NEW YORK—Dihlatse tša Jehofa di tsebišitše ka dikopano tša tšona tša ditšhabatšhaba tša matšatši a mararo tšeo di tlago go ba ditoropong tše mmalwa go dikologa lefase go thoma ka June 2014 go ba go fihla ka January 2015. Dikopano tše di tla thoma kua United States gomme tša tšwela pele Australia, Ecuador, Engelane, Jeremane, Gerika, Mexico, Korea Borwa le Zimbabwe. Dikopano tše tša ditšhabatšhaba di tla swarwa ka nako e tee le dikopano tša selete tšeo Dihlatse di bago le tšona ngwaga le ngwaga gomme di tla swarwa mafelong a manyenyane.

Dikopanong tše tša ditšhabatšhaba go tla ba le baeng bao ba tšwago dinageng tše dingwe gotee le baromiwa bao ba tla bago ba etela dinaga tša gabo bona. J. R. Brown yo e lego mmoleledi wa Dihlatse tša Jehofa ntlong kgolo ya tšona ya lefase ka bophara kua Brooklyn, New York o bolela gore: “Dikopano tša rena tša ditšhabatšhaba e tla ba ditiragalo tše kgahlišago kudu le tše kgethegilego tšeo o ka bago go tšona. Re nagana gore batho ka kakaretšo ba tla thabela dikopano tše le rena ge re dutše re bokane mmogo re le malapa le bagwera go tlo theetša mananeo a thabišago kudu.”

Sehlogo sa kopano ye se re: “Tšwelang Pele le Tsoma Mmušo wa Modimo Pele!” Mna. Brown o hlalosa gore “lenaneo le tla bolela kudu ka taba yeo e lego sehlogo sa Beibele gotee le ditumelo tše pedi tšeo e lego tša bohlokwahlokwa go Dihlatse tša Jehofa e lego: Mmušo wa Modimo o hlomilwe ka 1914 le gore Jesu Kriste ke Kgoši ya Mmušo wo. Ruri kopano ye e swaya mengwaga e lekgolo ya Mmušo wa Modimo.”

Dihlatse di itokišeletša go kgatha tema lesolong la lefase ka bophara la go laletša batho gore ba be gona dikopanong tša selete tikologong ya gabo tšona. Go etša ge go dirwa dibokeng tša Dihlatse, go tsenwa mahala e bile ga go tšewe koleke.

Dinako tša maleba le mafelo a dikopano tša 2014 tša matšatši a mararo tša “Tšwelang Pele le Tsoma Mmušo wa Modimo Pele!” di hwetšagala Wepesaeteng ya semmušo ya Dihlatse tša Jehofa ya, jw.org. Boraditaba ba ka ikgokaganya le ofisi ya lekala ya Dihlatse tša Jehofa go tseba lefelo la kopano ya tikologong ya bona gotee le ge e ba ba nyaka go ngwala ka kopano.

Ba Ditaba:

Bakeng sa Ditšhabatšhaba: J. R. Brown, Ofisi ya Boditšhabatšhaba, mogala +1 718 560 5000