Ela Hloko Temošo!

MODUMO o mogolo! Ka June 3, 1991, ka modumo wo o dirago lešata le legolo kudu, Thaba ya Fugen kua Japane e ile ya thuntšhetša ka ntle lefula la dikgase tša thabamollo le molora. Motswako wo o fišago kudu o ile wa tšhologa go theoša le thaba. Go thuthupa mo go ile gwa bolaya batho ba 43. Ba bantši bao ba ilego ba phonyokga ka lešobana la nalete ba be ba swele o šoro. Ba bangwe ba ile ba lla ka gore: “Meetse, meetse, hle.” Bo-raditima-mollo le maphodisa ka go tlalelwa ba ile ba kitimela go tlo ba thuša.

GO BE go ile gwa lemogwa thotobolo ya leraga sehlweng sa Thaba ya Fugen mo e ka bago dibeke tše pedi pejana ga moo, ka gona bahlankedi le badudi ba be ba phafošitšwe. Lebaka le e ka bago la ka godimo ga beke pele ga kotsi, go ile gwa newa keletšo bakeng sa go tšwa tikologong yeo. Mo e ka bago letšatši feela pele ga mothuthupo, maphodisa a ile a kgopela ditho tša lefapha la ditaba gore di pheme go ya tikologong yeo e thibetšwego. Lega go le bjalo, mathapameng ao a polao bahlaselwa ba 43 ba be ba le tikologong e kotsi.

Ke ka baka la’ng ba bantši gakaakaa ba ile ba leka go ya tikologong yeo goba ba ile ba šala gona moo? Balemi ba bangwe bao ba bego ba šetše ba tšwile magaeng a bona ba ile ba boela morago bakeng sa go yo lekola dithoto tša bona le mašemo a bona. Ditsebi tše tharo tša dithabamollo di be di leka go batamela kgaufsi kudu le thabamollo ka mo di ka kgonago bakeng sa go kgotsofatša kgahlego ya tšona ya tša thuto. Babegi ba ditaba ba mmalwa gotee le batšea-diswantšho ba ile ba leka go tshela mellwane ya moo go bego go sa swanelwa go tsenwa gona ka gobane ba be ba nyaka go hwetša tsebišo e kgahlišago mabapi le go thuthupa ga thabamollo. Baotledi ba bararo ba thekisi bao ba ilego ba hirwa ke ba lefapha la ditaba ba be ba le gona tiragalong ye. Maphodisa le baithapi ba bo-raditima-mollo ba be ba le mošomong. Yo mongwe le yo mongwe o be a e-na le lebaka la gagwe la go ya tikologong e kotsi​—gomme mafelelo e bile gore o ile a lahlegelwa ke bophelo bja gagwe.

Na o Tikologong e Kotsi?

Re ka no se phele ka moka tikologong ya thabamollo yeo e thuthupago. Lega go le bjalo, go thwe’ng ge e ba re be re lebeletšane le kotsi ya lefase ka moka, yeo e re beago ka moka ga rena tikologong e kotsi yeo e aparetšago lefase ka moka? Puku yeo e ilego ya itlhatsela go ba mothopo wo o ka botwago wa tsebišo ya boporofeta e re lemoša ka kotsi e tlago ya  lefase ka moka gomme e e hlalosa ka mokgwa wo: “Ké mo letšatši lè tl’o xo fifala, le kxwedi ya tlo lesa xo étša; ’me dinaledi di tlo wa lexodimong, le matla a lexodimo a tlo šišinyêxa. . . . Merafô yohle ya lefase e tlo hlaboša sellô.” (Mateo 24:29, 30) Mo ditiragalo tša legodimong tšeo di aparetšago legohleng di hlaloswa e le tšeo di kgomago “merafô yohle ya lefase.” Ka mantšu a mangwe, boporofeta bjo bo hlalosa ka kotsi yeo e tla kgomago yo mongwe le yo mongwe wa rena.

Puku ye ya boporofeta bjoo bo ka botwago ke Beibele. Ka mo go kgahlišago, taba e dikologilego ya lengwalo leo go bolelwago ka lona ka mo godimo e re nea tlhaloso e tletšego ya dilo tšeo di tla lebišago phedišong ya lefase ka moka. Go fo etša ge thotobolo ya leraga le ditšhupo tše dingwe tša go ba gona ga thabamollo di ile tša nea bahlankedi ba motse wa Shimabara mabaka bakeng sa go lemoga tikologo e kotsi, Beibele e re nea mabaka bakeng sa go dula re phafogile le go itokišeletša phologo. Re ka ithuta thuto masetla-pelong a Thaba ya Fugen le go lemoga bogolo bja seo se letšego ka pele.

 [Mothopo wa Seswantšho go letlakala 2]

COVER: Yomiuri/Orion Press/Sipa Press

[Mothopo wa Seswantšho go letlakala 3]

Yomiuri/Orion Press/Sipa Press