Jotjhuwa 18:1-28
18 Ngalokho yoke ihlangano yakwa-Israyeli yahlangana eTjhilo,+ yahloma itende lokuhlangana lapho,+ ngombana besele iyihlulile inarha.+
2 Kodwana bekuseseneenkoro ezilikhomba eziseleko kwa-Israyeli ilifa lazo ebelingakabiwa.
3 Yeke uJotjhuwa wathi kuma-Israyeli: “Nizokuriyada bekube nini ukuyokuthatha inarha uJehova uZimu wabokhokho benu aniphe yona?+
4 Nginikelani amadoda amathathu ekorweni ngayinye bona ngiwathume; kufuze akhambe adabule inarha begodu athale umebhayo ngokuya ngokwelifa lawo. Ngemva kwalokho, abuye kimi.
5 Kufuze ayihlukaniselane ibe ziingcenye ezilikhomba.+ UJuda uzokuhlala enarhenakhe engesewula+ begodu indlu kaJosefa izokuhlala enarhenayo engetlhagwini.+
6 Nina-ke, thalani umebhe wenarha ube ziingcenye ezilikhomba niwulethe kimi, ngizonenzela ifumbe+ phambi kwakaJehova uZimethu.
7 Kodwana amaLevi angeze anikelwe isabelo hlangana nani,+ ngombana ilifa lawo+ kukuba baphristi bakaJehova; uGadi, uRubeni nesiquntu sekoro yakwaManase+ sebalithethe ilifa labo abalinikelwe nguMosi inceku kaJehova ngepumalanga yeJordani.”
8 Amadoda lawo azilungiselela bona akhambe begodu uJotjhuwa wayala labo ebebayokuthala umebhe wenarha wathi: “Khambani nidabule inarha begodu nithale umebhayo, ngemva kwalokho nibuye kimi, ngizonenzela ifumbe phambi kwakaJehova khonapha eTjhilo.”+
9 Yeke amadoda lawo aphuma akhamba inarha yoke, ayithala ngokwamadorobho yaba ziingcenye ezilikhomba, azitlola encwadini. Ngemva kwalokho, abuyela kuJotjhuwa ekampeni eTjhilo.
10 UJotjhuwa wabenzela ifumbe eTjhilo phambi kwakaJehova.+ UJotjhuwa wabela ama-Israyeli inarha ngokweengcenye zawo khonapho.+
11 Ifumbe yadla ikoro yakwaBhenjamini ngokwemindenayo begodu inarha eyayifumana ngefumbe beyihlangana nabantu bakwaJuda+ nabantu bakwaJosefa.+
12 Ngehlangothini elingetlhagwini, umkhawulwayo bewuthoma eJordani, ukhuphukela emkhuphukelweni weJerikho+ ngetlhagwini bese ukhuphukela entabeni ngetjingalanga, bewufika nemmangweni weBhethe-Aveni.+
13 Godu umkhawulo lo bewuraga usuka lapho uya eLuzi, esewula yomkhuphukela weLuzi, okutjho iBhetheli;+ umkhawulo lo bewehlela e-Atharothi-Adara+ entabeni engesewula yeBhethe-Rhoroni engeNzasi.+
14 Umkhawulo lo bewufika ngehlangothini elingetjingalanga begodu bewuzomba uye ngesewula ukusuka entabeni eqale iBethe-Rhoroni ngesewula; bewuphelela eKhiriyathi-Bhali,+ okutjho iKhiriyathi-Jeyarimu, idorobho lakwaJuda. Leli lihlangothi elingetjingalanga.
15 Ihlangothi elingesewula belithoma emaphethelweni weKhiriyathi-Jeyarimu begodu umkhawulo bewufika ngetjingalanga; bewukhamba bewuyokufika emthonjeni wamanzi weNefitowarhi.+
16 Umkhawulo lo bewehlela emaphethelweni wentaba eqale umRhoba weNdodana kaHinomu,+ osemRhobeni wamaRafa+ ngetlhagwini, bewehlela nemRhobeni kaHinomu, emkhuphukelweni wamaJebusi+ ongesewula begodu bewehlela e-Eni-Rogeli.+
17 Godu bewusuka ngetlhagwini bewuyokufika e-Eni-Tjhemetjhi udlulele eGelilothi, ephambi komkhuphukela we-Adumimi,+ bewehlela nelitjeni+ lakaBhohani+ indodana kaRubeni.
18 Bewuraga uye ngemkhuphukelweni ongetlhagwini phambi kwe-Araba begodu wehlela ne-Araba.
19 Umkhawulo lo bewutjhinga emkhuphukelweni ongetlhagwini yeBhethe-Rhogila+ begodu bewuphelela ethekwini elingetlhagwini leLwandle leTswayi*+ ngemaphethelweni angesewula yeJordani. Lo bekumkhawulo ongesewula.
20 IJordani beyimkhawulwayo ongepumalanga. Leli bekulilifa leenzukulwana zakwaBhenjamini ngokwemindenazo, ukuya ngemikhawulwazo emahlangothini woke.
21 Amadorobho wekoro yakwaBhenjamini ngokwemindenayo bekungila: iJerikho, iBhethe-Rhogila, i-Emekhi-Ketsitsi,
22 iBhethe-Araba,+ iTsemarayimu, iBhetheli,+
23 i-Avimu, iPara, i-Ofira,
24 iKefara-Hamoni, i-Ofini neGeba+ okumadorobho ali-12 neendawo zawo zokuhlala.
25 IGibiyoni,+ iRama, iBherothi,
26 iMitsiphe, iKefira, iMotsa,
27 iRekhemu, iJiripiyeli, iTarala,
28 iTsela,+ i-Elefi, iJebusi, okutjho iJerusalema,+ iGibeya+ neKhiriyathi okumadorobho ali-14 neendawo zawo zokuhlala.
Leli bekulilifa leenzukulwana zakwaBhenjamini ngokwemindenazo.
Imitlolo Ephasi
^ Kutjho iLwandle eliFileko.
