Yesibili YamaKhosi 23:1-37
23 Ikosi yathumela umlayezo wokuthi kubizwe abadala bakwaJuda nebeJerusalema.+
2 Ngemva kwalokho, ikosi yakhuphukela endlini kaJehova nawo woke amadoda wakwaJuda, zoke izakhamuzi zeJerusalema, abaphristi nabaphorofidi, boke abantu ukusuka komncani ukuya komkhulu. Yeke yabafundela woke amezwi wencwadi+ yesivumelwano+ eyafumaneka endlini kaJehova.+
3 Ikosi yajama eduze kwesika, yenza isivumelwano* phambi kwakaJehova,+ ukuthi izokulandela uJehova, iphethe imiyalwakhe, iinkhumbuzo zakhe nemithethwakhe ngehliziywayo yoke nangomphefumulwayo* woke, ngokwenza ngokuvumelana namezwi wesivumelwanesi atlolwe encwadini le. Yeke boke abantu bavumelana nesivumelwaneso.+
4 Yeke ikosi yayala uRhilikhiya+ umphristi ophakemeko, abaphristi besigaba sesibili nabalindisango bona bakhuphe ngethempelini lakaJehova zoke izitja ezenzelwe uBhali, isigodo esicwengileko,*+ nalo loke ibutho lezulwini. Ngemva kwalokho, yazitjhisela ngaphandle kweJerusalema emehlelweni weKidroni begodu imilothazo yawusa eBhetheli.+
5 Ngemva kwalokho, yaqotha abaphristi bakazimu weentjhaba, labo amakhosi wakwaJuda ebewababeke bona bathunyise intuthu yomhlatjelo eendaweni eziphakemeko emadorobheni wakwaJuda neendaweni ezibhode iJerusalema, nalabo abathunyisa intuthu yomhlatjelo kuBhali, elangeni, enyangeni, emithaleni yeenkwekwezi nakilo loke ibutho lezulwini.+
6 Yakhupha isigodo esicwengileko*+ endlini kaJehova yasisa emkhawulweni weJerusalema, emRhobeni weKidroni, yasitjhisela+ emRhobeni weKidroni begodu yasisila saba lithuli, yarhatjha ithuli laso emathuneni wabantu nje.+
7 Godu yagiriza izindlu zamadoda aziingwadla zethempeli,+ ebezisendlini kaJehova lapho abafazi ebebalukela khona amatende wesigodo esicwengileko.*
8 Ngemva kwalokho, yakhupha boke abaphristi emadorobheni wakwaJuda, yenza iindawo eziphakemeko abaphristi egade bathunyisa kizo intuthu yomhlatjelo zangasakufanelekeli ukulotjhela kizo, ukusuka eGeba+ ukuya eBheritjheba.+ Godu yagiriza iindawo eziphakemeko zamasango ebewasebungenweni besango lakaJotjhuwa isikhulu sedorobho, ebezingesinceleni nawungena esangweni ledorobho.
9 Abaphristi beendawo eziphakemeko akhenge balotjhe e-aldareni lakaJehova eliseJerusalema+ kodwana bebadla uburotho obunganasibiliso nabafowabo.
10 Godu yenza iTofethi+ yangakufanelekeli ukulotjhela kiyo, esemRhobeni wamaDodana kaHinomu*+ bona kungabi namuntu owenza umhlatjelo* kuMoleki+ ngendodana namkha indodakazakhe.
11 Akhenge ivumele neenjomani amakhosi wakwaJuda ebewazinikele elangeni bona zingene endlini kaJehova eduze nekumba kaNathani-Meleki isikhulu sesigodlo, ebeyisemathurini; yatjhisa neenkarana zelanga+ emlilweni.
12 Godu ikosi yagiriza ama-aldara ebewajanyiswe makhosi wakwaJuda ephahleni+ lelawu laka-Arhazi eliphezulu, kunye nama-aldara ebewajanyiswe nguManase eenrhodlweni ezimbili zendlu kaJehova.+ Yawaphihliza beyarhatjha ithuli lawo emRhobeni weKidroni.
