UJehova nakasidalako wasipha isipho esihle, okulikghono lokukhuluma. Unendaba na nokuthi sisisebenzisa njani isiphweso? Iye unendaba! (Funda uJakopo 1:26.) Singalisebenzisa njani ikghono lethu lokukhuluma ngendlela ethabisa uJehova?

1. Kufuze sisisebenzise njani isipho sokukhuluma?

IBhayibheli lithi ‘sihlale sikhuthazana begodu sakhane.’ (1 Thesalonika 5:11) Bakhona na obacabangako abatlhoga ukukhuthazwa? Khuyini ongayenza bona bazizwe bangcono? Baqinisekise bona unendaba nabo. Mhlamunye ungabatjela okuthandako ngabo. Ukhona na umtlolo ocabanga ngawo ongakhuthaza umuntu omaziko? Minengi imitlolo ongakhetha kiyo. Khumbula nokuthi indlela otjho ngayo okuthileko ingakhuthaza abanye khulu. Yeke linga ukukhuluma ngomusa nangokuthobeka.—IzAga 15:1.

2. Khuyini ekungakafuzi sikhulume ngakho?

IBhayibheli lithi: “Kungaphumi ilizwi elibolileko emlonyenenu.” (Funda kwebe-Efesu 4:29.) Lokho kutjho bona asisebenzisi amezwi alumelako namkha sikhulume ngehloso yokulimaza abanye abantu. Akukafuzi sihlebe namkha sirhwayele abanye.—Funda izAga 16:28.

3. Khuyini engasisiza sikhulume amezwi akhuthazako?

Kanengi izinto esikhuluma ngazo ziveza lokho okuseenhliziyweni zethu nalokho esicabanga ngakho. (Lukasi 6:45) Yeke kufuze sidzimelele ezintweni ezakhako, okuzizinto ezilungileko, ezimsulwa, ezithandekako nezifanela ukudunyiswa. (Filipi 4:8) Bona sidzimelele ezintwenezi, kufuze sikhethe izinto esizithabisa ngazo nabangani bethu kuhle. (IzAga 13:20) Kuyasiza nokucabanga qangi ngaphambi kokukhuluma. Cabanga indlela amezwakho angenza abanye bazizwe ngayo. IBhayibheli ithi: “Ikulumo engakacatjangwa kuhle injengokuhlaba kwesabula, kodwana ilimu labahlakaniphileko liyalapha.”—IzAga 12:18.

 FUNDA NGOKUNGENELELEKO

4. Lawula indlela okhuluma ngayo

Ngasikhathi sikhuluma izinto esizisola ngazo. (Jakopo 3:2) Funda kwebeGalatiya 5:22, 23, bese nicoca ngemibuzo le:

• Ngibuphi ubuntu ongabuthandazela bona bukusize ulawule indlela okhuluma ngayo? Ubuntobu bungakusiza njani?

Funda yoku-1 kwebeKorinte 15:33, bese nicoca ngombuzo lo:

• Abangani bakho nezinto ozithabisa ngazo, zingayithinta njani indlela okhuluma ngayo?

Funda uMtjhumayeli 3:1, 7, bese nicoca ngombuzo lo:

• Kukuphi lapha kungaba kuhle ukuthula namkha ukulinda isikhathi esingcono bona utjho okuthileko?

 5. Khuluma izinto ezihle ngabanye

6. Iba nomusa nawukhuluma nomndenakho

ISIRHUNYEZO

Esikutjhoko kunamandla. Kufuze sicabangisise ngalokho esikutjhoko.

Buyekeza

• Ngiziphi ezinye iindlela ongasebenzisa ngazo amezwi bona usize abanye?

• Yikulumo enjani ofuna ukuyibalekela?

• Khuyini engasisiza bona sihlale sikhuluma izinto ezinomusa nezakhako?