USamyela Wesibili 3:1-39
3 Ipi phakathi kwendlu kaSawula nendlu kaDavida yadosa; uDavida bekasolo aba namandla+ kodwana indlu kaSawula beyiphelelwa mamandla kancanikancani.+
2 Kusesenjalo, uDavida wabelethelwa amadodana eRhebroni.+ Izibulo lakhe bekungu-Amnoni+ ngo-Arhinowami+ weJizriyela.
3 Yesibili kunguKiliyabu ngo-Abigeyili,+ umhlolokazi kaNabhali umKarameli; yesithathu kungu-Absalomu+ indodana kaMaka, indodakazi kaTalimayi+ ikosi yeGetjhuri.
4 Yesine kungu-Adoniya+ indodana kaRhagithi, yesihlanu kunguTjhefathiya indodana ka-Abithali.
5 Yesithandathu kunguYitriyamu ngomkaDavida u-Egila. La madodana uDavida abelethelwa wona eRhebroni.
6 Ngesikhathi kusaraga ipi phakathi kwendlu kaSawula nendlu kaDavida, u-Abineri+ bekasolo aqinisa isikhundla sakhe endlini kaSawula.
7 Nje-ke uSawula bekanekhohlo okuthiwa nguRitsipa,+ indodakazi ka-Aya. Ngokukhamba kwesikhathi u-Itjhi-Bhotjhethi+ wathi ku-Abineri: “Kubayini uye emabhayini nekhohlo lakababa?”+
8 Amezwi ka-Itjhi-Bhotjhethi amsilinga khulu u-Abineri bese wathi: “Ngiyihloko yenja evela kwaJuda na? Bekube kunamhlanjesi ngitjengise ithando* endlini kayihlo uSawula nakubafowabo nabangani bakhe, azange ngikuthengisele esandleni sakaDavida; kodwana namhlanjesi ungibiza bona ngizokuphendula ngomtjhapho omalungana nomfazi.
9 Kwanga uZimu angamjezisa kabuhlungu u-Abineri nange ngingenzeli uDavida lokho uJehova akufunga kuye:+
10 bona kususwe umbuso endlini kaSawula begodu kuhlonywe isihlalo sobukhosi sakaDavida phezu kwaka-Israyeli naphezu kwakaJuda, kusukela kwaDani bekube seBheritjheba.”+
11 U-Itjhi-Bhotjhethi azange amphendule u-Abineri ngombana bekamsaba.+
12 Khonokho u-Abineri wathumela iinthunywa kuDavida wathi: “Kanti inarha le ngeyakabani?” Wangezelela wathi: “Yenza nami isivumelwano, ngizokwenza koke okusemandlenami bona ngitjhugulule u-Israyeli woke abe ngehlangothini lakho.”+
13 UDavida waphendula wathi: “Kulungile! Ngizokwenza isivumelwano nawe. Yinye kwaphela into engikubawa yona, ungathomi ulinge ukuzongibona ngaphambi kokuthi uthome ngokuza noMikali+ indodakazi kaSawula.”
14 Yeke uDavida wathumela iinthunywa ku-Itjhi-Bhotjhethi+ indodana kaSawula, wathi: “Nginikela umkami uMikali engamlobola ngamajwabu ali-100 wamaFilista.”+
15 Yeke u-Itjhi-Bhotjhethi wathumela bona uMikali ayokuthathwa endodenakhe, uPalithiyeli+ indodana kaLayitjhi.
16 Kodwana indodakhe beyisolo ikhamba naye, ilila njengombana imlandela kufikela eBharhurimu.+ Yeke u-Abineri wathi kuye: “Buyela emva!” Nembala wabuyela emva.
17 Kusesenjalo, u-Abineri wathumela ilizwi ebadaleni bakwa-Israyeli, wathi: “Sekusikhatjhana nifuna uDavida abe yikosenu.
18 Nje-ke, thathani igadango ngombana uJehova uthe kuDavida:+ ‘Ngesandla sesisebenzi sami uDavida ngizokusindisa abantu bami u-Israyeli esandleni samaFilista nesandleni sawo woke amanabawo.’”
19 Ngemva kwalokho u-Abineri wakhuluma nabantu bakwaBhenjamini.+ U-Abineri wabuye wakhuluma noDavida ngerhorhomejeni eRhebroni wamtjela lokho u-Israyeli nayo yoke indlu yakwaBhenjamini abavumelene ngakho.
20 Ngesikhathi u-Abineri eze kuDavida eRhebroni nabantu abama-20, uDavida wabenzela umnyanya.
21 Yeke u-Abineri wathi kuDavida: “Angikhambe ngiyokubuthelela u-Israyeli woke bona eze ekosinami, ukwenzela bona enze isivumelwano nawe begodu wena uzokuba yikosi phezu kwakho koke okufisako.” Nje-ke uDavida walayelisa u-Abineri, u-Abineri wakhamba ngokuthula.
