AmaKrestu weqiniso azimisele ukungavumeli nanyana yini namkha ubani abalisise ukulotjha uJehova. Siyaqiniseka bona nawe uzizwa njalo. Ukuthembeka kwakho kuqakathekile kuJehova. (Funda yoku-1 yeenKronike 28:9.) Ngibuphi ubujamo obungenza kube budisi ukuhlala uthembekile kuye begodu khuyini engakusiza uqalane nabo?

1. Abanye bangakwenza njani bona kube budisi ukuthembeka kuJehova?

Abanye abantu bazokulinga ukusilisisa ukulotjha uJehova. Bobani abangenza njalo? Babantu ebebalotjha uJehova begodu balisa ukumlotjha, nje bakhuluma amanga ngehlanganwakhe bona basenze singasakholwa. Babizwa ngokuthi ziinhlubuki. Godu abanye abarholi bezekolo barhatjha amanga ngathi, amanga lawo abangela abantu abangakatjheji ukuthi batjhiye iqiniso. Kuyingozi ukuphikisana neenhlubuki, ukufunda iincwadi zazo namkha ukufunda lokho ezikutlola ku-inthanethi, ukungena kumazinzolwazi wazo namkha ukubukela amavidiyo wazo. UJesu wakhuluma ngalabo abalinga ukuqeda abanye amandla wokulotjha uJehova ngokuthembeka, wathi: “Baliseni banjalo. Babarholi abaziimphofu. Nje-ke, nangabe isiphofu sinqophisa isiphofu, zombili zizokuwela ngemgodini.”—Matewu 15:14.

Kuthiwani nangabe umuntu esimaziko ukhethe ukungasaba nguFakazi kaJehova? Kungaba buhlungu khulu umuntu esimaziko nakangenza njalo. Umuntu loyo angasikatelela bona sikhethe yena namkha uJehova. Kufuze sihlale sizimisele ukuthembeka kuZimu kunakho koke. (Matewu 10:37) Yeke silalela umthetho kaJehova wokuthi singazihlanganisi nabantu abanjalo.—Funda yoku-1 kwebeKorinte 5:11.

2. Ngiziphi iinqunto esizithathako ezingenza kube budisi ukuthembeka kuJehova?

Ithando ngoJehova lizosenza sigegede ikolo yamanga. Imisebenzethu, iinhlangano esingaphasi kwazo namkha nanyana yini esiyenzako akukafuzi kubandakanyeke ekolweni yamanga. UJehova usiyelelisa uthi: “Phumani [eBhabhiloni eliKhulu], bantu bami.”—IsAmbulo 18:2, 4.

 FUNDA NGOKUNGENELELEKO

3. Tjheja abafundisi bamanga

Kufuze senzeni nasizwa izinto ezimbi ngehlangano kaJehova? Funda izAga 14:15, bese nicoca ngombuzo lo:

• Kubayini kufuze singakholwa koke esikuzwako?

Funda yesi-2 kaJwanisi 10, bese nicoca ngemibuzo le:

• Kufuze siziphathe njani iinhlubuki?

• Ngitjho nanyana singakhulumi neenhlubuki ubuso nobuso, ngiyiphi enye indlela esingamukela ngayo ifundiswazo?

• Ucabanga bona uJehova bekazozizwa njani nange silalela izinto ezimbi malungana naye namkha ihlanganwakhe?

4. Thembeka kuZimu umfowenu nakonako

Nange sizwa bona kunomuntu owenze isono esikhulu ebandleni, khuyini ekufuze sikwenze? Cabanga ngekambisolawulo esemThethweni kaZimu awunikela ama-Israyeli wekadeni. Funda uLevitikusi 5:1.

Njengombana iveseli litjengisile, nasifumana ukuthi kunomuntu owenze isono esikhulu, kufuze sitjele abadala lokho esikwaziko. Ngaphambi kobana wenze njalo, kungaba kuhle bona utjele umuntu loyo bona aye kubadala avume isono sakhe. Nakangakwenzi lokho, kufuze ukuthembeka kwethu kuJehova kusenze sitjele abadala lokho esikwaziko. Ukwenza njalo kutjengisa njani bona sithanda . . .

• uJehova uZimu?

• umuntu owonileko?

• abanye ebandleni?

 5. Phumani eBhabhiloni eliKhulu

Dlala IVIDIYO.

ISIRHUNYEZO

Bona sithembeke kuJehova, kufuze singazihlanganisi nabantu abangakathembeki kuye begodu sizihlukanise nekolo yamanga.

Buyekeza

• Kubayini kungakafuzi sibukele, sifunde namkha silalele okutjhiwo ziinhlubuki?

• Kufuze sibaphathe njani labo abangasafuni ukuba boFakazi bakaJehova?

• Singasilalela njani isiyeleliso sokubalekela ikolo yamanga?