Joromiya 26:1-24
26 Ekuthomeni kokubusa kwakaJehoyakhimu+ indodana kaJosiya ikosi yakwaJuda kweza ilizwi elivela kuJehova lithi:
2 “Nakhu uJehova akutjhoko, ‘Jama esirhodlweni sendlu kaJehova. Ukhulume malungana nabo boke abantu bemadorobheni wakwaJuda abeza endlini kaJehova ukuzomlotjha, ubatjele koke engikuyala ngakho; ungatjhiyi litho.
3 Mhlamunye bazokulalela ngamunye wabo aphenduke endlelenakhe embi begodu ngitjhugulule umkhumbulwami malungana nehlekelele engizimisele ukubalethela yona ngebanga lezenzo zabo ezimbi.+
4 Yitjho lokhu kibo: “Nakhu uJehova akutjhoko, ‘Nangabe angekhe ningilalele ngokulandela umthethwami engininikele wona,
5 ngokulalela amezwi weencekuzami abaphorofidi, engibathumele kini kanengi, eningakhenge nibalalele,+
6 nje-ke ngizokwenza indlu le ifane neTjhilo,+ ngenze idorobheli into eqalekisiweko kizo zoke iintjhaba ephasini.’”’”+
7 Abaphristi, abaphorofidi nabo boke abantu bamuzwa uJoromiya nakakhuluma amezwi endlini kaJehova.+
8 UJoromiya nakaqeda ukukhuluma woke amezwi uJehova amyale ngawo bona awakhulume kibo boke abantu, ngemva kwalokho abaphristi nabaphorofidi nabo boke abantu bambhudungela bathi kuye, “Ngokuqinisekileko uzokufa.
9 Kubayini uphorofide egameni lakaJehova wathi, ‘Indlu le izokufana neTjhilo, begodu idorobho lizokutjhatjalaliswa lisale linganazakhamuzi’?” Begodu boke abantu babungelela uJoromiya endlini kaJehova.
10 Amakhosana wakwaJuda nakezwa amezwi la, eza avela ngendlini yekosi aya ngendlini kaJehova ahlala phasi ebungenweni besango elitjha lakaJehova.+
11 Abaphristi nabaphorofidi bathi emakhosaneni nakibo boke abantu: “Indoda le kufuze ifumane isigwebo sokufa,+ ngebanga lokuthi iphorofide ngokujamelene nedorobheli njengombana nani nizizwele ngeendlebe zenu.”+
12 Nje-ke uJoromiya wathi kiwo woke amakhosana nakibo boke abantu: “NguJehova ongithumele bona ngiphorofide woke amezwi eniwazwileko+ ngokujamelene nendlu le nedorobheli.
13 Yeke phendukani eendleleni nezenzweni zenu nilalele ilizwi lakaJehova uZimenu, begodu uJehova uzokutjhugulula umkhumbulwakhe malungana nehlekelele ayikhulume ngokujamelene nani.+
14 Nakungimi, ngisesandleni senu. Yenzani kimi nanyana yini ebonakala iyihle begodu ilungile emehlwenenu.
15 Kufuze nazi ngokuqinisekileko ukuthi naningibulalako, nizokuletha iingazi ezinganamlandu kini edorobheneli nezakhamuzini zalo, ngombana ngokuqinisekileko nguJehova ongithumileko bona ngikhulume woke amezwi la eniwezwako.”
16 Nje-ke amakhosana nabo boke abantu bathi kubaphrisi nakubaphorofidi: “Indoda le akukafuzi ifumane isigwebo sokufa, ngombana ikhulume nathi egameni lakaJehova uZimethu.”
17 Ngaphezu kwalokho, abanye abadala benarha basikima bathoma ukuthi kilo loke ibandla labantu:
18 “UMikha+ wakwaMoretjheti waphorofida emalangeni weKosi yakwaJuda uHezekiya,+ wathi kibo boke abantu bakwaJuda, ‘Nakhu uJehova wamabutho akutjhoko:
“IZiyoni lizokulinywa njengesimu,IJerusalema lizokuba marubhi,+Intaba yendlu kaZimu izokuba njengeendawo eziphakemeko ehlathini.”’+
19 “Inga-kghani iKosi yakwaJuda uHezekiya nawo woke uJuda bambulala? Inga-kghani akhenge basabe uJehova begodu babawe umusa kaJehova? Bona uJehova atjhugulule umkhumbulwakhe malungana nehlekelele akhulume ngayo ngokujamelene nabo?+ Nje-ke sizibizela ihlekelele ekulu.
20 “Bekunenye indoda eyaphorofida egameni lakaJehova, u-Uriya indodana kaTjhemaya weKhiriyathi-Jeyarimu,+ owaphorofida ngokujamelene nedorobheli nangokujamelene nenarha le ngamezwi afana newakaJoromiya.
21 IKosi uJehoyakhimu+ nawo woke amadoda anamandla namakhosana bezwa amezwi la, begodu ikosi yafuna ukumbulala.+ U-Uriya nakezwa lokhu wathukwa begodu wabalekela eGibhide.
22 Nje-ke iKosi uJehoyakhimu yathumela u-Elinathani+ indodana ka-Akibori namanye amadoda bona bakhambe naye eGibhide.
23 Bambuyisa u-Uriya eGibhide, bamusa eKosini uJehoyakhimu owamhlahlela ngesabula,+ wathatha isidumbu sakhe wasifaka ethuneni labantu abavamileko.”
24 Kodwana u-Arhikhamu+ indodana kaTjhafani+ wavikela uJoromiya bona anganikelwa ebantwini abafuna ukumbulala.+