22 Khonokho, iinsebenzi zakaDavida noJowabi zabuya ekusahleleni, ziphethe ipahla enengi ethunjiweko. U-Abineri besekakhambile kuDavida eRhebroni ngombana uDavida bekamkhambise ngokuthula.
23 Kwathi uJowabi+ nalo loke ibutho ebelinaye nabafikako, uJowabi watjelwa ukuthi: “U-Abineri+ indodana kaNeri+ bekeze ekosini bese wamvumela wakhamba, nje-ke ukhambe ngokuthula.”
24 Yeke uJowabi wangena ngekosini wathi: “Yinto bani oyenzileko le? U-Abineri bekeze kuwe. Kubayini umlise wakhamba bewaphunyurha?
25 Uyamazi u-Abineri indodana kaNeri! Bekezele ukuzokukhohlisa nokwazi yoke into oyenzako.”
26 Yeke uJowabi wasuka kuDavida wathumela iinthunywa zalandela u-Abineri, zamfumana emthonjeni weSira zabuya naye; kodwana uDavida bekangazi litho ngalokho.
27 Kwathi u-Abineri nakabuyela eRhebroni,+ uJowabi wamdosela eqadi ngaphakathi kwesango bona ayokukhuluma naye babodwa. Kodwana nabalapho, wamhlaba emathunjini wahlongakala;+ wenza lokho ngombana u-Abineri wabulala umfowabo kaJowabi u-Asaheli.+
28 Ngokukhamba kwesikhathi, uDavida nakezwa ngalokho, wathi: “Mina nombuswami simsulwa isiphelani phambi kwakaJehova emlandwini weengazi+ omalungana no-Abineri indodana kaNeri.
29 Kwanga ungabuyela ehloko kaJowabi+ nakiyo yoke indlu kayise. Kwanga endlini kaJowabi kungahlala kunomuntu onokugula kwezitho zangaphasi+ namkha onobulepheru+ namkha indoda ephotha intambo* namkha umuntu obulawa ngesabula namkha onganakudla!”+
30 Nje-ke uJowabi nomfowabo u-Abitjhayi+ babulala u-Abineri+ ngombana wabulala umfowabo u-Asaheli epini+ eGibiyoni.
31 Yeke uDavida wathi kuJowabi nabo boke abantu ebebanaye: “Rathulani izambatho zenu, nibophe imigodla begodu nililele u-Abineri.” Ikosi uDavida ngokwayo beyikhamba emva kwehlaka elithwele isidumbu.
32 Babulunga u-Abineri eRhebroni; ikosi yarhahlawula isililo ethuneni laka-Abineri, boke abantu balila.
33 Ikosi yavumela u-Abineri ingoma yesililo yathi:
“Kghani kufuze u-Abineri ahlongakale njengomuntu onganangqondo na?
34 Izandla zakho bezingakabotjhwa,Begodu iinyawo zakho bezingakabotjhwa ngamakhamandela.*
Uwe njengomuntu owa phambi kweenlelesi.”+
Nabezwa lokhu abantu bamlilela godu.
35 Ngemva kwesikhathi, boke abantu beza bazokunikela uDavida uburotho bokumduduza kusesesemini kodwana uDavida wafunga wathi: “Kwanga uZimu angangijezisa kabuhlungu nangingadla uburotho namkha nanyana yini okhunye ilanga lingakatjhingi!”+
36 Boke abantu bakulemuka lokho begodu kwabathabisa. Njengayo yoke into ebeyenziwa yikosi, yabathabisa abantu.
37 Nje-ke boke abantu no-Israyeli woke, bazi mhlokho ukuthi ikosi beyinganasandla ekubulaweni kwaka-Abineri indodana kaNeri.+
38 Ngemva kwalokho, ikosi yathi eensebenzini zayo: “Anazi na ukuthi namhlanjesi kuwe ikosana nomuntu omkhulu kwa-Israyeli?+
39 Namhlanjesi ngiyabogaboga, ngitjho nanyana ngizeswe bona ngibe yikosi+ ngombana abarhalaba, amadodana kaTseruya+ banelunya khulu.+ Kwanga uJehova angabuyisela umenzi wobumbi ngokuya ngobumbi bakhe.”+
Imitlolo Ephasi
^ Namkha “ithando elithembekileko.”
^ Mhlamunye kuqaliselwe endodeni erholopheleko ekateleleka bona yenze umsebenzi womuntu wengubo.
^ NgesiHebheru, “ngekhopha.”
