Go ka Senyega Kae?

KE MO go sa kwagalego go letela gore lenyalo le se be le mathata. Ge e le gabotse, gaešita le balekane ba lenyalo bao ba swanelanago gabotse ga ba dumelelane ka dilo tšohle. Ka baka leo, mathata a itšego a tla ba gona. Go etša ge rusi e ka bodiša tšhipi yeo e pentilwego, le mathata a itšego a ka senya lenyalo. E le gore re kwešiše seo se ka dirwago go kaonafatša lenyalo, anke sa pele re hlahlobe moo go ka senyegago.

Dinako tša Kgateletšego e Kgolo

Beibele e boletše e sa le pele gore batho ba bantši mehleng ya rena e be e tla ba “baithati, barati ba tšhelete, ba go ipona, ba ikgogomošago,. . . ba go se leboge, ba go se botege, ba ba se nago maikwelo a borutho a tlhago, ba ba sa ikemišetšago go amogela tumelelano le ge e le efe, bathomeletši, ba se nago boitshwaro, ba bogale, ba go se rate go loka, baeki, ba hlogo-thata, ba tletšego boikgantšho.” (2 Timotheo 3:2-4) Mekgwa e bjalo e ka godiša diphapano, go se kwešišane le mantšu ao a bolelwago go sa naganwa ao a itlelago gabonolo go batho ba sa phethagalago.

Monyakišiši yo mongwe o re: “Ke nako e gakantšhago kudu historing yeo ka yona motho a ka tsenago lenyalong. Ka lehlakoreng le lengwe . . , re kgona go hwetša tsebišo e ntši kudu ya kamoo re ka matlafatšago lenyalo ka gona . . . Mola ka go le lengwe re lebeletšane le mathata a mantši a tša leago le tša ditšhelete ao a re thatafaletšago go ba le manyalo ao a atlegilego.”

Ditebelelo Tšeo di ka se Kego tša Phethagatšwa

Setsebi se sengwe sa tša manyalo se hlalosa gore “ditebelelo tšeo di ka se kego tša phethagatšwa ke tše dingwe tša dilo tšeo di dirago gore batho ba se kgotsofale lenyalong.” Banyalani ba bantši ba nolega moko ge ba lemoga gore lenyalo ga le kamoo ba bego ba le letetše gore le tla ba ka gona le gore balekane ba bona ga ba ka tsela yeo ba bego ba nagana gore ba ka yona. Ba ikhwetša ba nyamišitšwe kudu ke mafokodi a balekane ba bona ao pele ba bego ba sa a bone goba ao e lego a magolo go feta kamoo ba bego ba letetše.

Lega go le bjalo, Beibele e dumela ka go se pepetletše gore lenyalo le ka tliša “bohloko le manyami.” (1 Bakorinthe 7:28, The New English Bible) Ka baka la’ng? Lebaka le lengwe ke gore go se go ye kae tswalano ya batho ba babedi ba sa phethagalago e utolla mafokodi a bona.

Ka godimo ga moo, batho ba bantši ba letela selo se sa kgonegego sa gore ba be le lethabo lenyalong ka ntle le go šoma ka thata gore go be bjalo. Ka ge ba nagana gore lenyalo le tla ba tlišetša lethabo gatee-tee, ba hlokomologa boikarabelo le go šoma ka thata mo go nyakegago e le gore ba be le  lenyalo leo le thabišago. Ba ipea kotsing ya go nyama kudu le go gakanega ge ba hwetša gore lenyalo ga le kamoo ba bego ba letetše. Gantši ge go e-na le phapano e kgolo ponong ya bona ka lenyalo le seo lenyalo le lego sona ka kgonthe, ke mo ba nyamago kudu.

Bothata bja Poledišano

Ke mathata afe a poledišano ao a ka phengwago e le gore go be le tswalano e tiilego lenyalong? Banyalani ba bangwe ba wela mokgweng wa go kwa ntle le go theetša ka kelohloko le go bolela ntle le go boledišana. Poledišano e lerato e tšeelwa legato ke dipoledišano tše kopana tšeo di dirwago feela e le gore bophelo bo tšwele pele. Poledišano e nago le morero le e tšwago pelong e tšeelwa legato ke go ngangišana mo go sa kgaotšego ka dilo ka moka, gaešita le ge go se na lebaka la go ngangišana ka dilo tše bjalo. Go se kwešišane gabotse go baka diphapano; go hlaselana ka mantšu go dira gore balekane ba se boledišane.

Ka manyami, balekane ba bantši ba lenyalo ba palelwa ke go lemoga boitshwaro bjo bobotse bja balekane ba bona goba ba a bo lemoga eupša ga ba bontšhe tebogo. Go oketša moo, ka baka la maemo a lehono ao go ona monna le mosadi ba swanetšego go šoma mošomo wa boiphedišo, basadi ba bantši bao ba nyetšwego ba a galefa ka gobane ga ba thušwe go dira mešomo ya ka gae mola ba šoma mošomo wa boiphedišo. Ka godimo ga moo, basadi ba bantši ikwa eka dinyakwa tša bona tša maikwelo di a hlokomologwa.

O ka dira’ng gore o age lenyalo leo le atlegilego? Ela hloko keletšo e latelago e šomago yeo e tšwago Beibeleng.

[Ntlhakgolo go letlakala  4]

Banyalani ba bangwe ba kwa ntle le go theetša ka kelohloko le go bolela ntle le go boledišana

[Ntlhakgolo go letlakala 5]

Batho ba bantši ba letela gore ba be le lethabo lenyalong ka ntle le go šoma ka thata gore go be bjalo