Emalangeni alitjhumi ngemva kokuthi uJesu abuyele ezulwini, abafundi bakhe bamukela umoya ocwengileko. Bekumnyanya wePentekoste  33 C.E., abantu bebeze eJerusalema bavela endaweni ezihlukahlukeneko bazokugidinga. Pheze bekunabafundi bakaJesu abangaba li-120, bahlangene ekamarweni eliphezulu lemzini loyo. Kusesenjalo kwenzeka into erarako. Into enjengelangabi lomlilo yahlala phezu kweenhloko zabafundi, bebathoma ukukhuluma amalimi ahlukahlukeneko. Kwazwakala itjhada elingathi ngelomoya onamandla lazala indlu yoke.

Iimvakatjhi ezivela kezinye iinarha ebezize eJerusalema zalizwa nazo itjhadelo zagijimela ngendlini zifuna ukubona ukuthi kwenzekani. Zarareka khulu nazizwa abafundi bakhuluma amalimi la. Zathi: ‘Abantwaba bavela eGalile. Alo-ke kuza njani ukuthi bakhulume amalimi wethu wokubelethwa?’

Yeke uPitrosi nabanye abapostoli basikima bajama phambi kwewoma labantwaba. UPitrosi wahlathululela abantwaba ukuthi  uJesu wabulawa njani nokuthi uJehova wamvusa njani. UPitrosi wathi: ‘Nje uJesu sekasezulwini ngesidleni sakaZimu, usithululele nomoya ocwengileko njengokusithembisa kwakhe. Ngikho-ke nibone benezwa imikarisisomraro.’

Abantu bathatjiswa mamezwi atjhiwo nguPitrosi la, bambuza nokuthi: ‘Alo kufuze senzeni thina?’ Wathi kibo: ‘Tjhugulukani ezonweni zenu bese niyabhajadiswa ebizweni lakaJesu. Nizakwamukela nesipho somoya ocwengileko.’ Mhlokho kwabhajadiswa abantu pheze abangaba zii-3 000. Kusukela kwamhlokho, abafundi banda njalo eJerusalema. Basizwa mumoya ocwengileko abapostoli bathomisa amabandla ukwenzela bona bakwazi ukufundisa abafundi zoke izinto uJesu abafundisa zona nabayala ngazo.