Lengwalo la go ya ga Magalata 5:1-26
5 Kreste ke yene a makiyeng gore re lokologe. Byalo, yemaneng le tiyye fote le sa dumele go boyela lejokong la bobhantiti.
2 Nna Pawulo ke le botsa gore mo nkare le ya bollwa, tso Kreste a le makeleng tsona di ka sa le gelepe ka selo.
3 Ke ya boyelela fote ke re, monna ye mongwana le ye mongwana ye a bollwang wa gapeletsega gore a latelele Molawo.
4 Lune ba gore le nyaka go bitsiwa ba go loka ka taba la gore le latelela molawo, a le sa le selo ka ssoši le Kreste fote a ka sa sa le kwela go baba.
5 Re yemele gore re be ba go loka mahlong ga Modimo, tsotsone di nyoko kgonega ka moya wa go hlawolega le ka tumelo ya rune.
6 Ka gore mo nkare re selo ka ssoši le Kreste Jeso, a di na taba gore re bollwe kela a ra bollwa, selo se segolo ke mo re na le tumelo ya go sipidisana le go nyakanana.
7 Ke mo le maka dilo gabutši mathomisong.* Ke mang a makiyeng gore le lisetse go theetsela nnete?
8 Tso le di tšhutisang ke bo ba gore baa le thibelela a di tšwe ga Modimo ye a le bitsang.
9 Komelo ye nyana yi bidisa folawa ya go dubiwa ka mokana ga yona.
10 Ke ya di tšiba gore lune ba gore le selo ka ssoši le Morena le ka sa nagane ka mokgo mongwana mara ye mongwana le ye mongwana ye a le hlupang o nyoko yahludiwa go ya ka mokgo a tshwaneleng go yahludiwa ka gona.
11 Magageru, hala ke sa tšhutisa ka go bollwa ke mo ba ka sa nhlupegisi, fote le tso ke di tšhutisang tsa gore Jeso o kgwele phateng* ne di ka sa kwatisi motho.
12 Ke nabela nkare banna bo ba makang gore le kamake ba ka timaka gore ba sa sa belega.
13 Magageru le lokologiye, le sa berekisi go lokologa ga lune gore le thogo kgotsofatsa tso le di nabelang mara go nyakanana ga lune go le tšhofe gore le thogo makelana dilo tsa gabutši.
14 Ka gore Molawo ka mokana ga wona wo hlatolla ke taba ka yyoši, ya gore: “O nyake moyagelane wago ka mokgo o tinyakang ka gona.”
15 Mo le kene le kwisana go baba fote le hlupegisana, le bone gore le sa bolayane.
16 Byalo ke re, ariyeneng mahlong le yetetsa ke moya wa go hlawolega fote mo le maka tsotsone le ka sa nabele dilo tsa go sa yi ka tsela.
17 Ka taba la gore tso re di nabelang di ganetsana le moya wa go hlawolega, le moya wa go hlawolega wo ganetsana le tso re di nabelang, dilo tsowa a di gahlane, nka taba lo le sa makeng dilo tso le di nyakang.
18 Go tokegela gana hone, mo nkare o yetetsa ke moya wa go hlawolega a wo sa le ka tlase ga molawo.
19 Byalo dilo tso re di nabelang di fo ba lekgwaying, ke bonghwahla,* go sa yele, go ba le tšhinghi,*
20 go rapela medimo ya dithombhe, go maka tsa madimona, go hloyana, go kwata, go jelaselana, go fufulela, go phigisana, go sa kwane, go ya ka tso batho ba di tšhutisang,
21 go ba le mona, go tlayila, menyanya ya go sa lawolege le dilo tsa go tshwana le tsowa. Ke le botsa go sa le nako go fo tshwana le mo ke yye ka le pasopisa gore bo ba makang dilo tsowa ba ka sa kene Mmušong wa Modimo.
22 Ka nthoko ye nngwana, diyengwa tsa moya wa go hlawolega ke go nyakanana, go jabola, go beba, go lefisa pelo, go kwelana go baba, go loka, go ba le tumelo,
23 go temeka le go titshwara. A go na molawo wa go phigisana le dilo tsowa.
24 Go tokegela gana hone, bo ba gore ke ba Kreste Jeso ba kokotele mmele wa go sinya le dilo tso wo di nabelang phateng.
25 Mo nkare re phela ka go dumelelana le moya wa go hlawolega, koriyeneng mahlong re maka dilo ka mokgo moya wa go hlawolega wo nyakang re maka dilo ka gona.
26 A di nyake re ba le magetla, re sa phadisane le bangwana fote re sa jelaselane.
Ditwaba
^ Gabutšibutši ke “mo le taboga gabutši.”
^ Bala ga Dihlatollo Tsa Mantsu.
^ Ka Segerika ba re ke por·nei′a. Bala ga Dihlatollo Tsa Mantsu.
^ Ka Segerika ba re ke a·sel′gei·a. Bala ga Dihlatollo Tsa Mantsu.
