Beibele ga e re nee letšatši la go belegwa ga Jesu, goba go bolela gore re swanetše go le keteka. Bjalo ka ge Cyclopedia ya McClintock le Strong e bolela: “Go binwa ga Keresemose ga se taelo e tšwago go Modimo, goba yeo e hwetšwago ka go Testamente e Mpsha.”

 Go e na le moo, go hlahlobja ga histori ya Keresemose go utollotše gore e thomile meletlong ya bodumedi ya boheitene. Beibele e bontšha gore ga re kgahliše Modimo ge e ba re mo rapela ka tsela yeo a sa e amogelego.—Ekisodo 32:5-7.

1.   Go keteka letšatši la matswalo a Jesu: “Bakriste ba lekgolong la pele la nywaga ga se ba ka ba keteka matswalo [a Jesu] ka gobane ba be ba lebelela go ketekwa ga matswalo a motho e le motlwae wa boheitene.”—The World Book Encyclopedia.

2.   December 25: Ga go na bohlatse bja gore Jesu o belegwe ka letšatši le. Mohlomongwe baetapele ba kereke ba ile ba kgetha letšatši le gore le sepedišane le menyanya ya boheitene yeo e bego e swarwa letšatšing le lekopana la marega goba nakong yeo.

3.   Go fana dimpho, go ja, go keteka: The Encyclopedia Americana e re: “Saturnalia, e lego moletlo wa Baroma wo o ketekwago magareng ga December, e ile ya thula tsela bakeng sa metlwae e mentši ya go ithabiša ka Keresemose. Ka mohlala, monyanya wo o dirile gore go jewe, go fanwe dimpho le go tšhuma dikerese ka tsela e feteletšego.” Encyclopædia Britannica e bolela gore “mešomo ka moka le dikgwebo di be di emišwa” nakong ya Saturnalia.

4.   Mabone a Keresemose: Go ya ka The Encyclopedia of Religion, Mayuropa a be a kgabiša dintlo tša ona “ka mabone le botala bja mehuta ka moka” e le ge a keteka letšatši le lekopana la marega le go lwantšha meoya e mebe.

5.   Sehlare sa mistletoe, sehlašana sa holly: “Baruti ba ma-Celt ba be ba dumela gore sehlare sa mistletoe se be se na le matla a itšego. Sehlašana sa holly seo se dulago e le se setala se be se rapelwa e le kholofetšo ya go boa ga letšatši.”—The Encyclopedia Americana.

6.   Sehlare sa Keresemose: “Borapedi bja sehlare, bjoo bo bego bo tlwaelegile baheiteneng ba Mayuropa bo ile bja tšwela pele le ka morago ga gore ba fetogele Bokristeng.” Tsela e nngwe yeo e dirilego gore go rapela sehlare go ate ke motlwae wa “go bea sehlare sa Yule mojako goba ka ngwakong matšatšing a maikhutšo a magareng ga marega.”—Encyclopædia Britannica.