Eksodusi 40:1-38
40 UJehova wathi kuMosi:
2 “Ngelanga lokuthoma enyangeni yokuthoma, kufuze ujamise ithaberinakeli okulitende lokuhlangana.+
3 Faka umFaji wobuFakazi kilo+ begodu uwusithe ngerharideni.+
4 Ufake itafula,+ uhlalise kuhle izinto zalo, ungenise ilithi lesibani,+ ukhanyise neembani zalo.+
5 Ngemva kwalokho ubeke i-aldara legolide lepepho+ phambi komfaji wobuFakazi begodu ufake irharideni ebungenweni bethaberinakeli.+
6 “Kufuze ubeke i-aldara lomnikelo otjhiswako+ phambi kobungeno bethaberinakeli, okulitende lokuhlangana,
7 ubeke isitja sokuhlambela hlangana kwetende lokuhlangana ne-aldara, uthele amanzi ngakiso.+
8 Ngemva kwalokho, wenze isirhodlo+ magega nalo begodu ufake irharideni+ ebungenweni besirhodlo.
9 Uthathe amafutha wokuzesa+ uzese ithaberinakeli nakho koke okukilo,+ ulicwengise nezitja zalo zoke ukwenzela bona libe yinto ecwengileko.
10 Uzese i-aldara lomnikelo otjhiswako nazo zoke izitja zalo bewulicwengise ukwenzela bona libe li-aldara elicwengeke khulu.+
11 Uzese nesitja nesisekelo saso, uzicwengise.
12 “Ngemva kwalokho, ulethe u-Aroni namadodanakhe eduze nobungeno betende lokuhlangana, ubahlambise.+
13 Wembathise u-Aroni izambatho ezicwengileko,+ umzese+ bewumcwengise bona abe mphristami.
14 Ngemva kwalokho, utjhideze amadodanakhe, uwembathise iimphuraphura.+
15 Kufuze uwazese njengombana uzese uyise+ ukwenzela bona abe baphristi bami begodu ukuzeswa kwawo bona abe baphristi, kuzokuhlala kusebenza neenzukulwaneni zawo.”+
16 UMosi wenza ngokuvumelana nakho koke uJehova amyale ngakho.+ Wenza njalo.
17 Enyangeni yokuthoma emnyakeni wesibili ngelanga lokuthoma lenyanga ithaberinakeli lajanyiswa.+
18 UMosi nakajamisa ithaberinakeli, wafaka iinsekelo zalo+ phasi, wajamisa amafremu,+ wafaka iinqabo,+ wajamisa iinsika.
19 Wendlala itende+ phezu kwethaberinakeli, wabeka isigubuzeso+ setende phezu kwalo, wenza njengombana uJehova amyalile.
20 Ngemva kwalokho, wathatha ubuFakazi+ wabufaka ngemFajini,+ wabeka iingodo+ emFajini bewabeka isivalo+ phezu komFaji.+
21 Wangenisa umFaji ngethaberinakeleni, wafaka irharideni+ lasitha umfaji wobuFakazi+ njengombana uJehova ayale uMosi.
22 Wangenisa itafula+ elingetendeni lokuhlangana elingehlangothini langetlhagwini yethaberinakeli ngaphandle kwerharideni,
23 wabeka uburotho+ obubekwa phezu kwetafula phambi kwakaJehova, njengombana uJehova ayale uMosi.
24 Wabeka ilithi lesibani+ ngetendeni yokuhlangana phambi kwetafula, ngehlangothini langesewula lethaberinakeli.
25 Wakhanyisa iimbani+ phambi kwakaJehova njengombana uJehova ayale uMosi.
26 Wabeka i-aldara legolide+ ngetendeni lokuhlangana phambi kwerharideni,
27 ukwenzela bona u-Aroni atjhisele ipepho enuka kamnandi kilo,+ njengombana uJehova ayale uMosi.
28 Ngemva kwalokho, wafaka irharideni+ ebungenweni bethaberinakeli.
29 Wabeka i-aldara lomnikelo otjhiswako+ ebungenweni bethaberinakeli, okulitende lokuhlangana ukwenzela bona atjhisele umnikelo otjhiswako+ nomnikelo weenthoro kilo njengombana uJehova ayale uMosi.
30 Wabeka isitja sokuhlambela hlangana kwetende lokuhlangana ne-aldara, wathela amanzi wokuhlamba ngaphakathi kwaso.+
31 UMosi no-Aroni namadodanakhe bahlamba izandla neenyawo zabo ngesitjenapho.
32 Bekuthi nabangena ngetendeni lokuhlangana namkha nabatjhidela e-aldareni bahlambe+ njengombana uJehova ayale uMosi.
33 Emaswapheleni wajamisa isirhodlo+ magega nethaberinakeli ne-aldara wafaka irharideni ebungenweni besirhodlo.+
UMosi wawuqeda njalo-ke umsebenzi.
34 Ilifu lathoma ukugubuzesa itende lokuhlangana begodu iphazimulo kaJehova yazala ithaberinakeli.+
35 UMosi bekangakghoni ukungena ngetendeni lokuhlangana ngombana ilifu beliphezu kwalo nephazimulo kaJehova beyizele ithaberinakeli.+
36 Bekuthi ilifu naliphakamako lisuka ethaberinakeli, ama-Israyeli afuduse ikampawo, bewenza njalo kilo loke ikhambo lawo.+
37 Kodwana nalingaphakamiko, bewangayifudusi ikampawo bekube kulapho liphakama.+
38 Ngombana ilifu lakaJehova beliphezu kwethaberinakeli emini, ebusuku kube khona umlilo phezu kwalo phambi kwendlu ka-Israyeli yoke, kilo loke ikhambo lawo.+
