Eksodusi 21:1-36
21 “Le mithetho ekufuze uyidlulisele kiwo:+
2 “Nawuthenga isigqila esimHebheru+ kufuze sibe sigqila iminyaka esithandathu kodwana emnyakeni wekhomba kufuze sitjhatjhululwe ngaphandle kokubhadela litho.+
3 Nangabe size sodwa sizokukhamba sisodwa njalo kodwana nangabe sinomfazi sizokukhamba naye.
4 Nangabe umphathi usinikela umfazi begodu umfazi lo asibelethele amadodana namadodakazi, umfazi nabantwana bazokuba ngebomphathi kuthi sona sikhambe sisodwa.+
5 Kodwana nangabe isigqila sithi, ‘Ngiyamthanda umphathami, umfazami namadodanami, nje-ke angifuni ukutjhatjhululwa,’+
6 umphathaso kufuze asilethe phambi kwakaZimu weqiniso. Ngemva kwalokho asisamise emnyango namkha egosenini asithumbuse indlebe ngesungulu ukwenzela bona sibe sigqila somphathaso ngokungapheliko.
7 “Umuntu nakathengisa indodakazakhe bona ibe sigqila angekhe itjhatjhululwe ngendlela amadoda aziingqila atjhatjhululwa ngayo.
8 Nange umphathayo angakathabi ngayo begodu angafuni ukuyithatha bona ibe likhohlo lakhe kodwana ayithengise, akukafuzi ayithengisele abantu abavela kwenye inarha ngombana uyiphethe ngokunganabulungiswa.
9 Nangabe uyikhethela indodanakhe kufuze ayiphathe njengendodakazakhe.
10 Nange athatha omunye umfazi akukafuzi anciphise ebekutholwa mfazi wokuthoma, ukudla, izambatho nokulala naye.+
11 Nakanganikeli umkakhe izinto ezintathwezi unelungelo lokukhamba angabhadeli litho.
12 “Nanyana ngubani obetha omunye ambulale kufuze naye abulawe.+
13 Kodwana nangabe ubulele ngaphandle kwehloso begodu uZimu weqiniso akuvumele bona kwenzeke ngizomenzela indawo angabalekela kiyo.+
14 Nange umuntu angasilingwa ngumakhelwanakhe bekambulale,+ naye kufuze abulawe ngitjho nanyana angabalekela e-aldarenami.+
15 Umuntu obetha uyise namkha unina kufuze abulawe.+
16 “Nangabe umuntu uthumba omunye umuntu+ bekamthengise namkha afunyanwe ambambile+ kufuze abulawe.+
17 “Nanyana ngubani othuka uyise namkha unina kufuze abulawe.+
18 “Lokha umuntu nakalwa nomunye ambethe ngelitje namkha ngeguduva* amlimaze kodwana angafi alale embhedenakhe,
19 nangabe olimeleko uyakghona ukuvuka akhambakhambe ngaphandle ngedondolo, nje-ke ombethileko kufuze atjhatjhululwe esigwebeni sakhe. Kufuze atlhogomele olimeleko ngesikhathi angakghoni ukusebenza ngaso bekube kulapho aphola kuhle.
20 “Nangabe umuntu ubetha isigqila sakhe esiduna namkha esisikazi ngentonga asibulale, umuntu loyo kufuze abuyiselelwe.+
21 Nangabe isigqila siphila ilanga linye namkha amabili, umphathi angekhe ajeziswe ngombana wathenga isigqileso ngemalakhe.
22 “Nangabe amadoda ayalwa bekalimaze umfazi osidisi abelethe kungakabi sikhathi+ kodwana kungabi nohlongakalako, omlimazileko kufuze abhadele ihlawulo ebekwa yindoda yomfazi lo begodu kufuze ayibhadele ngokwesiqunto sabahluleli.+
23 Nangabe kuba nohlongakalako, obuleleko kufuze abhadele ukuphila ngokuphila,+
24 ilihlo ngelihlo, izinyo ngezinyo, isandla ngesandla, inyawo ngenyawo,+
25 ukutjha ngokutjha, inceba ngenceba, umrhuzuko ngomrhuzuko.
26 “Nangabe umuntu ubetha ilihlo lesigqila sakhe esiduna namkha esisikazi, alilimaze kufuze asivumele sikhambe simahla ngebanga lelihlo laso.+
27 Nange angakhupha izinyo lesigqila sakhe esiduna namkha esisikazi kufuze asivumele sikhambe simahla ngebanga lezinyo laso.
28 “Nangabe ikunzi ihlaba indoda namkha umfazi ahlongakale, ikunzi leyo kufuze ikghadlhwe ngamatje beyife+ begodu inyamayo akukafuzi idliwe kodwana umnikazi wekunzi leyo akukafuzi ajeziswe.
29 Nangabe ikunzi leyo bekumumukghwayo ukuhlaba abantu begodu umnikazayo wayeleliswa ngalokho kodwana wangayitjheja yabe yabulala indoda namkha umfazi, ikunzi leyo kufuze ikghadlhwe ngamatje nomnikazayo abulawe.
30 Nangabe umnikazi wekunzi utjelwa bona abhadele ukwenzela bona angabulawa, yeke kufuze abhadele abekelwe khona.
31 Nanyana ikunzi le ihlabe umsana namkha umntazana, umnikazayo kufuze aphathwe ngokuvumelana nemithetho le.
32 Nangabe ikunzi leyo ihlabe isigqila esiduna namkha esisikazi umnikazayo kufuze anikele umphathi wesigqileso amatjhekeli* ama-30 begodu ikunzi leyo kufuze ikghadlhwe ngamatje beyife.
33 “Nangabe umuntu utjhiya umgodi angakawuvali namkha wemba umgodi angawuvali, ikunzi namkha udumbana awele ngakiwo,
34 umnikazi womgodi kufuze ahlawule.+ Kufuze abhadele umnikazi wesilwana esifileko begodu yena athathe isilwana esifilekwesi sibe ngesakhe.
35 Nangabe ikunzi yomunye umuntu ilimaza ikunzi yomunye beyiyibulale kufuze ephilako le ithengiswe bekuhlukaniselwane imali yakhona, kufuze kuhlukaniselwane nesilwana esifileko.
36 Nangabe kuyaziwa bona ikunzi le inomukghwa wokuhlaba ezinye iinlwana kodwana umnikazi angayivaleli, kufuze ahlawule ikunzi ngekunzi begodu efileko le ibe ngeyakhe.
Imitlolo Ephasi
^ Namkha kungenzeka “ngelembe.”
^ Itjhekeli beyilingana namagremu ayi-11.4. Qala Isith. B14.
