Yesibili YeenKronike 20:1-37
20 Ngemva kwesikhathi esithileko, abantu bakwaMowabi,+ bakwa-Amoni+ nabanye bakwa-Amonimi* beza bazokulwa noJehotjhafathi.
2 Yeke uJehotjhafathi wabikelwa umlayezo othi: “Kunebutho elikhulu elizokulwa nawe, lisuka esifundeni sangelwandle* e-Edomu,+ liseRhatsetsoni-Tamari okuyi-Eni-Gedi.”+
3 Ngebanga lalokho uJehotjhafathi warhidlwa livalo, yeke wazimisela ukufuna isinqophiso sakaJehova.+ Wayala woke amaJuda bona azile ukudla.
4 Nje-ke abantu bakwaJuda bahlangana bona bazokubuza uJehova,+ bebavela kiwo woke amadorobho wakwaJuda bazokufuna ukwazi ukuthi uJehova uthini.
5 UJehotjhafathi wajama phambi kwebandla lakwaJuda neleJerusalema endlini kaJehova phambi kwesirhodlo esitjha,
6 wathi:
“Maye! Jehova, Zimu wabokhokho bethu, nguwe wedwa uZimu emazulwini.+ Wena unamandla phezu kwayo yoke imibuso yeentjhaba,+ isandla sakho sinamandla begodu akekho ongajamelana nawe.+
7 Zimethu, kanti akhenge na uqothe abahlali bendaweni le phambi kwabantu bakho u-Israyeli bese wayinikela iinzukulwana zaka-Abrahama umnganakho+ bona zihlale kiyo ngokungapheliko?
8 Zahlala kiyo, zakhela negama lakho indawo ecwengeke khulu.+ Zathi,
9 ‘Nanyana singehlakalelwa yihlekelele, kungaba ngesabula, ngesahlulelo esibuhlungu, ngesifo esibulalako namkha ngendlala, sizokujama phambi kwendlu le naphambi kwakho (ngombana igama lakho likiyo)+ sizokubiza nasigandelelekileko bona usisize, kwanga ungasizwa begodu usisindise.’+
10 Nje-ke qala bona benzani abantu bakwa-Amoni, bakwaMowabi nebesifundeni seentaba zeSeyiri,+ owakhandela ama-Israyeli bona angabasahleli ngesikhathi aphuma eGibhide. Ama-Israyeli abagegeda begodu akhenge abatjhabalalise.+
11 Nje basithokoza ngokusiqotha endaweni owasipha yona bona ibe lilifa lethu.+
12 Maye! Zimethu, utjho bona angeze wabahlulela na?+ Ngombana thina asisililitho ebuthweni elikhulu elizokulwa natheli. Yeke asazi ukuthi senzeni+ kodwana siqale wena bona usisize.”+
13 Ngesikhatheso boke abantu bakwaJuda bebaphambi kwakaJehova, amasana, abafazi nabantwana.*
14 Nje-ke kwathi phakathi kwebandla, ummoya kaJehova waba phezu kwakaJarhaziyeli indodana kaZakariya indodana kaBhenaya indodana kaJehiyeli indodana kaMathaniya omLevi wamadodana ka-Asafa.
15 Wathi: “Lalelani nina maJuda, bantu beJerusalema nawe Kosi Jehotjhafathi! Nakhu uJehova akutjhoko kini, ‘Ningathukwa namkha nihlengezele ngebanga lebutho elikhulweli, ngombana ipi le akusingeyenu kodwana ngeyakaZimu.+
16 Kusasa yehlani niyokulwa nabo, bazokukhuphuka ngendlela yeTsitsi, yeke nina nizabafumana ekupheleleni komrhoba ngaphambi kommango weJeruweli.
17 Angeze kutlhogeke bona niyilwe ipi le. Zihleleni kuhle, nijame,+ nibone indlela uJehova azonisindisa ngayo.+ Bantu bakwaJuda nani bantu beJerusalema ningathukwa namkha nihlengezele.+ Kusasa khambani niyokulwa nabo begodu uJehova uzokuba nani.’”+
18 Khonokho uJehotjhafathi waguqa, wahloma ihloko phasi, boke abantu bakwaJuda nebeJerusalema baguqa phambi kwakaJehova bona balotjhe uJehova.
19 Nje-ke amaLevi ebewaziinzukulwana zamaKhehathi+ nezamaKhorarhi asikima adumisa uJehova uZimu ka-Israyeli ngephimbo elikhulu.+
20 Abantu bavuka ngesamarimarima baya emmangweni weTekhowa.+ Njengombana baphuma, uJehotjhafathi wajama phambi kwabo, wathi: “Kheningilalele bantu bakwaJuda nani bantu beJerusalema! Kholwani uJehova uZimenu bona nikghone ukukghodlhelela. Kholwani abaphorofidi bakhe,+ nizokuphumelela.”