13 Ikosi yenza iindawo eziphakemeko phambi kweJerusalema zangakufanelekeli ukulotjhela kizo lezo ebezingesewula* yeNtaba yokuTjhatjalaliswa,* lezo uSolomoni ikosi yakwa-Israyeli ebeyizakhele u-Atjhitarothi uzimukazi onyenyisako wamaTsidoni; noKemotjhi uzimu onyenyisako wakwaMowabi; noMilikomu+ uzimu onyenyisako wama-Amoni.+
14 Yaphula iinsika ezicwengileko zaba ziinquqwana, yaqunta iingodo ezicwengileko*+ begodu yazalisa iindawo zazo ngamathambo wabantu.
15 Godu yagiriza i-aldara eliseBhetheli, indawo ephakemeko ebeyenziwe nguJerobhowamu indodana kaNebathi loyo owabangela u-Israyeli bona one.+ Ngemva kokugiriza i-aldarelo nendawo ephakemeko, yatjhisa indawo ephakemeko, yayisila yaba lithuli beyatjhisa nesigodo esicwengileko.*+
16 UJosiya nakajikako begodu abona amathuna asentabeni, wayala bona kuyokuthathwa amathambo asemathuneni lawo begodu wawatjhisa e-aldareni, walenza bona lingafaneleki ukusetjenziselwa ukulotjha, ngokuvumelana nelizwi lakaJehova ebelimenyezelwe mumuntu kaZimu weqiniso owabikezela ukuthi izintwezi zizokwenzeka.+
17 Ngemva kwalokho wathi: “Lilitje lethuna lakabani engiliqalilekwela?” Khonokho amadoda wedorobho athi kuye: “Lithuna lomuntu kaZimu weqiniso wakwaJuda+ owabikezela izinto ozenzileko malungana ne-aldara leBhetheli.”
18 Nje-ke wathi: “Mliseni aphumule. Ningavumeli namunye athikameze amathambakhe.” Yeke akhenge bawathikameze, kuhlanganise namathambo womphorofidi oweza avela eSamariya.+
19 Godu uJosiya wasusa zoke izindlu zokulotjha eendaweni eziphakemeko ebezisemadorobheni weSamariya,+ ebezakhiwe makhosi wakwa-Israyeli bona asilinge uZimu, wenza into efanako nakizo njengombana enza eBhetheli.+
20 Nje-ke boke abaphristi beendawo eziphakemeko ebebalapho wababulalela ema-aldareni lawo, watjhisa namathambo wabantu phezu kwabo.+ Ngemva kwalokho, wabuyela eJerusalema.
21 Nje-ke ikosi yayala boke abantu yathi: “Gidingelani uJehova uZimenu iPhasika+ njengombana kutloliwe encwadini yesivumelwano le.”+
22 Akhenge khekube nePhasika elinjengaleli kusukela emihleni yabahluleli ebebahlulela kwa-Israyeli namkha kiyo yoke imihla yamakhosi wakwa-Israyeli namakhosi wakwaJuda.+
23 Kodwana ngomnyaka we-18 wokubusa kweKosi uJosiya, iPhasikeli lakaJehova lagidingwa eJerusalema.
24 Godu uJosiya waqotha ababuza kwabafileko, ababikezeli bekusasa,+ iinthombe zamatherafimi,*+ iinthombe ezinyenyisako* nazo zoke izinto ezinyenyisako ezavela enarheni yakwaJuda neJerusalema, bona enze ngokuvumelana namezwi womThetho+ atlolwe encwadini uRhilikhiya umphristi ayifumene endlini kaJehova.+
25 Akhenge khekube nekosi enjengaye ngaphambi kwakhe, eyabuyela kuJehova ngehlizwayo yoke nangomphefumulwayo*+ woke nangamandlayo woke, ngokuvumelana nawo woke umThetho kaMosi; akhenge kuvele nomunye onjengaye ngemva kwakhe.
