Indaba 19: UJakobho Unomndeni Omkhulu
QALA umndeni omkhulu lo. La, madodana kaJakobho ayi-12, begodu unawo namadodakazi. Uyawazi amabizo wabanye babantwanabo? Akhe sifunde ngabanye babo.
ULeya wabeletha uRubeni, uSimeyoni, uLevi noJuda. Lokha uRaheli abona bona akafumani abantwana, lokho kwamphatha kumbi khulu. Ngalokho wanikela ngencekukazi yakhe uBhiliha kuJakobho, begodu uBhiliha waba namadodana amabili, uDani noNafethali. ULeya naye wanikela ngencekukazi yakhe uZilipha kuJakobho, begodu uZilipha waba nabantwana, uGadi no-Asheri. ULeya emaswapheleni waba namanye godu amadodana, u-Isakhari noZebuloni.
URaheli naye emaswapheleni waba nomntwana, wambiza bona nguJosefa. Ngokukhamba kwesikhathi sizokufunda okunengi ngoJosefa ngombana waba mumuntu oqakathekileko. La, madodana kaJakobho ayi-11 awafumana nakahlala noyise kaRaheli uLabani.
UJakobho gade anamadodakazi kodwana iBhayibhili isinikela ibizo lendodakazi yinye, uDina.
Isikhathi safika lapho uJakobho atjhiya uLabani wabuyela eKanana. Ngalokho wathatha umndeni wakhe omkhulu begodu nefuyo yakhe yezimvu enengi nomhlambi weenkomo wathomisa ikhambo elide.
Ngemva kobanyana uJakobho nomndeni wakhe babuyile eKanana, uRaheli waba nendodana. Indodana le, wayitholela endleleni. URaheli waqalana nobudisi obukhulu wafa ngesikhathi abeletha indodanakhe. Kodwana indodana le yaphila. UJakobho wayibiza bonyana nguBhenjamini.
Sifuna ukukhumbula amabizo wamadodana kaJakobho ayi-12 ngombana soke isitjhaba sama-Israyeli siphuma kiwo. Kuhle-kuhle iintjhaba eziyi-12 zama-Israyeli zibizwa ngamabizo wamadodana kaJakobho ayi-10, namadodana amabili kaJosefa. U-Isaka waphila iimnyaka eminengi ngemva kobana amadodana la abelethiwe, kungenzeka bona kwamthabisa khulu ukuba nabazukulu abanengi kangaka. Kodwana nje khesibone bona kwenzekani kumzukulwanakhe uDina.
Genesisi 29:32-35; 30:1-26; 35:16-19; 37:35.
Iimbuzo
- Gade babobani amabizo wamadodana kaJakobho asithathandu awafumana kumkakhe wokuthoma, uLeya?
- Bobani amadodana amabili incekukazi kaLeya, uZilipha awabelethela uJakobho?
- Gade babobani amabizo wamadodana amabili incekukazi kaRaheli, uBhiliha awabelethela uJakobho?
- Bobani amadodana amabili uRaheli awabeletha, kodwana kwenzekani lokha nakabeletha indodana yesibili?
- Ngokuya ngesithombesi, mangaki amadodana uJakobho anawo, begodu kwavelani kiwo?
Iimbuzo engezelelekileko
- Funda uGenesisi 29:32-35; 30:1-26; no- 35:16-19.
Njengombana sibonile endabeni yamadodana kaJakobho ayi-12, eenkhathini zamandulo amadodanawamaHebheru gade bajwayele ukuwathiya njani?
- Funda uGenesisi 37:35.
Namtjhana kunguDina kwaphela okukhulunywa ngaye eBhayibhilini, sazi njani bona uJakobho gade anamadodakazi angaphezu koyedwa?
