Eksodusi 24:1-18
24 Yeke yathi kuMosi: “Khuphukela kuJehova, wena no-Aroni, uNadabi u-Abihu+ nabadala bakwa-Israyeli abama-70, nikhothame nisesekude.
2 NguMosi kwaphela okufuze atjhidele kuJehova; kodwana abanye akukafuzi batjhidele nabantu bakwa-Israyeli akukafuzi bakhuphuke naye.”+
3 Nje-ke uMosi weza, watjela abantu woke amezwi kaJehova nemithethwakhe,+ abantu baphendula ngelizwi linye bathi: “Koke uJehova akukhulumileko sizimisele ukukwenza.”+
4 UMosi watlola phasi woke amezwi kaJehova.+ Ngemva kwalokho wavuka ekuseni khulu wayokwakha i-aldara enzasi kwentaba neensika ezili-12 ngokuvumelana neentjhaba ezili-12 zakwa-Israyeli.
5 Ngemva kwalokho, uMosi wakhetha amasokana wakwa-Israyeli, benza iminikelo etjhiswako nemihlatjelo yeenkunzi bona ibe mihlatjelo yetjhebiswano+ kuJehova.
6 UMosi wathatha ingcenye yeengazi wazithela ngeenkotlelweni, kwathi eziseleko wazifafaza phezu kwe-aldara.
7 UMosi wathatha incwadi yesivumelwano wayifundela abantu.+ Abantu bathi: “Koke uJehova akukhulumileko sizimisele ukukwenza nokukulalela.”+
8 Nje-ke uMosi wathatha iingazi wazifafaza phezu kwabantu+ wathi: “Lezi ziingazi zesivumelwano uJehova asenze nani ngokuvumelana nawo woke amezwi la.”+
9 UMosi, u-Aroni, uNadabi, u-Abihu nabadala bakwa-Israyeli abama-70 bakhuphuka,
10 babona uZimu wakwa-Israyeli.+ Ngaphasi kweenyawo zakhe kunokungathi mgangadelo wesafire ucwengeke njengezulu.+
11 UZimu akhenge alimaze amadoda wakwa-Israyeli ahlonitjhwako lawo,+ abona umbono kaZimu weqiniso begodu adla bewasela.
12 UJehova wathi kuMosi: “Yiza kimi entabeni bewuhlale khona. Ngizokunikela amatje engizokutlola kiwo imithetho nemilayo engizokufundisa ngayo ama-Israyeli.”+
13 UMosi nomsizakhe uJotjhuwa basikima,+ uMosi wakhuphukela entabeni kaZimu weqiniso.+
14 Watjela abadala bakwa-Israyeli wathi: “Nina silindani lapha besibuye.+ U-Aroni noRhuri+ basele nani. Nje-ke nanyana ngubani onomraro afuna ukuwusa ebahlulelini akaye kibo.”+
15 Yeke uMosi wakhuphukela entabeni ilifu liyigubuzesile.+
16 Iphazimulo kaJehova+ yahlala phezu kweNtaba iSinayi+ nelifu layigubuzesa amalanga asithandathu. Kwathi elangeni lekhomba uZimu aselifini wabiza uMosi.
17 Ema-Israyelini ebewabukele, iphazimulo kaJehova beyinjengomlilo omkhulu esiqongolweni sentaba.
18 Nje-ke uMosi wangena elifini wakhuphukela entabeni.+ Wahlala lapho amalanga ama-40 nobusuku obuma-40.+
