Yesibili YamaKhosi 2:1-25
2 Kwathi nasele uJehova azokuthatha u-Eliya+ amkhuphulele ezulwini* ngesiwuruwuru,+ u-Eliya no-Elitjha+ baphuma eGiligali.+
2 U-Eliya wathi ku-Elitjha: “Ngibawa uhlale lapha, ngombana uJehova ungithumele eBhetheli.” Kodwana u-Elitjha wathi: “Ikani uJehova nakasaphilako, nawe nawusaphilako, angekhe ngikutjhiye.” Nje-ke behlela eBhetheli.+
3 Amadodana wabaphorofidi* weBhetheli eza ku-Elitjha athi kuye: “Uyazi na ukuthi uJehova namhlanjesi uthatha ikosakho ekubeni yihlokwakho?”+ Yena wathi: “Ngiyakwazi lokho. Ningasayiphatha indaba le.”
4 Ngemva kwalokho, u-Eliya wathi kuye: “Elitjha, ngibawa uhlale lapha, ngombana uJehova ungithumele eJerikho.”+ Kodwana yena wathi: “Ikani uJehova nakasaphilako, nawe nawusaphilako, angekhe ngikutjhiye.” Bafika eJerikho.
5 Amadodana wabaphorofidi ebekaseJerikho atjhidela ku-Elitjha athi kuye: “Uyazi na ukuthi uJehova namhlanjesi uthatha ikosakho ekubeni yihlokwakho?” Yena wathi: “Ngiyakwazi lokho. Ningasayiphatha indaba le.”
6 Nje-ke u-Eliya wathi kuye: “Ngibawa uhlale lapha, ngombana uJehova ungithumele eJordani.” Kodwana yena wathi: “Ikani uJehova nakasaphilako, nawe nawusaphilako, angekhe ngikutjhiye.” Bobabili baraga nekhambo labo.
7 Amadodana wabaphorofidi ama-50 nawo abalandela, ajamela kudanyana abukela u-Eliya no-Elitjha nabajame hlanu kweJordani.
8 Nje-ke u-Eliya wathatha isambatho sakhe sobuphorofidi+ wasisonga, wabetha amanzi ahlukana phakathi bona bobabili bayame ehlabathini eyomileko.+
9 Msinyana ngemva kokuyama, u-Eliya wathi ku-Elitjha: “Bawa nanyana yini ofuna ngikwenzele yona ngaphambi kobana ngisuswe kuwe.” U-Elitjha wathi: “Ngibawa ingcenye ebuyelelwe kabili+ yommoyakho.”+
10 Wamphendula wathi: “Into oyibawako le ibudisi. Nawungangibona ngisuswa kuwe, okubawako kuzokwenzeka; kodwana wangangiboni, angekhe kwenzeke.”
11 Njengombana bakhamba ndawonye bakhuluma, kungakalindeleki kwavela ikarana yomlilo idoswa ziinjomani zomlilo+ yabahlukanisa phakathi begodu u-Eliya wakhuphukela ezulwini* ngesiwuruwuru.+
12 U-Elitjha asabukele njalo bekarhuwelela athi: “Baba, baba! Ikarana ka-Israyeli nabakhweli bakhe beenjomani!”+ Uthe nakangasamboni, wabamba izambatho zakhe wazidabula zaba ziingcenye ezimbili.+
13 Ngemva kwalokho, wadobha isambatho sobuphorofidi+ esiwe ku-Eliya, wabuyela emva wajama magega neJordani.
14 Ngemva kwalokho, wathatha isambatho sobuphorofidi esiwe ku-Eliya, wabetha ngaso amanzi wathi: “Uphi uJehova uZimu ka-Eliya?” Kuthe nakabetha amanzi, ahlukana phakathi ukuthi akghone ukuyama.+
15 Amadodana wabaphorofidi weJerikho ambona asesekude, athi: “Ummoya ka-Eliya wehlele ku-Elitjha.”+ Yeke ayomhlangabeza begodu akhothama phambi kwakhe.
16 Athi kuye: “Naka amadoda anesibindi ama-50 neensebenzi zakho. Sibawa uwavumele akhambe bona ayokufuna ikosakho. Mhlamunye ummoya kaJehova uyikhuphulile wayiphosela kwenye yeentaba namkha komunye umrhoba.”+ Kodwana yena wathi: “Ningawathumeli.”
17 Kodwana asolo amncenga bewaphathwa ziinhloni, wathi: “Athumeleni.” Athumela amadoda ama-50, amfuna amalanga amathathu kodwana akhenge amfumane.
18 Nawabuyela kuye, bekahlala eJerikho.+ Nje-ke wathi kiwo: “Akhenge nginitjele na bona ningayi?”
19 Ngemva kwesikhathi, amadoda wedorobho athi ku-Elitjha: “Ikosami iyabona ukuthi idorobheli lisendaweni ehle;+ kodwana amanzi wakhona mambi begodu inarha le iyinyumba.”*
20 Yeke wathi: “Nginikelani isitja esitjha esincani nifake itswayi kiso.” Bamlethela sona.
21 Ngemva kwalokho, waya emthonjeni wamanzi waphosela itswayi kiwo+ wathi: “UJehova uthi, ‘Ngiwalaphile amanzi la. Angekhe asabangela ukufa namkha ubunyumba.’”*
22 Amanzi lawo alatjhiwe bekube kunamhlanjesi, ngokuvumelana nelizwi elakhulunywa ngu-Elitjha.
23 Wasuka lapho wakhuphukela eBhetheli. Njengombana asakhamba, kwavela abasanyana abathileko baphuma ngedorobheni, bathoma ukumdelela+ basolo bathi kuye: “Khuphuka, pandlanandina! Khuphuka, pandlanandina!”
24 Emaswapheleni wajika wabaqala, wabaqalekisa egameni lakaJehova. Ngemva kwalokho, kwavela amabhere amabili asikazi+ ehlathini arathula abantwana abama-42, baba ziinquqwana.+
25 Waragela phambili nokuya eNtabeni yeKarameli,+ ukusuka lapho wabuyela eSamariya.
Imitlolo Ephasi
^ Namkha “emkayini.”
^ Amezwi athi ‘amadodana wabaphorofidi’ kubonakala ngasuthi aqalisele esikolweni sokufundisa abaphorofidi namkha ehlanganweni yabaphorofidi.
^ Namkha “emkayini.”
^ Namkha kungenzeka “ibangela iimbeletho ezizirhululako.”
^ Namkha kungenzeka “iimbeletho ezizirhululako.”
