Dipotšišo tše Tšwago go Babadi

Molaong wa Moše, ke ka baka la’ng mekgwa e mengwe ya tlhago yeo e tswalanago le ditho tša botona le botshadi e be e lebelelwa e le yeo e dirago gore motho a ‘šilafale’?

Modimo o rulagantše gore go be le kopano ya botona le botshadi bakeng sa gore batho ba ate le bakeng sa gore banyalani ba thabele lenyalo. (Genesi 1:28; Diema 5:15-18) Lega go le bjalo, go dikgaolo 12 le 15 tša Lefitiko re hwetša melao e ngwadilwego ka botlalo ya mabapi le go šilafala moo go bakwago ke go tšhollwa ga matšhedi, go ya kgweding le go belega. (Lefitiko 12:1-6; 15:16-24) Melao e bjalo yeo e bego e neilwe Baisiraele ba bogologolo e be e dira gore ba phele gabotse mmeleng, e kgothaletša ditekanyetšo tše di phagamego tša boitshwaro le go gatelela go kgethega ga madi le go nyakega ga tshwarelo ya dibe.

Gare ga dilo tše dingwe, dinyakwa tša Molao wa Moše mabapi le mekgwa yeo e tswalanago le ditho tša botona le botshadi di be di kgothaletša gore Baisiraele ka moka ba phele gabotse mmeleng. Puku ya The Bible and Modern Medicine e re: “Go thibelwa ga dikopano tša botona le botshadi nakong ya ge mosadi a le kgweding e be e le pheko e šomago ya go thibela malwetši a mangwe ao a bakwago ke dikopano tša botona le botshadi . . . le gona go be go šireletša basadi gore ba se swarwe ke kankere ya popelo.” Melao e bjalo e be e šireletša batho ba Modimo malwetšing ao ba ka bego ba be ba sa a tsebe goba ao mohlomongwe ba bego ba ka se kgone go a bona. Tsela e botse ya go ba le dikopano tša botona le botshadi e be e oketša matla a go belega a setšhaba seo se bego se šegofaditšwe ke Modimo ka kholofetšo ya gore se tla ata sa ba sa atlega. (Genesi 15:5; 22:17) Boemo bjo bobotse bja maikwelo bja batho ba Modimo le bjona bo be bo akaretšwa. Ka go kwa melao ye, banna le basadi ba be ba kgona go laola dikganyogo tša bona tša go ba le dikopano tša botona le botshadi.

Lega go le bjalo, taba ya bohlokwa kudu yeo e bego e akaretšwa go mehuta ya ditšhila tšeo di bego di bakwa ke ditaba tša botona le botshadi e be e le go ela ga madi goba go lahlegelwa ke ona. Melao ya Jehofa mabapi le madi ga se ya gatelela menaganong ya Baisiraele go kgethega ga madi feela eupša gape e gateletše le karolo ya bohlokwa yeo madi a e kgathago borapeding bja Jehofa, e lego dihlabelong le tshwarelong ya dibe.—Lefitiko 17:11; Doiteronomio 12:23, 24, 27.

Ka gona, dilo tšeo di bego di nyakwa ke Molao tabeng ye, tšeo di bego di ngwadilwe ka botlalo di tswalana kgaufsi le go se phethagale ga batho. Baisiraele ba be ba tseba gore Adama le Efa—ka morago ga ge ba dirile sebe—ba be ba ka se kgone go ba le bana ba phethagetšego. Ditlogolwana tša bona ka moka di be di tla tlaišwa ke ditla-morago tša sebe sa leabela—go se phethagale le lehu. (Baroma 5:12) Ka baka la se, batswadi ba be ba ka fetišetša feela go se phethagale le bophelo bja sebe baneng ba bona, gaešita le ge ditho tša pelego mathomong di be di diretšwe gore di tšweletše bana bao ba phethagetšego thulaganyong ya lenyalo.

Ka gona, dinyakwa tša Molao tša tlhwekišo di be di tla gopotša Baisiraele ka sebe sa bona sa leabela gaešita le ka go nyakega ga sehlabelo sa topollo bakeng sa go bipa dibe le go bušetša batho phethegong. Ke therešo gore dihlabelo tša diphoofolo tšeo ba bego ba di neela ga se tša ka tša phetha morero woo. (Baheberu 10:3, 4) Morero wa Molao wa Moše e be e le go ba lebiša go Kriste le go ba thuša go kwešiša gore ke ka sehlabelo sa Jesu yo a phethagetšego feela moo ba ka kgonago go hwetša tebalelo ya kgonthe, gomme babotegi ba kgona go hwetša bophelo bjo bo sa felego.—Bagalatia 3:24; Baheberu 9:13, 14.