UJehova watjala isimu endaweni ebizwa ngokuthi yi-Edeni. Isimu leyo beyizele amabhlomu, imithi neenlwana. Ngemva kwalokho, uZimu wadala umuntu wokuthoma, u-Adamu wamenza ngethuli wamphefumulela ngeempumulweni. Ngemva kwalokho, uyazi kwenzekani? U-Adamu waba mumuntu ophilako! UJehova wambeka esimini bona ayitlhogomele, bewamtjela nokuthi athiye zoke iinlwana amabizo.

UJehova wanikela u-Adamu umthetho oqakathekileko. Wathi: ‘Ungazidlela ngokuthanda kwakho kinanyana ngimuphi umuthi osesimini kodwana malungana nomuthi wokwazi okuhle nokumbi, ungadli kiwo. Ngombana mhlana udla kiwo nangambala uzokufa.’

Ngokukhamba kwesikhathi uJehova wathi: ‘Ngizokwenzela u-Adamu umsizi.’ Nje-ke wenza bona u-Adamu alale ubuthongo obukhulu, uZimu  wathatha elinye leembambo zakhe wamenzela umfazi. Ibizo lakhe kwaba ngu-Eva. U-Adamu no-Eva baba mndeni wokuthoma. Wazizwa njani u-Adamu nakathola umfazi loyo? U-Adamu wathaba khulu kwamambala, wabe wathi: ‘Qala bona uJehova wenzeni ngebambo lami! Emaswapheleni nangu umuntu onjengami.’

UJehova watjela u-Adamu no-Eva ukuthi babe nabantwana bazalise iphasi. Bekafuna bathabele ukusebenza bobabili, benze iphasi loke libe yipharadesi libe lihle njengesimu ye-Edeni. Kodwana izinto azange zibe njalo. Kubayini? Sizokufunda okungeziweko esihlokweni esilandelako.