Mtjhumayeli 3:1-22
3 Kunesikhathi esibekiweko sayo yoke into,Kunesikhathi sayo yoke into ngaphasi kwezulu:
2 Kunesikhathi sokubelethwa nesikhathi sokuhlongakala;Kunesikhathi sokutjala nesikhathi sokuruthula okutjaliweko;
3 Kunesikhathi sokubulala nesikhathi sokupholisa;Kunesikhathi sokugiriza nesikhathi sokwakha;
4 Kunesikhathi sokulila nesikhathi sokuhleka;Kunesikhathi sokurhahlawula nesikhathi sokugida;
5 Kunesikhathi sokulahla amatje nesikhathi sokuwabuthelela;Kunesikhathi sokugona nesikhathi sokungafuni ukugona
6 Kunesikhathi sokufuna nesikhathi sokuqala okuthileko njengokulahlekileko;Kunesikhathi sokubeka nesikhathi sokulahla;
7 Kunesikhathi sokudabula+ nesikhathi sokuthunga;+Kunesikhathi sokuthula nesikhathi sokukhuluma;+
8 Kunesikhathi sokuthanda nesikhathi sokuhloya;+Kunesikhathi sepi nesikhathi sokuthula.
9 Isisebenzi sizuzani kiyo yoke imisebenzaso?+
10 Ngiwubonile umsebenzi uZimu awunikele amadodana wabantu bona awenze.
11 Wenze koke kwaba kuhle ngesikhathi sakhona.+ Wenze abantu bafuna ukuphila ngokungapheliko* nanyana kunjalo angeze bawufumane umsebenzi uZimu weqiniso awenzileko kusukela ekuthomeni bekube sekupheleni.
12 Ngiphethe ngokuthi ayikho into engcono ngaphandle kokuthi bathabe, benze okuhle nabasaphilako+
13 nokuthi woke umuntu kufuze adle, asele, athabele woke umsebenzakhe obudisi. Ngombana lokho kusisipho sakaZimu.+
14 Sengiyazi bona yoke into uZimu weqiniso ayenzako izokuhlala ngokungapheliko. Akunalitho elingangezelelwa kiyo begodu akunalitho elingakhutjhwa kiyo. UZimu weqiniso ukwenze ngendlela le bona abantu bamsabe.+
15 Nanyana yini eyenzekako yakhe yenzeka nanyana yini ezako kheyabakhona+ kodwana uZimu weqiniso ufuna ebekugijinyiswa.*
16 Ngibone nalokhu ngaphasi kwelanga: Endaweni yobulungiswa bekunokukhohlakala begodu endaweni yokulunga bekunokukhohlakala.+
17 Yeke ngathi ehliziywenami: “UZimu weqiniso uzokwahlulela abalungileko nabakhohlakeleko,+ ngombana kunesikhathi esifaneleko sawo woke umsebenzi namkha sezinto ezizokwenzeka.”
18 Godu ngathi ehliziywenami malungana namadodana wabantu: “UZimu weqiniso uzowalinga awatjengise bona afana neenlwana.”
19 Ngombana kunesiphetho sabantu nesiphetho seenlwana; koke kunesiphetho esifanako.+ Njengombana okhunye kuhlongakala nokhunye kuyahlongakala begodu koke kunommoya munye.+ Yeke umuntu akazidluli ngalitho iinlwana ngombana koke kulilize.
20 Koke kuya endaweni efanako.+ Koke kubuya ethulini+ begodu koke kubuyela ethulini.+
21 Kuhlekuhle ngubani owaziko ukuthi ummoya wabantu ukhuphukela phezulu nokuthi ummoya weenlwana wehlela ehlabathini?+
22 Godu ngabona ukuthi ayikho into engcono kunokuthi umuntu athabele umsebenzakhe ngombana ngiloyo umvuzwakhe+ ngombana ngubani ongamenza abone ukuthi yini ezokwenzeka nasele angasekho?+
Imitlolo Ephasi
^ NgesiHebheru, “Wafaka ukuphila okungapheliko eenhliziyweni zabo.”
^ Namkha kungenzeka “okudlulileko.”