26 Nanyana kunjalo, ilaka elivuthako lakaJehova akhenge lisuke kwaJuda ngebanga lazo zoke izinto ezisilingako uManase azenza bona amsilinge.+
27 UJehova wathi: “NoJuda ngizomsusa phambi kwami+ njengombana ngasusa u-Israyeli;+ ngizolidela idorobho engalikhethakweli, iJerusalema, nendlu engathi ngayo, ‘Igama lami lizokuhlala lilapho.’”+
28 Malungana nawo woke omunye umlando kaJosiya, koke akwenzileko, akukatlolwa na encwadini yomlando weenkhathi zamakhosi wakwaJuda?
29 Emihlenakhe uFaro Nekho ikosi yeGibhide weza azokuhlangana nekosi ye-Asiriya eMlanjeni iYufrathe, yeke iKosi uJosiya yaphuma bona iyokulwa naye; kodwana uNekho nakambonako, wambulalela eMegido.+
30 Nje-ke iinsebenzi zakhe zathwala isidumbu sakhe ngekarana ukusuka eMegido zasiletha eJerusalema, zambulunga ethuneni lakhe. Ngemva kwalokho abantu benarha leyo bathatha uJehowarhazi indodana kaJosiya bamzesa, bamenza ikosi esikhundleni sakayise.+
31 UJehowarhazi+ bekaneminyaka ema-23 nakaba yikosi begodu wabusa iinyanga ezintathu eJerusalema. Igama lakanina bekunguRhamuthali+ indodakazi kaJoromiya weLibhina.
32 Wathoma ukwenza okumbi emehlweni kaJehova, ngokuvumelana nakho koke abokhokho bakhe abakwenzileko.+
33 UFaro Nekho+ wamvalela ejele eRibhila+ enarheni yeRhamathi bona angabusi eJerusalema, wahlawulisa inarha amatalende* wesiliva ali-100 netalende legolide.+
34 Ngaphezu kwalokho, uFaro Nekho wabeka u-Eliyakhimu indodana kaJosiya esikhundleni sakayise uJosiya begodu watjhugulula igama lakhe wamthiya ngokuthi nguJehoyakhimu kodwana wathatha uJehowarhazi wamusa eGibhide,+ okukulapho agcina ahlongakalele khona.+
35 UJehoyakhimu wanikela uFaro isiliva negolide kodwana kwatlhogeka abhadelise inarha umthelo bona anikele uFaro isiliva ebekalifuna. Wabekela umuntu ngamunye enarheni isilinganiso sesiliva negolide okufuze alikhuphe bona alinikele uFaro Nekho.
36 UJehoyakhimu+ bekaneminyaka ema-25 nakaba yikosi begodu wabusa iminyaka eli-11 eJerusalema.+ Igama lakanina bekunguZebida indodakazi kaPedaya weRuma.
37 Waraga nokwenza okumbi phambi kwakaJehova,+ ngokuvumelana nakho koke abokhokho bakhe abakwenzileko.+
Imitlolo Ephasi
^ Namkha “yavuselela isivumelwano.”
^ Qala Ihlathululo.
^ Qala Ihlathululo.
^ Qala Ihlathululo.
^ Qala Ihlathululo.
^ Qala Ihlathululo, “Gehena.”
^ NgesiHebheru, “odlulisa indodana namkha indodakazakhe emlilweni.”
^ NgesiHebheru, “ebezingesidleni.” Kutjho esewula, umuntu nakaqale epumalanga.
^ Kutjho iNtaba yama-Oliva, ingcenyayo ekude yesewula eyaziwa nangokuthi yiNtaba yesiPhambeko.
^ Qala Ihlathululo.
^ Qala Ihlathululo.
^ Ibizo lesiHebheru elisetjenziswe la lingahlobana nebizo elithi “ubulongwe” begodu lisetjenziselwe ukuveza ukunyenya.
^ Namkha “abozimu bangendlini.”
^ Qala Ihlathululo.
^ Italende beyilingana namakhilogremu ayi-34.2. Qala Isith. B14.
