Go ikgantšha go ka dira gore re kgetholle batho ba bangwe. Motho yo a nago le boikgantšho, o nagana ka yena feela. O ipona a le kaone go feta batho ba bangwe. E bile o ahlola batho ba bangwe ka ge ba sa swane le yena. Ka moka ga rena, re ka ikhwetša re dira dilo tše re sa lemoge. Ka mohlala, puku e nngwe ya Encyclopædia Britannica e re: “Batho ba merafo e mentši ba bona okare tsela yeo ba phelago ka yona, dijo tša bona, moaparo wa bona, setšo sa bona, le dilo tše dingwe, di phala tša merafo e mengwe.” Re ka dira’ng gore re se ke ra nagana ka tsela ye e mpe?

BAFILIPI 2:3 e re: “Ka boikokobetšo le tšee gore ba bangwe ba le feta ka bogolo.”

Lengwalo le le ra gore’ng? Le re thuša go bona gore e le gore re se nagane kudu ka rena feela, re swanetše go ithuta go ikokobetša. Ge e ba re ikokobeditše, re tla kgona go bona gore batho ba bangwe go na le dilo tšeo ba re phalago ka tšona. Ga go na morafo woo wona o ka no go kgona go dira dilo tše ka moka.

 Ka mohlala, nagana ka monna yo mongwe yoo a bitšwago Stefan. O gotše a kgetholla batho bao ba tšwago dinageng tša maemo a tlasana. O re: “Ke nagana gore go tšea batho ba bangwe ba re feta ka bogolo go bohlokwa ka gobane seo se tlo re thuša gore re se ke ra ba le kgethollo. Ga se gore ke tseba dilo ka moka. Nka ithuta dilo tše dintši go batho ba morafo o mongwe le o mongwe.”

Amogela gore le wena o fela o dira diphošo, le gore ba bangwe go na le dilo tšeo ba go phalago ka tšona. O se ke wa phetha ka gore batho ka moka ba morafo o itšego, ba no swana.

Go e na le go no phetha ka gore motho yo a tšwago morafong o itšego ga se a loka, ipotšiše gore:

• ‘Na mekgwa yeo ke sa e ratego ka motho yoo e tloga e le e mebe, goba na e no ba e fapane le ya ka?’

• ‘Na motho yoo yena a ka ntshwayaswaya diphošo?’

• ‘Ke dilo dife tšeo motho yoo a mphalago ka tšona?’

Ke nnete gore ge o ka araba dipotšišo tše go tšwa pelong, o ka se sa kgetholla motho yoo, e bile o tlo thoma le go mo rata.