Yesibili YeenKronike 23:1-21
23 Ngomnyaka wekhomba uJehoyada watjengisa isibindi, wenza isivumelwano neenduna zamakhulu,+ okungu-Azariya indodana kaJerorhamu, u-Itjhimayeli indodana kaJehorhanani, u-Azariya indodana ka-Obede, uMaseya indodana ka-Adaya no-Elitjhafathi indodana kaZikiri.
2 Nje-ke bakhamba yoke inarha yakwaJuda nakiwo woke amadorobho wakwaJuda babuthelela amaLevi+ neenhloko zeenkoro zakwa-Israyeli. Bathi nabafika eJerusalema,
3 ibandla loke lenza isivumelwano+ nekosi endlini kaZimu weqiniso, ngemva kwalokho uJehoyada wathi kibo:
“Qalani! Indodana yekosi izokubusa njengombana uJehova athembisa ngeenzukulwana zakaDavida.+
4 Nakhu ekufuze nikwenze: Kufanele nihlukanise abaphristi namaLevi abazabe basebenza+ ngeSabatha bona babe ziinqhema ezintathu. Esinye isiqhema sizokuba balindisango;+
5 esinye sizokuba sesigodlweni,+ kuthi esinye sibe seSangweni lesiSekelo begodu boke abanye abantu babe seenrhodlweni zendlu kaJehova.+
6 Ningavumeli muntu bona angene ngendlini kaJehova kodwana nivumele kwaphela abaphristi namaLevi azokusebenza.+ Bona bangangena ngombana basiqhema esicwengileko begodu boke abanye abantu kufuze benze ngokwesibopho abasenze kuJehova.
7 AmaLevi kufuze aphahle ikosi mahlangothi woke, ngamunye aphathe isikhali esandleni sakhe. Nanyana ngubani ongena ngendlini uzokubulawa. Yeke hlalani ninekosi nanyana kukuphi lapho iya khona.”
8 AmaLevi nabo boke abantu bakwaJuda benza njengombana uJehoyada umphristi abayalile. Ngayinye yathatha amadoda ebewasebenza ngeSabatha+ kuhlanganise nalawo ebewangasebenzi ngeSabatha ngombana uJehoyada umphristi gade angakawatjhaphululi+ emsebenzinawo.
9 UJehoyada umphristi wanikela iinduna zamakhulu+ imikhonto, iimviko ezincani neemviko ezirondo ebekungezeKosi uDavida+ ebezingendlini kaZimu weqiniso.+
10 Ngemva kwalokho, wajamisa boke abantu, ngamunye aphethe isikhali ukusukela ngesidleni sendlu ukufikela ngesinceleni sayo, hlanu kwe-aldara nahlanu kwendlu, baphahle ikosi.
11 Nje-ke bakhupha indodana+ yekosi bayithwesa isihlohlo, bayinikela noBufakazi,*+ bayenza ikosi, uJehoyada namadodanakhe bayizesa. Ngemva kwalokho bathi: “Bayede kosi!”+
12 U-Ataliya nakezwa itjhada labantu abagijimako begodu badumisa ikosi, waphuma khonokho waya lapho kunabantu khona endlini kaJehova.+
13 Wabona ikosi ijame hlanu kwesikayo esangweni, amakhosana+ nababethi beembhorompita bebanekosi, boke abantu benarha bathabile, babetha iimbhorompita, abavumi baphethe iinliliso zomvumo,+ badosa phambili nekudumiseni. U-Ataliya nakabona lokho, warathula izambatho zakhe, warhuwelela wathi: “Bugirikitjani! Bugirikitjani!”
14 Nje-ke uJehoyada umphristi wakhupha iinduna zamakhulu eziphethe ibutho, wathi kizo: “Msuseni hlangana namasotja nanyana ngubani ozomlandela, kufuze nimbulale ngesabula!” Ngombana umphristi wathi: “Ningambulaleli ngendlini kaJehova.”
15 Bambamba, nakafika ebungenweni beSango leeNjomani lendlu yekosi,* bambulalela lapho.
16 UJehoyada wenza isivumelwano nabo boke abantu kuhlanganise nekosi, sokuthi bazokuhlala bababantu bakaJehova.+
17 Ngemva kwalokho, boke abantu beza ethempelini lakaBhali baligiriza,+ baphadlha ama-aldarakhe neenthombe zakhe,+ babulala noMathani umphristi kaBhali+ phambi kwama-aldara.
18 UJehoyada wabuye wabeka abaphristi namaLevi bona babe banqophisi endlini kaJehova, abaphristi namaLevi la ngilawo uDavida awahlukanisa ngokweenqhema bona asebenze endlini kaJehova, enze iminikelo etjhiswako kuJehova+ ngokwalokho okutlolwe emThethweni kaMosi.+ Bakwenza bathabile, babhina neengoma njengombana kwatjho uDavida.
19 Wathatha nabalindisango+ wabajamisa esangweni lendlu kaJehova bona kungathomi kube nomuntu ongakacwengeki ozokungena.
20 Wabuye wathatha iinduna zamakhulu,+ iinkhulu, ababusi nabo boke abantu benarha bona baphekelele ikosi, behla basuka endlini kaJehova. Nje-ke bangena ngesango elingehla endlini yekosi,* bahlalisa ikosi esihlalweni sobukhosi.+
21 Yeke boke abantu benarha bathaba, idorobho laba nokuthula ngombana babulala u-Ataliya ngesabula.
Imitlolo Ephasi
^ Kungenzeka msongo omumethe umThetho kaZimu.
^ Namkha “lesigodlweni.”
^ Namkha “esigodlweni.”
