, ba ile ba tšweletša dienywa tše di bodilego ka go rapela medimo ya diswantšho. Ka go re’alo, Jesu o ile a botša baetapele ba Bajuda ba baikaketši ba mehleng ya gagwe gore: “Le tla amogwa Mmušo wa Modimo wa newa setšhaba seo se tšweletšago dienywa tša wona.” (Mat. 21:43) Ke feela bao ba lego ‘kgweranong e mpsha’ yeo Jehofa a boletšego ka yona e sa le pele a diriša moporofeta Jeremia bao e bego e ka ba karolo ya setšhaba seo se sefsa, Isiraele ya moya. Jehofa o be a porofetile ka Baisiraele ba moya bao ba bego ba tla tlišwa kgweranong yeo e mpsha gore: “Ke tla ba Modimo wa bona gomme bona e tla ba setšhaba sa ka.”—Jer. 31:31-33.

¹⁹ Go etša ge go bontšhitšwe, ka morago ga gore Baisiraele ba nama ba se botegele Jehofa, o ile a dira gore Baisiraele ba moya ba lekgolong la pele la nywaga e be batho ba gagwe. Eupša lehono batho ba gagwe ke bomang mo lefaseng? Batho bao ba nyakago go hlankela Modimo ba ka tseba bjang barapedi ba gagwe ba therešo? Re tla ahlaahla taba ye sehlogong se se latelago.