IsAmbulo Esiya KuJwanisi 19:1-21
19 Ngemva kwalokhu ngezwa ebekunjengelizwi lesiqubuthu esikhulu ezulwini. Besithi: “Dumisani uJah!*+ Isindiso nephazimulo namandla kungekwakaZimethu
2 ngombana izahlulelo zakhe ziliqiniso begodu zilungile.+ Wahlulele ingwadla ekulu eyonakalise iphasi ngokuziphatha kwayo kumbi ngokomseme* begodu ubuyiselele iingazi zeenceku zakhe ezisezandleni zayo.”+
3 Khonokho satjho ihlandla lesibili sathi: “Dumisani uJah!*+ Intuthu ephuma kilo izokusolo ikhuphuka bekube ngokungapheliko.”+
4 Abadala abama-24+ neembunjwa ezine+ baguqa balotjha uZimu ohlala esihlalweni sobukhosi begodu bathi: “Amen! Dumisani uJah!”*+
5 Godu, kwazwakala ilizwi esihlalweni sobukhosi lithi: “Dumisani uZimethu, noke nina nceku zakhe,+ enimsabako, abancani nabakhulu.”+
6 Godu ngezwa obekuzwakala njengelizwi lesiqubuthu esikhulu nanjengetjhada lamanzi amanengi nanjengetjhada lokuraramba kwezulu okukhulu. Sathi: “Dumisani uJah*+ ngombana uJehova* uZimethu, uMninimandla Woke,+ sekathome ukubusa njengekosi!+
7 Asithabeni, sijekezele begodu simphazimulise ngombana umtjhado weMvana sewufikile nomkayo sekazilungisile.
8 Iye, unikelwe bona avunule ngelineni eliphazimulako, elihlwengileko nelisezingeni eliphezulu ngombana ilineni elisezingeni eliphezulu lifanekisela izenzo ezilungileko zabacwengileko.”+
9 Ingilozi yathi kimi, “Tlola uthi: Bayathaba labo abamenywe esidlweni santambama somtjhado weMvana.”+ Godu yathi kimi: “Lawa mamezwi aliqiniso kaZimu.”
10 Khonokho ngaguqa eenyaweni zayo bona ngiyilotjhe. Kodwana yathi kimi: “Yelela! Ungakwenzi lokho!+ Ngiyinceku nje kwaphela ekunye nawe nabafowenu abanomsebenzi wokufakaza ngoJesu.+ Lotjha uZimu!+ Ngombana ubufakazi obumalungana noJesu ngibo obuphefumulela isiphorofido.”+
11 Ngabona izulu livulekile, qala, bekunenjomani emhlophe.+ Loyo ohlezi phezu kwayo bekabizwa ngokuthi ngoThembekileko+ noneQiniso,+ uyahlulela begodu alwe ipi yokulunga.+
12 Amehlwakhe alilangabi lomlilo,+ kanti ehlokwakhe kuneenhlohlo ezinengi. Utlolwe igama okunganamuntu olaziko ngaphandle kwakhe,
13 umbethe isambatho sangaphandle esinindwe* ngeengazi, ubizwa ngokuthi nguLizwi+ kaZimu.
14 Godu amabutho asezulwini bekamlandela ngeenjomani ezimhlophe, bewambethe ilineni elimhlophe, elihlwengileko nelisezingeni eliphezulu.
15 Emlonyenakhe kuphuma isabula ebukhali, ede+ azokutjhabalalisa ngayo iintjhaba begodu uzozelusa ngentonga yesimbi.+ Ngaphezu kwalokho, ugadanga ubutlhodlhelo bewayini belaka lokusilingeka kwaZimu uMninimandla Woke.+
16 Esambathweni sakhe sangaphandle, kwamambala, enyongenakhe, kutlolwe igama elithi, iKosi yamakhosi noMbusi wababusi.+
17 Ngabona nengilozi ijame elangeni, irhuwelela ngelizwi elikhulu ithi kizo zoke iinyoni eziphapha emkayini: “Yizani lapha, buthanani ndawonye esidlweni santambama esikhulu sakaZimu+
18 bona nizokudla inyama yamakhosi nenyama yabalawuli bamabutho nenyama yabantu abanamandla+ nenyama yeenjomani neyalabo abazikhweleko+ nenyama yabo boke, yabatjhaphulukileko neyeengqila neyabancani nabakhulu.”
19 Ngabona nesibandana namakhosi wephasi namabuthwawo babuthene ndawonye bona balwe ipi naloyo okhwele injomani nebutho lakhe.+
20 Isibandana sabanjwa kunye nomphorofidi wamala+ owenza iimbonakaliso phambi kwaso adurhisa ngazo labo abafumene itshwayo lesibandana+ nalabo abalotjha umfanekiswaso.+ Bobabili baphoswa basaphila ngelitsheni elivutha umlilo nesibabuli.+
21 Kodwana abanye babulawa ngesabula ede ebeyiphuma emlonyeni waloyo okhwele injomani.+ Zoke iinyoni zasutha ngenyamabo.+
Imitlolo Ephasi
^ Namkha “Haleluya!” Elithi “Jah” sirhunyezo segama elithi Jehova.
^ NgesiGirigi, yi-por·nei′a. Qala Ihlathululo.
^ Namkha “Haleluya!” Elithi “Jah” sirhunyezo segama elithi Jehova.
^ Namkha “Haleluya!” Elithi “Jah” sirhunyezo segama elithi Jehova.
^ Namkha “Haleluya!” Elithi “Jah” sirhunyezo segama elithi Jehova.
^ Namkha kungenzeka “esifafazwe.”
