Ke belegetšwe Tiranë, e lego teropo e kgolo ya Albania. Lapa la gešu le be le se na tšhelete e ntši. Tate e be e le monna wa go tshepega e bile a šoma diiri tše ntši gore a re hlokomele. Eupša o be a sa hwetše tšhelete e lekanego gore re kgone go phela. Ge ke be ke sa le mošemane ke be ke nyamišwa ke go bona ka gae re hlaka. Ke feditše nako e ntši ke se na dieta le dijo tše di lekanego.

 Ke thomile go utswa ke sa le yo mo nyenyane. Ke be ke nagana gore ke leka go thuša lapa la gešu. Maphodisa a ile a feleletša a ntshwere. Ka 1988, ge ke be ke na le mengwaga e 14, tate o ile a nkiša sekolong sa go šoma ka diatla. Ke feditše mengwaga e mebedi moo ke ithuta go šoma ka ditshipi. Ge ke tloga moo ke be ke nyaka go phela gabotse, eupša ga se ka hwetša mošomo. Batho ba bantši Albania ba be ba sa hwetše mošomo ka baka la mathata a tša dipolotiki. Ke ile ka nyama gomme ka thoma go fetša nako ya ka e ntši ke na le bagwera ba ka ba kgale gomme ra thoma go utswa gape. Mafelelong nna le bagwera ba ka re ile ra swarwa gomme ra fetša mengwaga e meraro re golegilwe.

 Ka morago ga gore ke tšwe kgolegong, ke ile ka no tšwela pele ke utswa. Ikonomi ya Albania e be e wele. Ka nako yeo ke ile ka dira tšhelete e ntši ka dilo tšeo di se go molaong. Letšatši le lengwe ka morago ga ge re utswitše, bagwera ba ka ba babedi ba ile ba swarwa, gomme nna ka tšhabela nageng e nngwe gore ke se ke ka ya kgolegong nako e telele. Ge ke le nageng yeo, ke ile ka nyalana le mosadi wa ka Julinda gomme ra ba le ngwana wa mošemane.

 Re ile ra ya England. Ke be ke nyaka go thoma bophelo lefsa le mosadi wa ka le ngwana wa ka, Eupša ke be ke palelwa ke go fetoša tsela yeo ke bego ke phela ka yona. Ke be ke thoma go rekiša di drugs gomme ke be ke swara tšhelete e ntši.

 Julinda o ile a ikwa bjang ge ke be ke rekiša di drugs? Ereng a le botšeng: “Ke goletše Albania, ke be ke se sa nyaka go hlaka. Ke be ke ikemišeditše go leka se sengwe le se sengwe seo se ka dirago gore bophelo bjaka bo be kaone. Ke be ke nagana gore tšhelete e tlo kaonefatša bophelo bja rena, ke kamoo ke ilego ka thekga Artan ka se sengwe le se sengwe seo se ka re tlišetšago tšhelete, e ka ba ka go bolela maaka, ka go utswa goba ka go rekiša di drugs.”

 Ka 2002 maphelo a rena a ile a fetoga. Ke ile ka hwetšwa ke swere di drugs tše dintši kudu gomme ka golegwa gape.

 E be e le kgale ke tseba ka Beibele. Mathomong a ngwaga wa 2000 Julinda o ile a kopana le dihlatse tša Jehofa gomme a thoma go ithuta Beibele le tšona. Ga se ka thabela go ithuta Beibele ka gobane ke be ke nagana gore e a pora. Eupša Julinda o be a e rata. O re: “Ke tšwa lapeng la bodumedi e bile ke be ke rata Beibele e bile ke e hlompha. Ke be ke nyaka go tseba gore e ruta eng e bile ke ile ka thoma go ithuta Beibele le dihlatse tša Jehofa. Ke ile ka thoma go kwešiša dilo tše dintši tšeo Beibele e di rutago. Dilo tšeo ke ithutilego ka tšona di nthušitše gore ke fetoše bophelo bja ka. Eupša ke be ke sa nagana gore tšhelete e ka dira gore re thabe go fihlela ge Artan a eya kgolegong. Ke ile ka fetoša tsela yeo ke naganago ka yona. Ke ile ka lemoga gore dilo tšeo Beibele e di bolelago ka tšhelete ke nnete. Re dirile dilo ka moka gore re hume eupša ga se ra ka ra thaba. Ke ile ka thoma go lemoga gore ke swanetše go latela melao ka moka ya Modimo.”

 Ka 2004, ke ile ka lokollwa kgolegong gomme ka leka go boela kgwebong ya go rekiša di drugs. Eupša Julinda o be a fetogile le gona o ile a bolela selo seo se ilego sa dira gore ke nagane kudu. O ile a re: “Ga ke sa nyaka tšhelete ya gago. Ke nyaka monna wa ka, ke nyaka gore tatago bana ba ka a be gona maphelong a bona.” Ke be ke maketše eupša o be a bolela nnete. Ke feditše mengwaga e mentši ke le kgole le lapa la ka. Le gona ke ile ka nagana ka bohloko bjoo ke bo kwelego ge ke be ke rakediša tšhelete. Ka gona ke ile ka fetoša bophelo bja ka gomme ka tlogela go gwerana le bagwera ba ka ba kgale.

 Seo se ilego sa nthuša ke ge ke be ke eya moo dihlatse tša Jehofa di kopanago gona le mosadi wa ka le barwa ba ka ba babedi. Ke ile ka kgahlwa ke botho bjo ba ilego ba mpontšha bjona, gomme seo se ile sa dira gore ke thome go ithuta Beibele.

 Ke ile ka ithuta ka Beibeleng gore “lerato la tšhelete ke modu wa mehuta ka moka ya dilo tše di gobatšago gomme ka go phegelela lerato le, ba bangwe ba ile ba arošwa tumelong gomme ba itlhabile gohle ka mahloko a mantši.” (1 Timotheo 6:9, 10) Ke ile ka kwešiša lengwalo le gabotse kudu! Ke ile ka itshola kudu ka diphetho tšeo ke di dirilego le gore ke ile ka kweša lapa la ka bohloko. (Bagalatia 6:7) Ge ke be ke ithuta ka lerato leo Jehofa le Morwa wa gagwe Jesu ba re ratago ka lona, ke ile ka fetoša tsela yeo ke bego ke phela ka yona. Ke ile ka thoma go se sa inaganela ke nnoši gomme ka naganela batho ba bangwe le go fetša nako ke na le lapa la ka.

 Ke ile ka holwa keletšo ya Beibele yeo e rego: “Tsela ya lena ya bophelo a e se be ya go rata tšhelete, ge le dutše le kgotsofetše ka dilo tše di lego gona.” (Baheberu 13:5) Gona bjale ke na le khutšo ya monagano le letswalo le le hlwekilego. Ke thabile kudu go feta le mathomong. Lapa la ka le tiile kudu e bile re bagwera.

 Ke be ke nagana gore ge re ka hwetša tšhelete e ntši re tlo thaba. Gona bjale ke kgona go bona kamoo go dira dilo tšeo di sego molaong le go rata tšhelete go dirilego gore ke ke kwe bohloko ka gona. Ga se ra huma eupša re hweditše selo sa bohlokwa kudu maphelong a rena e lego segwera se sebotse le Jehofa Modimo. Ge re hlankela Jehofa ka moka re le lapa, seo se a re thabiša.