Yesibili YamaKhosi 13:1-25
13 Ngomnyaka wama-23 wokubusa kwakaJowatjhi+ indodana ka-Arhaziya+ ikosi yakwaJuda, uJehowarhazi indodana kaJehu+ waba yikosi yakwa-Israyeli eSamariya, wabusa iminyaka eli-17.
2 Waraga nokwenza okumbi emehlweni kaJehova begodu waphikelela esonweni uJerobhowamu indodana kaNebathi abangela u-Israyeli bona asenze.+ Akhange aphambuke kiso.
3 Yeke ilaka lakaJehova+ lavutha phezu kwaka-Israyeli,+ wabanikela esandleni sakaRhazayeli iKosi+ yeSiriya nesandleni sakaBhen-Hadadi+ indodana kaRhazayeli yoke imihla yabo.
4 Ngokukhamba kwesikhathi, uJehowarhazi wancenga uJehova bona abazwele, uJehova wamlalela ngombana abone indlela ikosi yeSiriya ewagandelele ngayo ama-Israyeli.+
5 Yeke uJehova wanikela ama-Israyeli umsindisi+ ozowasindisa esandleni samaSiriya, ama-Israyeli akghona ukuhlala emizinawo ngokuthula njengaphambilini.
6 (Nanyana kunjalo, akhenge asitjhiye isono sendlu kaJerobhowamu abangela u-Israyeli bona asenze.+ Aragela phambili nesonweso, nesigodo esicwengileko*+ besilokhu sijamile eSamariya.)
7 UJehowarhazi wasala nebutho lamadoda elima-50 elikhwele iinjomani, iinkarana ezili-10, namasotja akhamba ngeenyawo azii-10 000 ngombana ikosi yeSiriya yabarhayila, yabatshidlha baba njengethuli langesikhathi sokubhulwa kwekoroyi.
8 Woke omunye umlando kaJehowarhazi, koke akwenzileko namandlakhe, akukatlolwa na encwadini yomlando weenkhathi zamakhosi wakwa-Israyeli?
9 UJehowarhazi walaliswa nabokhokho bakhe, bambulunga eSamariya;+ indodanakhe uJowatjhi waba yikosi esikhundleni sakhe.
10 Ngomnyaka wama-37 wokubusa kwakaJowatjhi iKosi yakwaJuda, uJowatjhi+ indodana kaJehowarhazi waba yikosi yakwa-Israyeli eSamariya, wabusa iminyaka eli-16.
11 Waraga nokwenza okumbi emehlweni kaJehova, akhange azitjhiye izono uJerobhowamu indodana kaNebathi abangela u-Israyeli bona azenze.+ Waragela phambili nazo.
12 Woke omunye umlando kaJowatjhi, koke akwenzileko, amandlakhe nokuthi walwa njani neKosi yakwaJuda u-Amaziya,+ akukatlolwa na encwadini yomlando weenkhathi zamakhosi wakwa-Israyeli?
13 UJowatjhi walaliswa nabokhokho bakhe, uJerobhowamu*+ wahlala esihlalweni sakhe sobukhosi. UJowatjhi wabulungelwa eSamariya namakhosi wakwa-Israyeli.+
14 Kwathi lokha u-Elitjha+ nakagulako aphethwe bulwele obagcina bumbulele, uJowatjhi ikosi yakwa-Israyeli wehlela kuye wamlilela, wathi: “Baba, baba! Ikarana ka-Israyeli nabakhweli bakhe beenjomani!”+
15 U-Elitjha wathi kuye: “Thatha umsebe nemicibitjholo.” Wathatha umsebe nemicibitjholo.
16 Wathi ekosini yakwa-Israyeli: “Zilungiselele ukudumuza.” Wazilungiselela ukudumuza, ngemva kwalokho u-Elitjha wabeka izandla zakhe phezu kwezandla zekosi.
17 Wathi: “Vula ifesidere elingepumalanga.” Walivula. U-Elitjha wathi: “Dumuza!” Wadumuza. Bese wathi: “Umcibitjholo kaJehova wokuhlula, umcibitjholo wokuhlula phezu kweSiriya! Uzokuhlula iSiriya e-Afeki+ bekube kulapho uyirhayila ngokupheleleko.
18 Waraga wathi: “Thatha imicibitjholo,” wayithatha. Wathi ekosini yakwa-Israyeli: “Betha phasi.” Wabetha phasi amahlandla amathathu, wajama.
19 Umuntu kaZimu weqiniso wamkwatela khulu wathi kuye: “Bekufuze ubethe phasi amahlandla amahlanu namkha asithandathu! Begade uzokuhlula iSiriya bewuyirhayile ngokupheleleko kodwana nje uzokuhlula iSiriya kathathu kwaphela.”+
20 Ngemva kwalokho, u-Elitjha wahlongakala bewabulungwa. Bekunamabutho wabadlelezeli+ wakwaMowabi ebewajayele ukungena enarheni nakuthoma umnyaka.*
21 Kwathi lokha abantu nabasabulunga indoda ethileko, babona ibutho labadlelezeli, msinyana balahlela indoda leyo endaweni lapho kubulungelwe khona u-Elitjha babaleka. Lokha indoda le nayithinta amathambo ka-Elitjha, yavuka+ beyajama ngeenyawo.
22 IKosi yeSiriya uRhazayeli+ yagandelela ama-Israyeli+ yoke imihla kaJehowarhazi.
23 Nanyana kunjalo, uJehova waba nomusa kibo bewabarhawukela,+ watshwenyeka ngabo ngebanga lesivumelwano asenza no-Abrahama,+ u-Isaka+ noJakopo.+ Akhange afune ukubatjhabalalisa begodu akakabaqothi phambi kobuso bakhe bekube namhlanjesi.
24 Kuthe lokha iKosi yeSiriya uRhazayeli nayihlongakalako, indodanayo uBhen-Hadadi yaba yikosi esikhundleni sayo.
25 UJowatjhi indodana kaJehowarhazi yathatha kuBhen-Hadadi indodana kaRhazayeli amadorobho awathumbe ngepi kuyise uJehowarhazi. UJowatjhi wamhlula+ amahlandla amathathu, wabuyisa amadorobho wakwa-Israyeli.