21 Ngemva kokuthi akhulumisene nabantu, wakhetha amadoda azokubhinela+ uJehova, amdumise ambethe izembatho ezicwengileko. Bewakhamba phambi kwebutho lepi, athi: “Thokozani uJehova, ngombana ithando lakhe* lihlala ngokungapheliko.”+
22 Yeke kwathi nawathoma ukubhina ngethabo iingoma zokudumisa, uJehova wahlela ibutho elajamelana nabantu ebebasahlela abantu bakwaJuda okubabantu bakwa-Amoni, bakwaMowabi nebesifundeni seentaba zeSeyiri. Yeke babulalana bodwa.+
23 Abantu bakwa-Amoni nabakwaMowabi bajikela abantu besifundeni seentaba zeSeyiri,+ babatjhabalalisa, babaqeda nya! Kwathi nasele baqedile ngabantu beSeyiri bathoma-ke babulalana bodwa.+
24 Abantu bakwaJuda baya esithaleni semmangweni,+ baqala lapha bekunebutho khona, babona iindumbu zirhatjheke phasi kungekho namunye osindileko.+
25 UJehotjhafathi nabantu bakhe bakhamba bayokuthatha izinto ezifunyenwe epini, bafumana izinto ezinengi khulu, izembatho nezinto eziligugu. Bazithathela zona bekwaba kulapho bangasakghoni ukuzithwala.+ Kwabathatha amalanga amathathu ukubutha izintwezo, ngombana bezizinengi tle!
26 Yeke elangeni lesine, bahlangana emRhobeni weBheraka, badumisa uJehova. Kungebangelo bathiya indawo leyo ngokuthi mRhoba weBheraka,*+ bekube kunamhlanjesi isabizwa njalo.
27 Nje-ke boke abantu bakwaJuda nebeJerusalema badoswa phambili nguJehotjhafathi, babuyela eJerusalema bathabile ngombana uJehova wabenza bathaba ngebanga lokuhlula amanababo.+
28 Beza eJerusalema neenliliso zesinara, amaharibha+ neembhorompita+ baya endlini kaJehova.+
29 Yeke yoke imibuso yeenarha uZimu wayenza yaba nevalo nayizwa ukuthi uJehova ulwele ama-Israyeli emanabenawo.+
30 Umbuso kaJehotjhafathi akhenge uthikaziseke begodu uZimu waragela phambili nokumupha ukuphumula mahlangothi woke.+
31 UJehotjhafathi waragela phambili abusa kwaJuda, bekaneminyaka ema-35 nakaba yikosi begodu wabusa iminyaka ema-25 eJerusalema. Igama lakanina bekungu-Azuba indodakazi kaTjhilirhi.+
32 Wakhamba emtlhaleni kayise u-Asa.+ Akhenge aphambuke kiwo, wenza nokulungileko phambi kwakaJehova.+
33 Kodwana iindawo eziphakemeko akhenge zisuswe,+ abantu bebangakazimiseli ukulotjha uZimu wabokhokho babo ngeenhliziyo zabo zoke.+
34 Malungana nawo woke omunye umlando kaJehotjhafathi, kusukela ekuthomeni, bekufikele emaphethelweni utlolwe hlangana namezwi kaJehu+ indodana kaRhanani+ eNcwadini yamaKhosi wakwa-Israyeli.
35 Ngemva kwalokho iKosi yakwaJuda uJehotjhafathi yaba netjhebiswano neKosi yakwa-Israyeli u-Arhaziya owenza ngokukhohlakala.+
36 Nje-ke wasebenza naye ekwenzeni imikhumbi etjhinga eTaratjhitjhi+ begodu imikhumbi leyo bayenzela e-Etsiyoni-Gebere.+
37 U-Eliyezeri indodana kaDodavahu weMaretjha waphorofida malungana noJehotjhafathi wathi: “Ngebanga lokuthi ube netjhebiswano no-Arhaziya, uJehova uzokutjhabalalisa okwenzileko.”+ Yeke imikhumbi yaphahlazeka+ begodu akhenge isakghona ukuya eTaratjhitjhi.
Imitlolo Ephasi
^ Namkha kungenzeka “bakwaMeyuni.”
^ Kungenzeka iLwandle eliFileko.
^ NgesiHebheru, “namadodana.”
^ Namkha “ithando lakhe elithembekileko.”
^ Kutjho ukuthi “Isibusiso.”
