AmaRhubo 22:1-31
Kumnqophisi; izokuvunywa ngendlela yengoma ethi, “Iqina Elisikazi Lamathathakusa.”* Ingoma kaDavida.
22 Zimami, Zimami, ungitjhiyeleni na?+
Kubayini ukude nami ungangisindisi,Ukude nesililo sami sokugandeleleka?+
2 Zimami, ngisolo ngikubiza emini kodwana awuphenduli;+Nebusuku angikathuli.
3 Kodwana ucwengile,+Ubhodwe ziindumiso zaka-Israyeli.
4 Abobabethu bathembela kuwe;+Bakuthemba begodu wasolo ubahlangula.+
5 Bakulilela, basindiswa;Bathembela kuwe, akhenge badane.*+
6 Kodwana mina angisimumuntu, ngisibungu,Nginyefulwa babantu bebayangidelela.+
7 Boke abangibonako bangihleka ubudlhadlha;+Bayangidelela bebanikine neenhloko zabo, bathi:+
8 “Uthembele kuJehova. Akamhlangule!
Akamsindise ngombana uligugu kuye!”+
9 Nguwe owangikhupha ngesibelethweni,+Owangenza ngazizwa ngivikelekile emabeleni kamma.
10 Nganikelwa wena bona ungitlhogomele kusukela ekubelethweni kwami;Kusukela ngesibelethweni sakamma, bewusolo unguZimami.
11 Ungahlaleli kude nami ngombana umraro useduze+Begodu anginaye omunye umsizi.+
12 Iinkunzana ezinengi ziyangibhoda;+Iinkunzi zeBhatjhani ezinamandla ziyangizombeleza.+
13 Zivula imilomazo bona zilwe nami,+Njengebhubezi elibhodlako elirathula isilwana sibe ziinquqwana.+
14 Ngithululwe njengamanzi;Amathambami woke aphumile emalungwinawo.
Ihliziywami ifana namafutha weliju arhadzileko;+Iyancibilika ngaphakathi kwami.+
15 Amandlami ome njengesiqetjhana sesitja sebumba;+Ilimu lami linamathela eensinini zami;+Ungehlisela ethulini lokufa.+
16 Ngombana izinja ziyangibhoda;+Zingiragelela njengesiqhema sabenza okumbi,+Zisezandleni neenyaweni zami njengebhubezi.+
17 Ngingawabala woke amathambami.+
Zingiqalile begodu zingirhudulele amehlo.
18 Zihlukaniselana izambatho zami,Begodu zenza ifumbe bona zifumane isambatho sami.+
19 Kodwana wena, Jehova, ungahlali ukude.+
Umamandlami; rhaba uzongisiza.+
20 Ngisindisa esabuleni,Sindisa ukuphila kwami okuligugu, esandleni sezinja;+
21 Ngisindisa emlonyeni webhubezi+ neempondweni zeenkunzi zommango;Ngiphendula ungisindise.
22 Ngizokumemezela igama lakho kubafowethu;+Ngizokudumisa hlangana nebandla.+
23 Nina enisaba uJehova, mdumiseni!
Noke nina nzukulwana zakaJakopo, mphazimuliseni!+
Msabeni, noke nina nzukulwana zaka-Israyeli.
24 Ngombana akakadeleli namkha anyenye umtlhago wogandelelweko;+Akakamfihleli ubuso bakhe.+
Nakalilela isizo kuye, wamuzwa.+
25 Ngizokudumisa ebandleni elikhulu;+Ngizokwenza engikufungileko phambi kwabamsabako.
26 Abathobekileko bazokudla bebaneliseke;+Abafuna uJehova bazomdumisa.+
Kwanga ungathabela ukuphila ngokungapheliko.
27 Iphasi loke lizokukhumbula, libuyele kuJehova.
Yoke imindeni yeentjhaba izokukhothama phambi kwakho.+
28 Ngombana ubukhosi ngebakaJehova;+Ubusa iintjhaba.
29 Boke abanjingileko bephasi bazokudla bebakhothame;Boke abehlela ethulini bazokuguqa phambi kwakhe;Akekho namunye wabo ongabulunga ukuphila kwabo.
30 Iinzukulwana zabo zizomlotjha;Isizukulwana esizako sizokutjelwa ngoJehova.
31 Bazokuza, bakhulume ngokulunga kwakhe.
Bazokutjela abantu abasazokubelethwa ukuthi wenzeni.
Imitlolo Ephasi
^ Kungenzeka yindlela yokubhina namkha lihlobo elithileko lomvumo.
^ Namkha “baphathiswe iinhloni.”
